परमेश्वरले जेम्स स्परजिनको आवश्यकतालाई पुरा गरिदिनुभयो

प्रचारकहरूका राजकुमार भनेर चिनिने चाल्र्स स्परजिन उन्नाइसौँ शताब्दीका प्रखर वक्ता थिए । तिनले आफ्ना हजुरबुबा जेम्सको बारेमा भनेको कथा हो यो ।

“तिनको एउटा ठुलो परिवार थियो तर आयस्रोत भने कम थियो । तरै पनि तिनले आफ्नो प्रभुलाई प्रेम गर्थे र कुनै पनि अवस्थामा तिनले प्रचारको कामलाई त्याग्दैनथ्ये ।” एक दिनको कुरो हो । तिनीहरूको घरमा भएको गाई अकस्मात् मर्‍यो । केटाकेटीहरू दुधको लागि त्यही गाईमा भर पर्थे । जेम्स स्परजिनकी पत्नी निकै चिन्तित भइन् तर पतिले यसो भन्दै सान्त्वना दिए, “परमेश्वरले जुटाउनुहुनेछ भनी उहाँले भन्नुभएको छ । उहाँलाई इच्छा लाग्यो भने उहाँले पचास ओटा त्यस्ता गाईहरू पठाउन सक्नुहुन्छ भन्ने मेरो विश्वास छ ।”

त्यही दिन लन्डनमा केही मानिसहरू जम्मा हुँदै थिए । ती मानिसहरूको समूहलाई जेम्स स्परजिनले चिन्दैनथ्ये । तिनीहरूले गरिब पास्टरहरूका आवश्यकताहरू परिपूर्ति गर्न खोज्दै थिए । तिनीहरूले धेरै पैसा उठाएर विभिन्न पास्टरहरू र तिनीहरूका परिवारहरूलाई पठाउन थाले । तिनीहरूले सोचेका सबै पास्टरहरूलाई दिइसकेपछि पनि तिनीहरूसँग पाँच पाउन्ड (आधुनिक सटहीअनुसार लगभग साँढे सात सय नेपाली रुपियाँ) उब्रेको थियो । एक जनाले त्यो बाँकी पैसा जेम्स स्परजिनलाई पठाइदिन सुझाव दियो । अर्कोले थप्यो, “पाँच पाउन्ड मात्र नपठाऔँ । म यसमा अर्को पाँच पाउन्ड थपिदिन्छु ।” अरूले पनि त्यसमा थप्यो । तिनको गाई मरेको भोलिपल्ट जेम्स स्परजिनले खाममा बिस पाउन्ड प्राप्त गरे !

यसरी परमेश्वरले जेम्स स्परजिनको आवश्यकतालाई जुटाइदिनुभयो । प्रेरित पावलले लेखेका छन्, “मेरा परमेश्वरले आफ्नो महिमामा उहाँको सम्पत्तिअनुसार तिमीहरूको हरेक खाँचो ख्रीष्ट येशूमा पूरा गरिदिनुहुनेछ” (फिलिप्पी ४:१९) ।    

Leave Your Comments Here.