झ्यालखानामा प्रचार गर्दाको अनुभव

डिसेम्बर ८, २०१०

आज आफ्नै कहानी लिएर आएको छु ।

हिजो बेलुकासम्म फोन नआएकोले म अलि चिन्तित थिएँ । पास्टर विशाल सुब्बाले चार पटक फोन गरेर मलाई निमन्त्रणा दिइसक्नुभएको थियो, वचनको लागि । मैले उहाँसँग फोन सम्पर्क गर्ने प्रयास गरेँ तर सम्भव भएन । म सुत्ने तरखरमा थिएँ । मोबाइलको घण्टी बज्यो, अनुमानसहित मैले फोन उठाएँ । फोन उहाँले नै गर्नुभएको रहेछ । उहाँले भन्नुभयो, “भोली बिहान हामी साँढे नौ बजेतिर त्रिपुरेश्वरको दाहिनेपट्टि अवस्थित पेट्रोलपम्पमा भेटौँ ।” उहाँलाई मैले कहिल्यै देखेको थिइनँ तर उहाँले मलाई भने हाम्रो आशिष् पत्रिकामार्फत चिन्नुभएको रहेछ ।

मनमा विभिन्न कौतुहुलता र जिज्ञासासहित म पल्टेँ । भोलिपल्ट दैनिक बिहानी क्रियाकलाप सकेपछि मोटरबाइक लिएर म तोकिएको ठाउँमा पुगेँ । केहीबेर कुरेपछि एक जना टाइकोट लगाएको दाजुले “तपाईं कमल अधिकारी” भनेपछि उहाँले आफू विशाल सुब्बा भएको बताउनुभयो । उहाँ नै मैले प्रतीक्षा गरेको व्यक्ति हुनुहुन्थ्यो ।

दुई ओटा बन्दीगृह (झ्यालखाना) मा गई ख्रीष्टमसको अवसरमा विशेष कार्यक्रम गर्ने योजना बनाइएको थियो । हामीलाई मोबाइल, सिमकार्ड, क्यामराजस्ता वस्तुहरू लान दिइएन । बाइबल र वचन लेखिएको पेपर लिई म उहाँहरूसँगै अगाडि बढेँ र जीवनमा पहिलो पटक बन्दीगृहमा वक्ताको रूपमा प्रवेश गर्दै थिएँ । हामी जम्मा सात जना थियौँ । पहिले हामी केन्द्रिय कारागारमा गयौँ जहाँ हामीलाई योजनामुताबिक कार्यक्रम सञ्चालन गर्न दिइएन । हाम्रो योजना बाहिर नै कार्यक्रम गर्नुथियो । तर नपाएपछि त्यहाँ भित्र रहेको जिवन ज्योति गस्पेल चर्चमा नै हामीले सङ्गति गर्‍यौँ ।

पास्टर विशाल सुब्बाले सञ्चालन गर्नुभएको उक्त सङ्गतिमा लगभग ४० जनाको उपस्थिति थियो । कति विश्वासी थिए भने कति अविश्वासी । पास्टर रेशम राज पौडेलले वचन बाँड्नुभयो भने मलाई आफ्नो गवाही बाँड्ने अवसर मिलेको थियो । हामी बाहिरबाट गएकामध्ये चार जना पात्रहरूले सहभागिता जनाएको “पाप” शीर्षकको लघु नाटक ज्यादै रोमाञ्चकारी र शिक्षामूलक थियो । छुट्टै आनन्दले भरिपूर्ण उक्त सङ्गतिको समाप्तिपछि हामीले चियापान गर्‍यौँ । र, त्यहाँका मित्रहरूले हामीलाई त्यहीँभित्र भएको एउटा सानो होटलमा लैजानुभयो जहाँ हामीले चाउमिन खायौँ ।

करिब १ बजेतिर हामी दोस्रो बन्दीगृहमा प्रस्थान गर्‍यौँ जुन नजिकै थियो । केही विश्वासीहरू हामीलाई ढोकासम्म लिन आएका थिए । पास्टर विशाल सुब्बाले सञ्चालन गर्नुभएको उक्त कार्यक्रममा मलाई वक्ताको रूपमा निमन्त्रणा थियो । लगभग २०० जनाको उपस्थितिमा मैले बाइबलको प्रभावकारित र येशूले ल्याउन सक्नुहुने परिवर्तनलाई मुख्य विषय बनाई प्रचार गरेको थिएँ । हामीलाई हतार भएकोले हामीले त्यहाँ चियापान गर्न सकेनौँ । हामीलाई भेट्नको लागि सीमित समय दिइएको थियो । कार्यक्रम सकेपछि हामी फक्र्यौँ । यसरी जीवनमा पहिलो पटक जेलमा गएर प्रचार गर्न पाएकोले मैले आफैलाई भाग्यमानी सम्झेँ ।

Leave Your Comments Here.