जेम्सले जीवनको पानी पिए र तिनी तृप्त भए

तिनको नाउँ हो, क्रेग जेम्स हाजेन । तिनी लगनशील विद्यार्थी थिए । तिनको भविष्य उज्ज्वल बन्नेथियो भनी हरेकले अपेक्षा गरेको थियो । तिनको पारिवारिक जीवन सन्तुष्टप्रद नै थियो । तर विश्वासको दृष्टिकोणबाट तिनी अज्ञेयवादी थिए । परमेश्वर हुनुहुन्छ या हुनुहुन्न भनी जान्न सकिँदैन भन्ने अवधारणा अङ्गाल्ने व्यक्तिलाई अज्ञेयवादी भनिन्छ । येशू ख्रीष्टलाई विश्वास गर्नुपर्छ भन्ने सम्बन्धमा कसैले पनि तिनलाई असल कारणहरू पेस नगरेकाले तिनी ख्रीष्टका अनुयायी बनिसकेका थिएनन् । तिनको बुझाइमा तिनलाई परमेश्वरको आवश्यकता थिएन । जीवनका ठुलठुला विषयहरूको साँचो ईश्वरशास्त्रसित नभई विज्ञानसित छ भन्ने तिनको राय रहेको थियो ।

तर एक साँझको कुरो हो । एक जना स्त्रीले जेम्सलाई मण्डलीमा निमन्त्रणा दिइन् । त्यहाँ प्रचार गरिएको प्रवचन तिनलाई याद छ । त्यस साँझ वक्ताले यूहन्ना ४ अध्यायबाट प्रचार गरेका थिए जहाँ येशूले सामरी स्त्रीलाई जीवनको पानी पिउन निमन्त्रणा गर्नुहुन्छ । त्यस अपरिचित पवित्रस्थानमा बसिरहँदा तिनको समझले त्यस परिवेशलाई आफ्नै तरिकाले विश्लेषण गर्दै थियो । वक्ताको निमन्त्रणालाई स्वीकार गरी अगाडि बढ्दा के हुन्थ्यो ? तिनले के गुमाउनेथिए ? तिनले के प्राप्त गर्न सक्थे ? अन्त्यमा तिनी वेदीतर्फ अगाडि बढे । त्यही साँझमा नै जेम्सले येशूलाई ग्रहण नगरे तापनि तिनको यात्रा आरम्भ भइसकेको थियो । तिनले धेरै महिना लगाएर ख्रीष्टियमतको बारेमा अध्ययन गरे । अन्तत: ख्रीष्टियमत साँचो छ भन्ने निष्कर्षमा विश्वस्त हुन पुगे तिनी । तिनले आफ्नो जीवन येशूको चरणमा सुम्पिदिए ।

तार्ससका शाऊलजस्तो सतावटकर्ता र जोन न्युटनजस्तो ईश्वर–निन्दकलाई मात्र परमेश्वरको अनुग्रहको आवश्यकता पर्दैन तर जेम्सजस्ता राम्रा मानिसहरू पनि उही छतमुनि आउनुपर्छ भनी बुझे तिनले ।

आज जेम्स अन्तर्राष्ट्रिय रूपमा परिचित वक्ता बनेका छन् । तिनी अमेरिकाको बायोला विश्वविद्यालयमा ख्रीष्टियान रक्षाशास्त्रसाथै धर्महरूको तुलनात्मक अध्ययनका प्राध्यापक हुन् । क्यालिफोर्निया विश्वविद्यालयबाट विद्यावारिधि गरेका जेम्सका केही पुस्तकहरू पनि प्रकाशित भइसकेका छन् ।

यसरी, अज्ञेयवादबाट ख्रीष्टको चेला बनेका जेम्स  आज वक्ता, प्राध्यापकसाथै लेखक बनेका छन् ।       

Leave Your Comments Here.