चङ्गाइ प्राप्त गरेका भकभके ठिटो विश्वविख्यात प्रचारक बने

उनको पेटमा ६ महिनाको बच्चा थियो जुन बेला उनलाई एक जना शिशुको निम्ति प्रार्थना गर्न बोलाइयो जो त्यस रातसम्म पनि बाँच्दैनथ्यो भनी डाक्टरले भनेका थिए । उनले यसो भनेर प्रार्थना गरिन्, “हे परमेश्वर, म शपथ खान चाहन्छु । आज राति मेरो छिमेकीको बच्चालाई चङ्गाइ गरिदिनुहोस् भनी बिन्ती गर्दछु म । र, जब मेरो बच्चा जन्मन्छ म उसलाई तपाईंको निम्ति अर्पण गर्नेछु ।” एकातिर उनले प्रार्थना गरेको बच्चा बाँच्यो भने अर्कोतिर उनले आफ्नो बच्चालाई जन्म दिइन् ।

तर एउटा समस्या देखा पर्‍यो: उनले जन्माएको बच्चा भकभके बने । अन्य केटाकेटीहरूले ती ठिटालाई जिस्काउँथ्यो र तिनी झगडामा फस्थे । तरै पनि परमेश्वरले तिनलाई निको पार्नुहुन्थ्यो र तिनी भकभक नगरीकनै बोल्न सक्षम हुन्थे भन्ने निश्चयता थियो आमामा । तर ठिटो आफ्नै मातापिताको विरुद्धमा विद्रोही बनेर निस्के । किशोर अवस्थामा तिनी क्षयरोगको सिकार बन्न पुगे र १७ वर्षको उमेरमा झण्डै तिनको ज्यान गएको थियो । तर तिनले चङ्गाइ पाए । तिनी शारीरिक रूपमा मात्र निको भएनन् तिनको बोली पनि ठिक हुन पुग्यो ।

पछि ती किशोरलाई सारा दुनियाँले ओरल रोबर्टसको नाउँले चिन्यो । ख्रीष्टाब्द १९१८ मा अमेरिकामा जन्मेका ओरल ख्रीष्टियान अगुवा, चङ्गाइसम्बन्धी सुसमाचार प्रचारक, लेखक, प्रशिक्षकसाथै टेलिभिजन व्यक्तित्व हुन् । बिसौँ शताब्दीका सुप्रसिद्ध अगुवा ओरल यति प्रभावशाली बने कि सुसमाचार प्रचारको दुनियाँमा बिल्ली ग्राहमपश्चात् तिनको नाउँ आउँछ । ६ ओटा महादेशमा ३०० ओटाभन्दा बेसी क्रुसेडको  सञ्चालन गरेका रोबर्टसले २० लाखभन्दा बेसी मानिसहरूमाथि हात राखेका छन् । धेरै मानिसहरूले तिनलाई चङ्गाइकर्ता भन्थे तर तिनले यसो भन्दै त्यसलाई इन्कार गरे, “मैले होइनँ परमेश्वरले चङ्गाइ गर्नुहुन्छ ।” ओरल रोबर्टस इभान्जलिस्टिक एसोसिएसन र ओरल रोबर्टस युनिभर्सिटीका संस्थापक ओरलले पेन्टिकोस्टलवादलाई मूलधार ख्रीष्टियमतमा ल्याउन मूख्य भूमिका निभाए ।  

     

Leave Your Comments Here.