केवल परमेश्वरले हामीलाई विश्वासद्वारा बचाउन सक्नुहुन्छ— जिम्मी कार्टर

अमेरिकाका उनन्चालिसौँ राष्ट्रपति बनेका जिम्मी कार्टरले ख्रीष्टाब्द १९७७–१९८१ सम्म सेवा गरे । कार्टर सेन्टर नामक गैरसरकारी संस्थामा तिनले पुर्‍याएको योगदानको तारिफ गर्दै ख्रीष्टाब्द २००२ मा तिनलाई नोबेल शान्ति पुरस्कार प्रदान गरियो । विकासोन्मुख मुलुकहरूमा शान्ति सम्झौताको पहल गर्न, चुनावको अवलोकन गर्न अनि रोग रोकथामसाथै उन्मूलनलाई बढवा दिन तिनले प्रचुर मात्रामा यात्रा गरेका छन् ।

आफ्नो जवान अवस्थादेखि नै कार्टर ख्रीष्टियमतप्रति प्रतिबद्ध छन् । तिनी जर्जियामा पर्ने आफ्नो गृह नगर प्लेन्सस्थित मारानाथा ब्याप्टिस्ट चर्चका डिकन हुन् । पूर्वराष्ट्रपति कार्टर लेखक पनि हुन् । ९१ वर्ष पुगेका कार्टरले Sources of Strength: Meditations on Scripture for a Living Faith नामक आफ्नो पुस्तकमा उद्धारको योजनालाई ६ ओटा बुँदामा व्यक्त गरेका छन्:

(१) परमेश्वरले हामी सबैलाई प्रेम गर्नुहुन्छ ।

(२) हामी सबै पापी हौँ ।

(३) पापले हामीलाई परमेश्वरबाट अलग गर्छ ।

(४) हामीले आफूले आफूलाई बचाउन सक्दैनौँ । केवल परमेश्वरले हामीलाई विश्वासद्वारा बचाउन सक्नुहुन्छ ।

(५) येशू पापको तगारोलाई हटाउन आउनुभयो । 

(६) ख्रीष्टमाथि विश्वास गरेर हामी यी आशिष्हरू प्राप्त गर्दछौँ ।

कार्टर जारी राख्छन्, “उद्धारको लागि यो मार्ग ज्यादै सामान्य र सजिलो भएकोले परमेश्वरको कृपा र अनन्त जीवन प्राप्त गर्नलाई हामीले केही गर्नुपर्छ भनी केही मानिसहरूले सोच्न सक्छन् । वास्तवमा शिक्षा, राम्रो परिवार, सफल पेसाजस्ता जीवनका अधिकांश प्राप्तिहरूका लागि कडा मेहनत, प्रयत्न र बलिदानको खाँचो पर्छ । तथापि परमेश्वरको क्षमा र आशिष् हामीलाई सित्तैँमा केवल अनुग्रहद्वारा प्रदान गरिन्छ ।”

Leave Your Comments Here.