कानुनी रूपमा प्रकाशित पहिलो अङ्ग्रेजी बाइबलको नाउँ हो, “ग्रेट बाइबल ।” यसको नाउँले यसको आकारलाई जनाउँछ अर्थात् यो आकारमा ठुलो
थियो । यो पुल्पिट बाइबल थियो । यसलाई घरमा लगेर पढिने मनसायले तयार पारिएको थिएन
। इङ्गल्यान्डका तत्कालीन राजा हेन्री आठौँले यसलाई छपाएका थिए । यी तिनै राजा थिए
जसले नयाँ करारको बाइबललाई अङ्ग्रेजी भाषामा छाप्ने प्रथम व्यक्ति विलियम
टिन्डेललाई जिउँदै जलाई मृत्युदण्ड दिएका थिए । टिन्डेलले “हे प्रभु, इङ्गल्यान्डका
राजाका आँखा खोलिदिनुहोस्” भनी मर्ने बेलामा
गरेको प्रार्थना तिन वर्षपश्चात् अर्थात् ख्रीष्टाब्द १५३९ मा यस बाइबलको
प्रकाशनसँगै पुरा भएको थियो ।
ग्रेट बाइबल (अर्थात् महान् बाइबल) को प्रकाशनको पृष्ठभूमि निकै रोचक छ । त्यस
बेला हेन्री आठौँ इङ्गल्याण्डका राजा थिए, जो असल थिएनन् । आफ्नी पत्नीसँग
सम्बन्धविच्छेद गरी आफ्नो घरमा नोकर चाकरहरूको
हेरचाह गर्ने स्त्रीसँग बिहे गर्न पाऊँ भनी राजाले पोपसँग अनुरोध गरे । पोपले
अनुमति दिएनन् । राजा हेन्रीले उक्त स्त्रीसँग बिहे गरी पोपलाई गतिलो जवाफ
फर्कादिए र रोमको धार्मिक नियन्त्रणबाट
इङ्गल्यान्डलाई मुक्त गरी आफूले रोमन क्याथोलिक धर्म त्यागेको घोषणा पनि गरे
राजाले । राष्ट्रप्रमुख र मण्डलीको नयाँ अगुवाको रूपमा राजाले आफैलाई प्रस्तुत गरे
। राजाले पोपको भूमिकामा काम गर्न थाले । त्यस समयमा रोमले अङ्ग्रेजी भाषामा बाइबल
छाप्न निषेध गरेको थियो । तर अङ्ग्रेजी भाषामा धर्मशास्त्र छाप्नलाई आर्थिक सहयोग
गरी रोमका इच्छाहरूलाई खुल्लमखुल्ला विरोध गर्नु नै तिनको पहिलो काम बन्यो ।
परिणामत: कानुनी रूपमा मान्यता प्राप्त पहिलो अङ्ग्रेजी बाइबल छापियो । परमेश्वरले
आफ्नो महिमा ल्याउन मानिसका
दुष्ट अभिप्रायलाई पनि प्रयोग गर्नुहुन्छ भन्नाका लागि यो एउटा ज्वलन्त उदाहरण हो
।
