आफ्नै चुनौतीलाई फिर्ता लिने नास्तिकवादी चाल्र्स

चाल्र्स ब्राडलाफ उन्नाइसौँ शताब्दीका निकै प्रसिद्ध ब्रिटिस नास्तिक थिए । प्राइस हुगेस नाउँका प्रखर ख्रीष्टियान वक्ता पनि उही देशमा प्रभुको सेवा गर्दै थिए । हुगेसको मिसनद्वारा भएका अनुग्रहका आश्चर्यपूर्ण कामहरूबारे पुरै लन्डन (बेलायतको राजधानी) सचेत थियो ।

ख्रीष्टियमतका दाबीहरूको प्रामाणिकताबारे वादविवाद गर्न नास्तिकवादी चाल्र्सले ख्रीष्टियान सेवक हुगेसलाई चुनौती दिए । लन्डनले यसलाई अत्यधिक चासोका साथ हेरिरहेको थियो । हुगेसले उक्त हाँकलाई तुरुन्तै स्वीकार गरे र तिनले एउटा सर्त पनि अगि तेर्साए ।

हुगेसले भने, “म एउटा प्रस्ताव राख्न चाहन्छु । हामी दुवैले यस्ता पुरुष र स्त्रीहरूलाई ल्याऔँ जो हाम्रो शिक्षाको प्रभावमा परेका छन् । हामीले सिकाएको शिक्षाले पापको जीवनबाट तिनीहरू मुक्त भएका होऊन् । म यस्ता १०० जना पुरुष र स्त्रीहरूलाई ल्याउन सक्छु र तपाईंले पनि त्यसै गर्नुस् भनी म तपाईंलाई चुनौती दिन्छु ।

“यदि तपाईंले १०० जना त्यस्ता मानिसहरूलाई ल्याउन सक्नुहुन्न भने तपाईंको शिक्षाबाट परिवर्तन भएका ५० जना त्यस्ता मानिसहरूलाई ल्याउनुभयो भने पनि म सन्तुष्ट हुन्छु । यदि ५० जना पनि ल्याउन सक्नुहुन्न भने २० जना ल्याउनुस् जसले तपाईंको नास्तिकवादी शिक्षाको परिणाम स्वरूप जीवनमा आनन्दको महसुस गरेका होऊन् । यदि २० जना पनि ल्याउन सक्नुहुन्न भने १० जना मात्र ल्याउनुभए पनि हुन्छ ।

“तपाईं त्यति पनि ल्याउन सक्नुहुन्न भने म तपाईंलाई चुनौती दिन्छु कि जम्मा एक जना ल्याउनुस् जसले तपाईंको नास्तिकवादी शिक्षाको कारणले उसको जीवनमा सुधार आएको होस् ।”

लन्डन पुन: उत्तेजित भएको थियो के होला भन्ने उत्सुकतासाथ । ब्राडलाफले के गरे त ? ज्यादै निराशपूर्ण भएर तिनले वादविवादको चुनौतीलाई सार्वजनिक रूपमा फिर्ता लिए ।

जीवनमा रूपान्तरण ल्याउन नसक्ने नास्तिकवादको लागि के यो लज्जास्पद हार होइन र ?  

Leave Your Comments Here.