सी. टी. स्टड: चीन, भारत र अफ्रिकाका लागि मिसनरी

सी. टी. स्टडको पुरा नाउँ चाल्र्स थोमास स्टड हो । स्टडको जन्म २ डिसेम्बर १८६० मा इङ्गल्यान्डमा भएको थियो ।

सी. टी. स्टड क्रिकेटरसाथै मिसनरी थिए । तिनले चीन, भारत र अफ्रिकामा मुक्तिदाता प्रभु येशूको सेवा गरे । स्टडले केही कृतिहरू पनि लेखेका छन् । हर्ट अफ अफ्रिका मिसन (अहिले यसलाई वल्र्डवाइड इभान्जलाइजेसन क्रुसेड भनेर चिनिन्छ) को स्थापनको लागि स्टड नै जिम्मेवार छन् ।  

सुसमाचार सुनेपछि स्टडका धनी पिता एडवार्ड स्टडले प्रभु येशूलाई अङ्गाले र आफ्ना छोराहरूले पनि प्रभुलाई पाऊन् भन्ने तिनको इच्छा थियो ।

१६ वर्षको उमेरमा सी. टी. स्टड उत्कृष्ट खेलाडी बनिसकेका थिए भने १९ वर्षकै उमेरमा तिनी एटोन कलेजको टिम कप्तान बने । तिनी एटोन कलेजकै विद्यार्थी छँदा तिनको घरमा आएका एक जना प्रचारकको प्रस्तुतिद्वारा प्रभावित भई तिनले आफ्नो जीवन प्रभु येशुमा सुम्पेका थिए । यस क्षणलाई स्टडले पछि यसरी सम्झेका थिए, “मैले घुँडा टेकेँ अनि परमेश्वरलाई ‘धन्यवाद’ भनेँ । त्यहीँनेर मैले आनन्द र शान्तिको महसुस गरेँ । त्यसपछि ‘नयाँ जन्म’ भनेको के रहेछ भनी मैले थाहा पाएँ । र पहिले जुन बाइबल मेरो लागि सुक्खा हुन्थ्यो त्यही नै मेरो सब थोक भयो ।”

क्रिकेटको दुनियाँमा प्रसिद्धीको पराकाष्ठामा पुगिरहँदा स्टडले भने, “मलाई थाहा छ कि क्रिकेट रहिरहँदैन र ख्याति रहिरहँदैन र संसारमा भएको कुनै पनि कुरो रहिरहँदैन तर आउने संसारको लागि जिउनु नै उपयुक्त हुन्थ्यो ।” 

परमेश्वरले स्टडलाई आफ्नै कामको लागि तयार पार्नुभएको थियो । ख्रीष्टाब्द १८८५ मा तिनी अन्य ६ जना साथीहरूसँगै चीन प्रस्थान गरे, त्यहाँका मानिसहरूलाई प्रभु येशूको शुभ सन्देश बाँड्न ।

पिताको मृत्युपश्चात् तिनले प्राप्त गरेका पैतृक सम्पत्तिको ठुलो हिस्सा तिनले प्रभुको कामको लागि अर्पण गरे ।

ख्रीष्टाब्द १८८८ मा चीनमा नै स्टडले प्रिस्किला स्टेवार्टसित बिहे गरे । र तिनीहरूले चार छोरी र दुई छोरालाई जन्म दिए । 

आफ्नो कमजोर स्वास्थ्याको कारण स्टड जन्मभूमि इङ्गल्यान्ड फर्के । मिसनको लागि पैसा उठाउन स्टड र तिनकी पत्नी विभिन्न भूभागमा गए । यात्रा गर्ने क्रममा भारतको दक्षिणी क्षेत्रको जलवायु उपयुक्त लागेकोले तिनले त्यहाँ ६ वर्ष बिताए । त्यसपछि तिनी फेरि इङ्गल्यान्ड फर्के, अफ्रिका जाने तयारीको चाँजोबाँजो मिलाउन । ख्रीष्टाब्द १९१० मा तिनी अफ्रिका प्रस्थान गरे ।

प्रभुको राज्य बिस्तार गरिरहँदा १६ जुलाई १९३१ मा ७० वर्षको उमेरमा अफ्रिकामा नै स्टडको निधन भयो । यसरी तिनले चीनमा लगभग १५ वर्ष बिताए भने ६ वर्ष भारतमा बिताए र जीवनका पछिल्ला वर्षहरू भने तिनले अफ्रिकामा बिताए ।

आफ्नो त्यागको गणना नगरी येशू ख्रीष्टलाई पयाउनु भनेको के हो भनी स्टडले देखाइदिए । तिनी क्रूसका सच्चा सिपाही थिए जो ख्रीष्टको खातिर खतरा मोल्न तत्पर भए ।  

  

Leave Your Comments Here.