अदोनिरामको स्वर्गीय बोलावट

अदोनिराम जडसन कलेज र सेमिनारीबाट दीक्षान्तित भएपछि तिनले बोस्टनको एउटा प्रचलित मण्डलीबाट सहयोगी पास्टरको भूमिकामा रहेर सेवा गर्ने निमन्त्रणा पाए । हरेकले तिनलाई बधाइ दियो । तिनकी आमा र आफन्तहरू खुसीले गद्गद् भए किनकि आफ्नै ठाउँमा बसेर तिनले परमेश्वरको सेवा गर्ने मौका पाएका थिए । तर जडसनले टाउको हल्लाउँदै भने, “मेरो काम यहाँ होइन । परमेश्वरले मलाई समुद्रपारि डाक्दै हुनुहुन्छ । यहाँ बसेर परमेश्वरको सेवा गर्नु भनेको केवल आंशिक आज्ञापालन हो । म त्यसमा खुसी हुन सक्दिनँ ।”

जीवनमा तिनले निकै सङ्घर्ष गर्नु परे तापनि स्वर्गीय बोलावटप्रति आज्ञाकारी हुन तिनले आफ्नी आमा र आफन्तहरूलाई छाडेर तिनी पत्नीसँगै बर्मा गए ।

अदोनिरामले बर्मामा आफ्नो मिसन थालनी गर्दा तिनको लक्ष्य थियो बर्मेली भाषामा बाइबल अनुवाद गर्ने र सय जना विश्वासी भएको एउटा मण्डली खडा गर्ने । तिनको मृत्यु हुँदासम्म तिनले बाइबल अनुवादलाई पुरा गरिसकेका थिए; सय ओटा मण्डली स्थापना गरिसकेका थिए जसमा ८,००० विश्वासी थिए ।

अपरेसन वल्र्ड २०१० को तथ्याङ्कअनुसार अहिले बर्मामा २६ ओटा भाषामा पुरै बाइबल, १५ ओटामा नयाँ करार र २४ ओटा भाषामा बाइबलका अंशहरू उपलब्ध छन् । यहाँ बौद्ध धर्मावलम्बीहरूको बाहुल्यता छ । विकिपिडियाअनुसार झन्डै ६% अर्थात् ३० लाख ख्रीष्टियान विभिन्न झुन्डमा रही सेवा–कार्य गर्छन् ।

    

Leave Your Comments Here.