जोनाथन एडवार्डस: अठारौँ शताब्दीका प्रखर वक्ता

जोनाथन एडवार्डस वक्ता, पास्टर, दार्शनिक, ईश्वरशास्त्रीसाथै लेखक थिए । धेरैले तिनलाई अमेरिकाकै सर्वाधिक महत्त्वपूर्ण ईश्वरशास्त्रीको रूपमा आदर गर्छन् । पहिलो महान् जागृतिमा तिनले उल्लेखनीय भूमिका निभाए ।

५ अक्टोबर १७०३ मा जोनाथन एडवार्डसको जन्म अमेरिकामा भएको थियो । बुबा तिमोथी एडवार्डस र आमा एस्तर स्टडार्डबाट जन्मेका ११ जना सन्तानमध्ये तिनी एक मात्र छोरा थिए । पिता तिमोथी आदरणीय शिक्षकसाथै प्रचारक थिए भने आमा एस्तर शिक्षित स्त्री थिइन् । छोरो एडवार्डसमा बुबा आमाको सकारात्मक प्रभाव परेको थियो ।  

ख्रीष्टाब्द १७१६ मा एडवार्डस याले कलेजमा भर्ना भए जुन बेला तिनी १३ वर्ष पनि पुगेका थिएनन् । १७२० मा तिनी उत्कृष्ट विद्यार्थीको रूपमा दीक्षान्तित भए । त्यसपछि तिनले ईश्वरशास्त्रको अध्ययन गरे । तिनले केही समय प्रचारकको रूपमा रही सेवा गरे ।

ख्रीष्टाब्द १७२७ मा एडवार्डस सारा पिरपोन्टसित वैवाहिक सम्बन्धमा बाँधिए र तिनीहरूबाट तिन छोरा र आठ छोरी गरी ११ जना सन्तान जन्मिए ।

ससुरा सोलोमनको मृत्यु भएपछि मण्डलीलाई सम्हाल्ने जिम्मा एडवार्डसको काँधमा आयो । तिनी नर्थहयाम्टन मण्डलीको पूर्ण पास्टर बने । यही मण्डलीबाट तिनका जागृतिसम्बन्धी वचनहरूको आरम्भ भएका थिए ।

सायद महान् जागृतिमा एडवार्डसले सबैभन्दा उल्लेखनीय योगदान पुर्‍याएका छन् । तिनको मण्डलीमा थालनी भएको जागृति चाँडै नै जताततै फैलियो । एडावर्डस र तिनका सङ्गी प्रचारक जर्ज ह्वाइटफिल्डले प्रचार गर्न र मानिसहरूलाई प्रभुमा जित्न विभिन्न ठाउँको यात्रा गरे । यो एउटा यस्तो जागृति थियो जुन इतिहासमा देखिएको थिएन न त अरू देशमा नै देखा परेको थियो । कैयौँ मानिसहरूले आफ्ना पापको पश्चात्ताप गर्नुका अतिरिक्त प्रभु येशूलाई चिने मौका पाएका थिए ।

ख्रीष्टाब्द १७४१ मा तिनले “क्रूद्ध परमेश्वरका हातमा पापीहरू” नामक शीर्षकमा प्रवचन लेखे । यो एउटा शक्तिशाली वचन थियो । एडवार्डस मनग्गे कृतिहरूका लागि परिचित छन् । मिसनरी डेभिड ब्रेनार्डको विषय लेखिएको तिनको कृतिले हजारौँ मानिसहरूलाई मिसनरी हुने प्रेरणा मिलेको थियो ।     

जीवनको अन्तिम घडीतिर एडवार्डस कलेज अफ न्यु जेरेसी (हाल प्रिन्सेटोन) को कलेज प्रमुख बने । तर त्यसको केही समयपछि २२ मार्च १७५८ मा ५४ वर्षको उमेरमा तिनको निधन भयो ।   

Leave Your Comments Here.