ओरिगेन: तेस्रो शताब्दीका उल्लेखनीय रक्षाशास्त्री

ओरिगेन आदि मण्डलीका रक्षाशास्त्री, ईश्वरशास्त्री, लेखकसाथै दार्शनिक थिए । तिनी ख्रीष्टाब्द १८५ मा मिश्रको अलेक्ज्यान्ड्रियामा जन्मेका थिए । ख्रीष्टियान परिवारमा जन्मेका ओरिगेनले प्रतिलिपि समालोचना, बाइबलिय भाष्यविज्ञान, प्रवचन आदि ईश्वरशास्त्रका विभिन्न हाँगाहरूमा कलम चलाएका थिए ।

विश्वासमा कट्टर आफ्ना पिता लिओनिदेसले सतावटमा परी सहादत पाएपछि तिनको परिवार गरिबीको चपेटामा मुछियो । अलेक्ज्यान्ड्रियाका बिशप डेमेत्रिएस कामको खोजीमा भौतारिएका जवान ओरिगेनबाट औधी प्रभावित भए र तिनले बप्तिस्माको बारेमा सिकाउनुपर्ने जिम्मेवारी दिए ओरिगेनलाई । तिनी विश्वासमा बढ्दै गए र थप अध्ययनको लागि रोमतर्फ लागे । सिकाउने नयाँ उत्साह बोकेर फर्केका ओरिगेनले आफूलाई धर्मशास्त्रको व्याख्याको लागि हिब्रू भाषाको अध्ययनमा समर्पित गरे ।      

     

मनग्गे पुस्तकहरूका लेखक ओरिगेनको हेक्साप्ला प्रतिलिपि समालोचनमा सर्वाधिक महत्त्वपूर्ण कृति थियो । २८ वर्ष लगाएर लेखिएको यो कृति पुरानो करारको विभिन्न अनुवादहरूको तुलनात्मक अध्ययन थियो । अभाग्यवश: ख्रीष्टियान साहित्यमा तिनको यस अद्वितीय पुस्तकको कुनै प्रति अस्तित्वमा छैन । रक्षाशास्त्रको निम्ति टेवा दिने यो पुस्तक सातौँ शताब्दीमा मुस्लिमहरूद्वारा नष्ट पारिएको थियो । तिनले रक्षाशास्त्रसम्बन्धी सेल्ससको विरुद्धमा नामक कृति पनि लेखे जुन दार्शनिक सेल्ससले ख्रीष्टियमतको विरुद्धमा उठाएका दार्शनिक, नैतिकसाथै ऐतिहासिक आलोचनाहरूको उत्तर थियो । यसका अतिरिक्त तिनले प्रथम सिद्धान्तहरूबारे नामक मुख्य ईश्वरशास्त्रीय रचना पनि लेखेका थिए ।

ओरिगेन ख्रीष्टियान रक्षाशास्त्रीहरूका निम्ति मिश्रित आशिष्को रूपमा देखा पर्छन् । तिनी २५४ मा प्रभुमा सुतेका थिए ।

Leave Your Comments Here.