आगलागीबाट बाँच्न सफल ५ वर्षको ठिटो प्रखर वक्ता बने

घटना ९ फेबु्रअरी १७०९ को हो जुन बेला तिनी केवल ५ वर्षका थिए । रातको ११ बजिसकेको थियो केटो बसेको घरमा आगलागी भयो । सबै केटाकेटीहरूलाई सुरक्षितसाथ घर बाहिर निकालियो तर तिनी भने दोस्रो तलामा नै छाडिए । आगो जलेर छाना खस्नै लाग्दा केटो चिच्च्याएपछि मात्र केटो भित्रै छाडिएछ भनी थाहा हुन आयो । केटोको उद्धारको लागि पिताचाहिँ भर्‍याङतर्फ दौडे । तर भर्‍याङलाई आगोले भष्म पार्न थालिसकेकोले तिनको वजनलाई भर्‍याङले थाम्छ जस्तो लागेन पितालाई । पूर्ण नैराश्यमा पिताले घुँडा टेकी सहायताको निम्ति परमेश्वरलाई पुकारे । त्यसै बेला केटो दराजमाथि उक्लेकोले छिमेकीहरूले तिनलाई देख्न सके । भर्‍याङ खोजी बाहिरबाट भर्‍याङमा चढेर गई केटोको उद्धार गर्न अबेला हुने भएकोले मानिसहरू एक अर्काको काँधमाथि चढे र केटोको सकुशल उद्धार गरियो ।

त्यसको केही समय पनि बित्न नपाउँदै छाना खस्यो । पिताले चिच्च्याउँदै यसो भने, “हे छिमेकीहरू आउनुस् । हामी घुँडा टेकी परमेश्वरलाई धन्यवाद दिऔँ । उहाँले मेरा सबै आठ सन्तान दिनुभएको छ । घर जाओस् म धनी नै छु ।” यस अविस्मरणीय घटनाले ती बालकको मनमा अमिट छाप छाड्यो । पछि तिनकी आमाले तिनलाई “आगोबाट निकालिएको अगुल्टो” (जकरिया ३:२) को रूपमा उल्लेख गरिन् । को थिए ती ठिटो ? पछि तिनलाई सारा दुनियाँले जोन वेस्लीको नाउँले चिन्यो । 

मेथोडिज्मका संस्थापक वेस्ली अठारौँ शताब्दीका एक प्रखर वक्ता थिए । पवित्रताको अभियान र पेन्टिकोस्टलवादको विकासमा तिनका रचनाहरूले महत्त्वपूर्ण भूमिका खेलेका छन् । तिनले आफ्नो  जीवन कालमा झण्डै ४०,००० ओटा प्रवचन तोडे । तिनले कैयौँ रचनाहरू पनि छाडेर गएका छन् ।       

Leave Your Comments Here.