यूहन्नाको सुसमाचारमा अभिलिखित कैयौँ स्थानहरू पत्ता लागेका छन्

६१ वर्षका क्रेग एल. ब्लम्वर्ग नयाँ करारका परिचित विद्वान् हुन् । येशूको जीवनीको अध्ययनमा तिनी आधिकारिक व्यक्ति हुन् । नयाँ करारमा विद्यावारिधि गरेका क्रेगले १९८६ देखि प्रतिष्ठित डेन्भर सेमिनारीमा पढाउँदै आएका छन् । झण्डै दुई दर्जन कृतिका लेखक क्रेगले मिखाएल जे. विकिन्स र जे. पी. मोरल्यान्डद्वारा सम्पादित जिसस अन्डर फाएर (ख्रीष्टाब्द १९९५) नामक पुस्तकमा एउटा गतिलो अध्याय योगदान गरेका छन् । पुस्तकको ४०–४१ पृष्ठ सङ्ख्यामा लेखकले यूहन्नाको सुसमाचारमा अभिलिखित कैयौँ ऐतिहासिक स्थानहरूलाई आधुनिक पुरातत्त्वविद्याले पुष्टि गरेको छ भनी व्यक्त गरेका छन्:  

जहाँ–जहाँ सुसमाचारहरूका ज्ञात तथ्यहरूलाई जाँच गर्न सकिन्छ ती उल्लेखनीय रूपमा निरन्तर सही साबित भएका छन्, खास गरी यूहन्नाको सुसमाचारमा । पुरातत्त्वविद्हरूले भेडा–ढोकाको नजिक रहेको बेथस्दाको जल–कुण्डका पाँच ओटा दलान (५:२), सिलोआमको तलाउ (९:१–७), सुखारमा भएको याकूबको इनार (४:५), पिलातसले येशूलाई जाँच गरेको “ढुङ्गाका पाटी” [गब्बथा] (१९:१३) र मन्दिरका हाताहरूमा भएको सोलोमनको दलान (१०:२२–२३) को उत्खनन् गरेका छन् । हालै मात्र अर्थात् १९६१ मा कैसरियामा एउटा शिलालेख फेला पारियो जसले पहिलो पटक ख्रीष्टको समयमा शासन गर्ने यहूदियाका बडाहाकिम पिलातसको सम्बन्धमा बाइबलेतर प्रमाणलाई जुटाएको छ । प्यालेस्टाइनमा पहिलो शताब्दीको योहानान नाउँ गरेको क्रूसमा चढाइएको मानिसको अस्थि–बाकसको खोजले उसका गोलीगाँठाहरूमा काँटीहरूको प्रयोग भएको पुष्टि भएको छ जसरी ख्रीष्टलाई ठोकिएको थियो । दण्डाज्ञा पाएका मानिसका खुट्टाहरूलाई क्रूसमा टाँग्नका लागि डोरीको प्रयोग गरिन्थ्यो भनी पहिले सन्देहवादीहरूले विचार गर्थे । ... १९९० मा यरूशलेममा यहूदी प्रधान पूजाहारी कैयाफा र तिनको परिवारको समाधिस्थल पत्ता लगाइयो । यीलगायत अन्य वर्णनहरूले जाँच गर्न सकिने क्षेत्रहरूमा सुसमाचारको विश्वसनीयताबारे अनुकूल प्रभावको रचना गर्छन् ।

Leave Your Comments Here.