आफूमाथि गोली प्रहार गर्नेलाई क्षमा दिए अमेरिकाका पूर्वराष्ट्रपति रेगनले

रोनाल्ड रेगन अमेरिकाका ४० औँ राष्ट्रपति थिए जसले ख्रीष्टाब्द १९८१–१९८९ सम्म शासन गरे । राष्ट्रपतिको पद सम्हालेको ६९ औँ दिन अर्थात् ३० मार्च १९८१ मा तिनको असफल हत्याको प्रयास गरिएको थियो । राजधानीस्थित वासिङ्गटन हिल्टोन होटलबाट बाहिरिने क्रममा जोन हिङ्क्ली जुनिएरले राष्ट्रपति रेगन र अन्य तिन जनामाथि गोली प्रहार गरे ।

राष्ट्रपति रेगनलाई छातिमा गोली लागेको थियो । बन्दुकधारीले प्रहार गरेका ६ ओटा गोलीमध्ये छैटौँ गोली राष्ट्रपतिलाई लागेको थियो । अस्पतालमा पुर्‍याउँदासम्म तिनको अवस्था गम्भीर भए तापनि तिनलाई आकस्मिक कक्षमा भर्ना गरी शल्यक्रिया गरिएकोले तिनी छिट्टै नै निको हुन सफल भए । अप्रिल ११ मा तिनी अस्पतालबाट डिस्चार्ज गरिए । परमेश्वरले नै तिनको जीवन जोगाउनुभएको थियो भनी राष्ट्रपतिले विश्वास गरे किनकि तिनले अझै महान् उद्देश्य पुरा गर्नुथियो । सञ्चार माध्यमहरूद्वारा खबर सार्वजनिक हुनेबित्तिकै मण्डलीहरूमा प्रार्थना सभाहरूको आयोजना गरिए । 

आक्रमणकारी जोन सुस्त मनस्थितिका मानिस भएको पुष्टि भएकोले तिनी दोषी ठहरिएनन् । तिनलाई मानसिक अस्पतालमा भर्ना गरियो ।  

तर यस घटनापश्चात् राष्ट्रपति रेगनको लोकप्रियता बढेर गयो । लोकप्रियता बढ्नुको एउटा कारण यही थियो तिनले आफ्ना शत्रुहरूलाई क्षमा दिन सक्थे । यस घटनाले राष्ट्रपतिकी छोरी प्याटी डेभिसमाथि पनि ठुलो प्रभाव पारेको थियो । उनले आफ्ना पितामा उदाहरणीय जीवन देखेकी थिइन् । प्याटीले पछि व्यक्त गरेकी थिइन्, “हत्या प्रयासको भोलीपल्ट मेरा पिताले भन्नुभयो कि उहाँको शारीरिक चङ्गाइ आक्रमणकारी जोन हिङ्क्लीलाई क्षमा दिने उहाँको क्षमतामा प्रत्यक्ष रूपमा आश्रित थियो । क्षमा नै शारीरिक स्वास्थ्य र चङ्गाइलगायत हरेक कुरोको साँचो हो भन्ने कुरो देखाउनुभएर उहाँले ख्रीष्टको जस्तो सोचाइलाई प्रस्तुत गर्नुभयो ।”  

Leave Your Comments Here.