के तपाईंले परमेश्वरले पठाउनुभएको पत्रलाई खोलेर पढ्नुभएको छ ?

एलिजाबेथ ब्यारेट ब्राउनिङ आफ्नो जीवन कालमा इङ्गल्यान्ड र अमेरिकामा निकै लोकप्रिय कवियित्री थिइन् ।

ख्रीष्टाब्द १८०६ मा इङ्गल्यान्डमा जन्मेकी एलिजाबेथ बिरामीको कारणले शारीरिक रूपमा अशक्त हुन पुगिन् । उनी १८४६ मा रोबर्ट ब्राउनिङसित वैवाहिक बन्धनमा बाँधिइन् । एलिजाबेथको पिताको अनुमोदन नपाएकोले तिनीहरूले गोप्य रूपमा बिहे गरेका थिए । बिहेपश्चात् ब्राउनिङ परिवार इटाली प्रस्थान गरे जहाँ तिनीहरूले बाँकी जीवन बिताए ।

तर एलिजाबेथका बुबा आमाले उनलाई परित्याग गरे तापनि उनले भने तिनीहरूलाई कहिल्यै त्यागेकी थिइनन् । बिग्रिएको सम्बन्ध सुध्रियोस् भन्ने छोरीको चाहना रहेको थियो । त्यसैले, प्राय: हरेक हप्ता उनले आफ्ना माता पितालाई चिठी पठाउँथिइन् तर उनले एउटै पत्रको पनि जवाफ पाइनन् ।

१० वर्षपश्चात् एलिजाबेथले हुलाकबाट एउटा ठुलो बाकस हात पारिन् । उनले पठाएका सबै चिठीहरू त्यही बाकसभित्र रहेछन् । एउटै पनि पढिएको रहेनछ । ती पत्रहरू अङ्ग्रेजी साहित्यका सुन्दर रचनाहरू बने ।

एलिजाबेथका बुबा आमाले केही पत्रहरूलाई मात्र पढिदिएका भए टुटेको सम्बन्ध जोडिन्थ्यो होला । ती पत्रहरू माता पिताप्रति उनको प्रेमका वाहकहरू थिए । उनी मिलाप चाहन्थिन् । तर तिनीहरूले नखोलेका कारण बिग्रिएको सम्बन्ध पुनर्निर्माण हुन सकेन ।

पापको कारणले परमेश्वरसित मानव–जातिको सम्बन्ध बिग्रिएको थियो । तर उहाँले मिलापको मार्ग जुटाइदिनुभयो । बिग्रिएको सम्बन्ध सुधार्नको लागि उहाँले आफ्नो पत्र पठाइसक्नुभएको छ जुन बाइबल हो । यसमा अभिलिखित उहाँको निमन्त्रणालाई स्वीकार गर्नेहरूले टुटेको सम्बन्धलाई जोडिसकेका छन् । के तपाईंले परमेश्वरले पठाउनुभएको पत्रलाई खोलेर पढ्नुभएको छ ?      

         

Leave Your Comments Here.