सर्वश्रेष्ठ सुसमाचार प्रचारक ग्राहमले यसरी येशूलाई अङ्गालेका थिए

तिनलाई बप्तिस्मा दिइएको थियो । तिनी हरेक हप्ता मण्डलीमा जान्थे । तिनको परिवारका सदस्यहरू एकै ठाउँमा भेला भएर बाइबल पढ्ने र प्रार्थना गर्ने गर्थे । तिनी आफ्नो मण्डलीको युवा सङ्गतिका उपाध्यक्ष थिए । तरै पनि तिनी आत्मिक रूपमा मृत थिए । तिनको रुचि अन्तैतिर थियो: तिनी पेसेवार बेसबल खेलाडी बन्न चाहन्थे ।

यो ख्रीष्टाब्द १९३४ सालको कुरो हो जुन बेला तिनी आफ्नो किशोर अवस्थामा थिए । मोर्दकै हाम नाउँ गरेका प्रचारक तिनकै सहरमा प्रचार गर्न आए । त्यो एक दिने प्रवचनको कार्यक्रम थिएन तर ११ हप्ते क्रुसेड थियो । केही हप्ता बितेपछि ती किशोर उक्त क्रुसेडमा उपस्थित हुन उत्सुक भए । तिनको रुचि बढ्दै गयो । प्रचारकद्वारा तोडिएका प्रवचनहरूलाई तिनले मेहनतसाथ टिपोट गर्न थाले । तिनी पापी थिए र तिनले येशू ख्रीष्टलाई राम्ररी चिनेका थिएनन् भन्ने कुरोमा तिनी विश्वस्त हुन लागे । न तिनले लिएको बप्तिस्मा न त मण्डलीमा भएको नियमित उपस्थितिले तिनलाई बचाउँथे भनी तिनले महसुस गर्न लागे ।

हरेक सेवामा प्रचारक हामले मानिसहरूलाई अगाडि आई येशूलाई स्वीकार गर्न निमन्त्रणा दिन्थे । ती किशोरको सोर्‍हौँ जन्मदिनभन्दा ठिक ६ दिनअगि अर्थात् १ नोभेम्बर १९३४ का दिन तिनले निमन्त्रणालाई स्वीकार गरे । त्यस विशेष साँझमा डाक्टर हामले आफ्नो प्रवचन सके अनि येशूलाई स्वीकार गर्न निमन्त्रणा दिए । पापको विरुद्धमा उर्लेपछि वक्ताले स्रोतागणको सामु परमेश्वरको प्रेमलाई झल्काउने वचनलाई पनि व्यक्त गरे, “तर परमेश्वरले हाम्रा निम्ति उहाँको प्रेम यसैमा देखाउनुहुन्छ, कि हामी पापी छँदै ख्रीष्ट हाम्रा निम्ति मर्नुभयो” (रोमी ५:८) । सङ्गीत झुण्डको अगुवाले “जस्तै म छु” (ख्रीष्टीय भजन ३३७) भजनलाई अगुवाइ गरे । त्यसपछि अर्को भजन (विश्वासको लागि झण्डै विश्वस्त पारिएको) गाइयो । दोस्रो भजनको अन्तिम श्लोक गाइरहँदा ती किशोर अगाडि बढे । अगाडि बढ्दै गर्दा तिनका पाउमा सिसाको भारी लादिएको महसुस भएको थियो तिनलाई । त्यस रात तिनले आफ्ना पापको पश्चात्ताप गरे अनि ख्रीष्टलाई आफ्नो ह्दयमा निमन्त्रणा दिए । तिनले शान्तिको महसुस गरे र आफू नयाँ मान्छे भएकोमा निश्चिन्त भए । तिनले नयाँ जन्म पाए । को थिए ती किशोर ? बिल्ली ग्राहम ।

७ नोभेम्बर १९१८ मा अमेरिकामा जन्मेका बिल्ली ग्राहम इतिहासमा सबैभन्दा बेसी मानिसहरूलाई सुसमाचार सुनाउने परमेश्वरका महान् दास हुन् । तिनले जीवनमा दुई अरबभन्दा बेसी मानिसहरूलाई सुसमाचार सुनाएका छन् र तिनको सुसमाचार सुनेर झण्डै ३२ लाख मानिसहरूले येशूलाई व्यक्तिगत प्रभु र मुक्तिदाताको रूपमा स्वीकार गरेका छन् । संसारका १८५ ओटा राष्ट्रका मानिसहरूले तिनको सन्देशलाई सुन्ने मौका पाएका छन् ।

       

Leave Your Comments Here.