प्रार्थनाको परिणामस्वरूप बाँच्न सफल भई एक बच्ची

बिसौँ शताब्दीको उत्तराद्र्धमा डा. हेलेन रोजर्भर हाल कङ्गो भनेर चिनिने मध्य अफ्रिकी मुलुक जाइरेमा मिसनरी भएर गएकी थिइन् । उनैले भनेको कथा हो यो ।

“हाम्रो मिसन स्टेसनमा भएकी एउटी महिलाले गर्भ अवधि पुरा नभईकन एउटा बच्चा जन्माई । बच्चालाई जीवित राख्न हामीले इन्क्युबेटर [अपरिपक्व वा कम तौल भएको बच्चालाई उपयुक्त वातावरण र ताप दिने उपकरण] को निर्माण गर्ने कोसिस गर्‍यौँ । तर हामीसँग भएको एउटै मात्र तातो पानी राख्ने बोतल मर्मत हुन नसक्ने अवस्थामा थियो । त्यसैले हामीले बालबालिकाहरूलाई त्यो बच्चा र उसकी दिदीको निम्ति प्रार्थना गर्न अनुरोध गर्‍यौँ । एक जना केटीले बिन्ती बिसाई, ‘हे परमेश्वर, हामीलाई आज नै एउटा तातो पानी राख्ने बोतल पठाइदिनुस् । भोलिसम्म ढिलो हुनेछ किनकि त्यसबेलासम्म बच्चा मरिसक्नेछ । हे प्रभु, दिदीको निम्ति एउटा गुडिया पनि पठाइदिनुस् ताकि उसले एकलोपनको महसुस नगरोस् ।’ त्यही दिन दिउँसो इङ्गल्यान्डबाट एउटा ठुलो पोको आइपुग्यो । हामीले त्यसलाई खोल्दै गर्दा केटाकेटीहरूले उत्सुकतापूर्वक हेर्दै थिए । छक्क पार्ने कुरो के थियो भने केही कपडाहरूको मुनिपट्टि तातो पानी राख्ने एउटा बोतल पनि थियो । इमान्दारीपूर्वक प्रार्थना गर्ने केटीले अझै खोतल्दै गई र उसले जे देखी त्यसमा ऊ चिच्च्याई, ‘यदि परमेश्वरले बोतल पठाउनुभएको छ भने उहाँले गुडिया पनि पठाउनुभएको छ भन्ने कुरामा म निश्चित छु ।’ उसको निश्चयता सही साबित भयो । स्वर्गीय पितालाई बच्चाको इमान्दार बिन्तीबारे पहिले नै थाहा थियो । त्यसैले, पाँच महिनाअगावै ती दुवै चिजहरू पोकाभित्र राख्न परमेश्वरले केही स्त्रीहरूलाई अगुवाइ गर्नुभएको थियो ।”      

Leave Your Comments Here.