परमेश्वरको वचनको सत्यतालाई इन्कार गर्नुको साटो मृत्युलाई रोजे लाटिमारले

पन्ध्रौँ शताब्दीको उत्तराद्र्धमा इङ्गल्यान्डमा जन्मेका ह्यु लाटिमार बिशप थिए । प्रोटेस्टेन्ट सुधारवादी लाटिमार आफ्नो समयका महान् प्रचारक पनि थिए । तिनलाई विभिन्न ठाउँमा बोल्ने मौका दिइन्थ्यो । एक पटक तिनले इङ्गल्यान्डका राजा हेन्री आठौँको सामु प्रचार गर्नुपर्ने भयो । प्रचार गर्नुपर्ने सन्देशको बारेमा तिनले मनन गर्न थाले । परमेश्वरले तिनको ह्दयमा जुन प्रवचन हालिदिनुभएको थियो त्यो राजाले सुन्न मन नपराउने किसिमको थियो भनी तिनले बुझेका थिए ।

लाटिमारले प्रचार गर्न लाग्दा उहाँले भन्नुभयो, “लाटिमार, हे लाटिमार, तिमी उच्च र शक्तिशाली राजा हेन्री आठौँको सामु प्रचार गर्दै छौ जससित तिमीलाई झ्यालखानामा हाल्ने र तिम्रो शिर कटाउने शक्ति छ भन्ने कुरो के तिमीलाई याद छ ?”

एकछिनको विश्रामपश्चान् उहाँले पुन: भन्नुभयो, “लाटिमार, हे लाटिमार, तिमी राजाहरूका राजा र प्रभुहरूका प्रभुको सामु बोल्दै छौ जसको सामु हेन्री आठौँको सिंहासन खडा छ, जसको सामु तिमीले एक दिन आफ्नो हिसाब बुझाउनेछौ भन्ने कुरो के तिमीलाई याद छैन ? लाटिमार, हे लाटिमार, तिम्रो मालिकप्रति विश्वासयोग्य बन र परमेश्वरका सारा सत्यतालाई घोषणा गर ।”

प्रचारक लाटिमारले छनौटको सामना गर्नुपर्‍यो: मानिसले सुन्न चाहेको वचन बोल्ने कि ख्रीष्टले आज्ञा दिनुभएको वचन बोल्ने ? तिनी सत्यताप्रति अडिग रहे र तिनले साहसपूर्वक परमेश्वरको वचन बोले । अन्तत:, १६ अक्टोबर १५५५ मा हेन्रीकी छोरी मेरी प्रथमद्वारा प्रचारक लाटिमारलाई जिउँदै जलाइयो ।

Leave Your Comments Here.