बिल्ली ग्राहम: सर्वश्रेष्ठ प्रचारक

इतिहासमा सबैभन्दा बेसी मानिसहरूलाई सुसमाचार सुनाउने व्यक्ति हुन्, बिल्ली ग्राहम । तिनले जीवनमा दुई अरबभन्दा बढी मानिसहरूलाई सुसमाचार सुनाए र तिनको सुसमाचार सुनेर झन्डै ३२ लाख मानिसहरूले येशूलाई व्यक्तिगत प्रभु र मुक्तिदाताको रूपमा स्वीकार गरे । संसारका १८५ ओटा राष्ट्रका मानिसहरूले तिनको जीवन परिवर्तन गर्ने सन्देशलाई सुन्ने मौका पाएका छन् । ग्यालप संस्थाले सञ्चालन गर्ने सर्वाधिक प्रशंसित पुरुष र स्त्रीको सूचीमा ग्राहम ख्रीष्टाब्द १९५५ देखि ५५ पटक देखा पर्न सफल भएका छन्, संसारको कुनै पनि व्यक्तिभन्दा बेसी । ग्राहम अमेरिकाका थुप्रै राष्ट्रपतिहरूका आत्मिक सल्लाहकार थिए । खास गरी डी. डेभिड आइजनहावर, लिन्डोन बी. जोनसन र रिचार्ड एम. निक्सोनका घनिष्ठ थिए ग्राहम ।

७ नोभेम्बर १९१८ मा अमेरिकाको उत्तरी क्यारोलिनामा बुबा विलियम र आमा मर्रोबाट बिल्ली ग्राहमको जन्म भएको थियो । परिवारमा जेष्ठ ग्राहमका दुई बहिनी र एक भाइ थिए । बुबाले तिनलाई कृषक बनाउन खोजे तापनि तिनी आमाको प्रभावमा परे जसले तिनलाई हरेक दिन बाइबलको पद कण्ठस्थ गर्न जोड दिन्थिन् ।

क्रुसेड र आत्मिक सभाका लागि चर्चित बिल्ली ग्राहमले १६ वर्षको किशोर अवस्थामा येशूलाई ग्रहण गरे । जागृति सभामा प्रचारक मोर्दक्कै हामद्वारा तोडिएको प्रवचनलाई सुनेर ग्राहमले आफ्नो जीवन प्रभुको निम्ति अर्पण गरेका थिए । सेवा–कार्यको निम्ति आफैलाई तयार पार्न पछि तिनी फ्लोरिडा बाइबल इन्स्टिच्युट र ह्विटन कलेजमा भर्ना भए ।

आफ्नो सेवा–कार्यको आरम्भमा व्यक्त गरेको कथनप्रति तिनी जीवनभरि नै बफादर रहे, “ममा एउटै जोश थियो र त्यो हो आत्माहरू जित्नु ।” आफ्नो सेवाको पाललाई तन्काउन १९५० मा तिनले तिनले बिल्ली ग्राहम इभान्जलिस्टिक एसोसिएसनको स्थापना गरे जुन संस्थाले मिडियामार्फत तिनको सन्देशलाई संसारको कुना–कुनामा पुर्‍याउन महत्त्वपूर्ण भूमिका निभाएको छ ।  १३ अगस्त १९४३ मा बिल्ली ग्राहमको बिहे रूथ बेलसित भयो जसबाट पाँच जना सन्तान जन्मे ।

१९५९ बाट प्रचारको लागि तिनी विभिन्न देशमा यात्रा गर्न निस्के । तिनी अस्ट्रेलिया, न्युजिल्यान्ड, अफ्रिका, जापान, भारत, सिङ्गापुर, ब्राजिलसाथै मध्यपूर्वका मुलुकहरूसम्म आए । तर साम्यवादी मुलुकमा भने तिनी पहिलो पटक १९६६ मा युगोस्लाभिया पुगे । १९९१ मा साम्यवादको पतनसँगै त्यसको अनुगामी वर्षमा रुसको राजधानी मस्कोको ओलम्पिक रङ्गशालामा पचास हजार दर्शकहरूका माझ प्रचार गर्ने ढोका खोलिएको थियो ग्राहमलाई । 

१९७४ मा लाउसेन अभियानको लागि जोन स्टटसँग सहकार्य गरेर उल्लेखनीय भूमिका निर्वाह गरेका ग्राहमले जीवनमा मनग्गे इनामहरू प्राप्त गरेका छन् । अमेरिकी भूतपूर्व राष्ट्रपति जर्ज बुसले तिनलाई “अमेरिकाका पास्टर” भनेका थिए । ग्राहमका पुस्तकहरू लाखौँको सङ्ख्यामा बिक्री वितरण गरिएका छन् ।

प्रचारका महानायक ग्राहमको सत्यनिष्ठाको कारणले तिनको आत्मिक मार्गदर्शनलाई पछ्याउन लाखौँलाई उत्साह मिलेको छ । मार्टिन लुथर किङ्ग, बोनो, मोहम्मद अलीसाथै अमेरिकी राष्ट्रपति आइजनहावरदेखि बुससम्मका मानिसहरू ग्राहमबाट प्रेरित थिए । तिनी इमान्दार, निर्दोष र हसाउने प्रवृत्तिका छन् ।

Leave Your Comments Here.