सामोसाटाका बिशप युसेबियस सम्राट्को मृत्युको धम्कीदेखि डराएनन्

ख्रीष्टाब्द ३२८ मा जन्मेका भलेन्स पूर्वी रोमका सम्राट् थिए जसले ख्रीष्टाब्द ३६४–३७८ सम्म शासन गरे । रोमी साम्राज्यका ६६ औँ सम्राट् भलेन्स युद्धमा पराजित भई ५० वर्षको उमेरमा मारिएका थिए ।

सामोसाटाका युसेबियस भलेन्सका समकालिक थिए । ३६१ मा तिनी सामोसाटाका बिशप बने । तिनी लगभग ३७९ मा सहिद भएर यस धरतीबाट बिदा भएर गएका थिए । 

बिशप युसेबियस एरिएनवाद नामक झुटा शिक्षाको खरो विरोधी थिए जब कि सम्राट् भलेन्स त्यस शिक्षाको अनुयायी थिए । एक पटक सम्राट् भलेन्सले युसेबियसका सबै सम्पत्ति खोसी तिनलाई यातना दिने, बन्दी बनाउने र मृत्युदण्डसम्म दिने धम्की दिँदा ती निर्भीक ख्रीष्टियानले जवाफ दिएका थिए, “उसलाई सर्वस्वहरणको कुनै डर छैन जससित गुमाउनुपर्ने कुनै कुरो छैन । न त ऊ निर्वासनबाट डराउनुपर्छ जसको लागि स्वर्ग उसको देश हो । न त यातनादेखि जब कि एकै मुक्कामा उसको शरीरलाई नष्ट गर्न सकिन्छ । न त मृत्युदेखि जुन पाप र दु:खदेखि उसलाई छुटकारा दिने एउटै मात्र माध्यम हो ।”  

  

Leave Your Comments Here.