बारम्बार आत्महत्या गर्ने प्रयास गरेका कुपरलाई बाइबलले परिवर्तन गर्‍यो

३२ वर्षको उमेरमा विलियम कुपरले आफ्नो जीवनमा ठुलो सङ्कष्टमय परिस्थितिको सामना गर्नुपर्‍यो । अफिमबाट निर्मित औषधि पिएर तिनले आत्महत्या गर्ने कोसिस गरे । तर मरेनन् । त्यसपछि तिनले घोडाले तान्ने वाहन भाडामा लिए र चालकलाई थेम्स नदीको पुलमाथि निर्मित साँघुमा लैजाने आज्ञा दिए । त्यहाँबाट हाम्फालेर आत्महत्या गर्ने मनसाय थियो कुपरको । त्यसबेला लन्डनमा बेसरी कुइरो लागेको थियो । तिनीहरूले आफ्नो यात्रालाई एक घण्टासम्म जारी राखे तापनि छनौट गरिएको स्थल आइपुगेन । दिक्क मानेर कुपर ओर्लन खोज्दा तिनी छक्क परे किनकि कुइरोको कारणले तिनीहरूले उही ठाउँमा पो चक्कर लगाइरहेका रहेछन् ! र, अन्त्यमा तिनी आफ्नै घरको ढोकाको सङ्घारमा देखा परे ।

भोलीपल्ट बिहान चक्कुले आत्महत्या गर्ने प्रयत्न गरे । फेरि पनि बाँचे । आफैलाई झुण्ड्याएर यस धरतीबाट बिदा हुन खोजे तर बेहोस मात्र भए । पटक–पटक आत्महत्या गर्न खोज्दा पनि तिनी सफल भएनन् ।

एक बिहानको कुरो हो । तिनी प्रसन्न मुद्रामा हुँदा तिनले बाइबल हातमा लिई पावलले रोमीहरूलाई लेखेको पत्रको एउटा पद पढे, “परमेश्वरले ख्रीष्टलाई उहाँको रगतद्वारा प्रायश्चितको बलिदान स्वरूप प्रस्तुत गर्नुभयो, जुन प्रायश्चित विश्वासद्वारा ग्रहण गर्नुपर्दछ । यो काम परमेश्वरले आफ्नो धार्मिकता देखाउनलाई गर्नुभयो, किनभने उहाँको ईश्वरीय धैर्यमा अगाडिका पापहरूलाई उहाँले वास्ता गर्नुभएको थिएन” (रोमी ३:२५) । तत्कालै विश्वास गर्ने शक्ति प्राप्त गरे कुपरले । परमेश्वरको क्षमा दिन सक्ने शक्तिमा हर्षित भए तिनी । तिनले आफ्नो जीवन येशूको पाउमा सुम्पे ।

पछि तिनी अठारौँ शताब्दीको निकै लोकप्रिय भजन लेखक कहलाइए । बारम्बार असफल हात्महत्या गर्ने चेष्टा गरेका कुपर बाइबलिय खण्डको परिणामस्वरूप सामान्य विश्वासीको रूपमा मात्र बाँचेनन्, तर लोकप्रिय भजन लेखक पनि बने ।    

  

Leave Your Comments Here.