ख्रीष्टियानहरूका लागि मृत्यु केवल छाया हो

उन्नाइसौँ शताब्दीको अन्त्यतिर अमेरिकामा जन्मेका डोनाल्ड जी. बार्नहाउस प्रचारक, पास्टर, ईश्वरशास्त्रीसाथै लेखक थिए । ख्रीष्टाब्द १९२७ देखि १९६० मा आफ्नो मृत्यु नहुञ्जेलसम्म तिनले अमेरिकाको पेन्सलभेनियास्थित टेन्थ प्रेसबिटेरिएन चर्चमा पास्टरीय सेवा–कार्य गरेका थिए ।

बार्नहाउसकी पत्नीको मृत्युपश्चात् छोरीहरूलाई हुर्काउने जिम्मा तिनको काँधमा आयो । तिनले सम्भवत: अरू कसैले नगर्ने कुरो गरे अर्थात् तिनले आफ्नै पत्नीको अन्त्येष्टि सेवा सञ्चालन गरे ।

पास्टर बार्नहाउस आफ्ना छोरीहरूसँगै अन्त्येष्टि सेवाको लागि जाँदै थिए । जीवनमा आइपरेको त्यस दु:खद परिस्थितिको बारेमा छोरीहरूलाई केही भन्न मन लाग्यो पास्टरलाई । कार हाँक्दै गर्दा तिनीहरू ट्राफिक बत्तीमा आएर रोकिए । दिन उज्यालो थियो । सूर्यको किरण तिनीहरूको कारभित्र प्रवेश गरी तिनीहरूलाई न्यानो पार्दै थियो । तिनीहरूको पछाडि एउटा ट्रक आएर रोकियो । ट्रकको छायाले तिनीहरूको कारको भित्री भागलाई अँध्यारोमा परिणत गरिदियो । त्यस परिस्थितिलाई प्रयोग गर्दै पास्टरले आफ्ना छोरीहरूलाई सोधे, “तिमीहरूलाई केले प्रहार गरेको चाहन्छयौ— छाया कि ट्रक ?”

एक जनाले उत्तर दिइन्, “बुबा पनि कस्तो वाहियात प्रश्न सोध्नुहुन्छ ! छायाले हामीलाई चोट पुर्‍याउन सक्दैन । मलाई त ट्रकले भन्दा छायाले नै प्रहार गरोस् ।”

त्यसपछि पास्टरले तिनीहरूकी आमाको मृत्युबारे व्याख्या गर्ने कोसिस गरे । पास्टरले भने कि उनको मृत्यु केवल छायाको प्रहारजस्तो थियो; येशू उनको ठाउँमा आउनुभयो र ट्रकले उहाँलाई हान्यो । तिनले भजनसंग्रह २३ बाट परिचित वचनहरू उद्धृत गरे, “मृत्युको अन्धकारमय घाटी भएर जानुपरे तापनि म कुनै खतरादेखि डराउनेछैनँ, किनकि तपाईं मेरो साथमा हुनुहुन्छ ।”

 

Leave Your Comments Here.