बुद्ध धर्मका पूजाहारीका छोराबाट वरिष्ठ पास्टर बनेका क्रिस्टोफरको ह्दय छुने कथा

क्रिस्टोफर लापेल एसियाको दक्षिण पूर्वमा पर्ने क्याम्बोडियाको राजधानी नामपेन्हमा हुर्केका थिए । तिनका पिता बुद्ध धर्मका प्रधान पूजाहारीसाथै राजकुमार नोरोडोम सिन्हाकका आत्मिक सल्लाहकार थिए । क्रिस्टोफर हुर्केपछि तिनले पिताको ठाउँ लिऊन् भन्ने पिताको इच्छा रहेको थियो । कहिलेकाहीँ पिताले छोरो क्रिस्टोफरलाई राजदरबारमा सँगै लिएर जान्थे जहाँ तिनले राजकुमारका सन्तानसँग खेल्न पाउँथे ।

क्रिस्टोफर १९ वर्ष लागेपछि ख्रीष्टाब्द १९७५ मा खमेर रुज सत्तामा आयो । क्याम्बोडियाको खमेर कम्युनिस्ट पार्टीका अनुयायीहरूलाई दिइएको नाउँ हो, खमेर रुज । तिनीहरू सत्तामा आएपछि हात–हातमा एके–४७ लिएर तिनीहरूले जबरजस्ती क्याम्बोडियाका सहरहरू रित्त्याउन थाले । सहरका बासिन्दाहरूलाई दुर्गम गाउँहरूमा जान बाध्य पारियो । पछिल्ला १,३६४ दिनमा सामाजिक वर्गलाई निमिट्टयान्न पारी भूमिसुधार समाजको सृजना गर्ने प्रयासमा कम्युनिस्टहरूले ८० लाख जनसङ्ख्यामध्ये झण्डै २० लाखलाई मृत्युको मुखमा पुर्‍याए ।

ती कम्युनिस्टहरूले शिक्षकहरूलाई मारे; अगिल्ला सरकारी कर्मचारीहरूलाई मारे; पत्रकारहरूलाई मारे । तिनीहरूले कुनै पनि शिक्षित व्यक्तिलाई राख्न चाहँदैनथ्ये । रुपियाँ–पैसा लुटियो; व्यक्तिगत सम्पत्ति खोसियो; स्कुलहरू बन्द गरिए; अदालतहरू बन्द गरिए; धार्मिक अभ्यासहरूमाथि दमन गरियो; व्यक्तित्वलाई निर्मूलन पारियो । यही कथित् सुधारको चपेटामा परेका थिए क्रिस्टोफर र तिनको परिवार पनि ।  

क्रिस्टोफर र तिनको परिवार क्याम्बोडियाको उत्तर पश्चिमपट्टि लागे । तर तिनको परिवारका सबै सदस्यहरूलाई एकै ठाउँमा बस्न दिइएन, तिनीहरूलाई अलग गरियो । तिनका बुबा आमालाई मरणासन्न काम गर्न लगाइयो । दुवै जना यस धरतीबाट बिदा भए । तिनकी बहिनी सञ्चारकर्मी भएकोले उनको हत्या गरियो । तिनको भाइलाई पनि मारियो ।

क्रिस्टोफर दुई वर्षसम्म कलेज गएको भए तापनि तिनले आफू साक्षर नभएको अभिनय गरे । बिहानदेखि बेलुकासम्म केही नखाईकन तिनले १४–१६ घण्टासम्म काम गर्नुपथ्र्यो । सुकेर तिनको शरीरमा हाड र छाला मात्र बाँकी रहेका थिए । तिनका दुई–तिहाई मित्रहरू मरेर गइसकेका थिए ।

कम्युनिस्टहरूको हातबाट मर्नुभन्दा जङ्गलमै मर्नु उचित ठानी क्रिस्टोफर काम गर्ने ठाउँबाट भागे । तिनी थाइल्यान्डको सिमानामा आइपुगे जुन टाढा थिएन । अन्त्यमा तिनी थाइल्यान्डको शरणार्थी शिविरमा आइपुगे जसलाई ख्रीष्टियान आउटरिच भनिन्थ्यो ।

क्रिस्टोफर त्यहाँ हुन पाउँदा तिनलाई अत्यन्तै खुसी लाग्यो । जीवनमा धेरै लामो समयपछि तिनले सुरक्षाको महसुस गरे । एक दिन एक जना स्त्रीले तिनलाई येशू ख्रीष्टको बारेमा बताइन् । आफ्नो जीवन जोगाउनुभएकोमा तिनले परमेश्वरलाई धन्यवाद दिनुकासाथै तिनले येशू ख्रीष्टलाई आफ्नो ह्दयमा आउन निमन्त्रणा दिए । तिनी नयाँ सृष्टि बने ।

त्यही शिविरमा क्रिस्टोफरले भान्ना नाउँ गरेकी केटीलाई भेटे र दुई जना वैवाहिक बन्धनमा बाँधिए । १९८० मा तिनीहरू अमेरिका प्रस्थान गरे । अध्ययनपश्चात् क्रिस्टोफर क्यालिफोर्नियाको लस एन्जलसस्थित गोल्डेन वेस्ट क्रिस्चियन चर्चका वरिष्ठ पास्टर बने जहाँ तिनले २० वर्षसम्म सेवा गरे । तिनी पटक–पटक आफ्नो मातृभूमि क्याम्बोडिया पनि गए, स्थानीय ख्रीष्टियानहरूलाई उत्साह दिन र तालिम दिन । तिनको नेतृत्वमा २०० ओटाभन्दा बेसी मण्डली स्थापना भइसकेका छन्  । 

 

Leave Your Comments Here.