नास्तिकको प्रश्न ख्रीष्टियानको उत्तर

नास्तिक: परमेश्वर हुनुहुन्छ भन्नाका लागि तपाईंसँग कुनै साक्षी छ ?

ख्रीष्टियान: के यो विश्वको अस्तित्वले नै परमेश्वर हुनुहुन्छ भनेर देखाउँदैन र ?

नास्तिक: कसरी ?

ख्रीष्टियान: विश्व अस्तित्वमा छ भन्ने तथ्यमा के हामी सहमत हुन सक्छौँ ?

नास्तिक: यसमा कुनै शङ्का छैन ।

ख्रीष्टियान: यो विश्व कसरी यहाँ आएको होला ? दार्शनिकसाथै चिन्तकहरूले यसको लागि तिन ओटा विकल्प अगि सारेका छन्:

क. यो सधैँ यहीँ नै छ । यसको सुरु पनि छैन र अन्त्य पनि छैन । (यो साँचो हो भने यसको लागि कुनै सृष्टिकर्ताको खाँचो पर्दैन) ।

ख.  आफै यसको उत्पत्ति भयो । (यो साँचो हो भने पनि यसको लागि कुनै रचनाकारको खाँचो पर्दैन) ।

ग. यसलाई सृष्टि गरियो ।

विश्व अनन्त छ भन्ने पहिलो विकल्पलाई वैज्ञानिक समुदायले पूर्णत: इन्कार गरिसकेको छ । किन थाहा छ ? आइन्स्टाइनको सामान्य सापेक्षतावाद, विश्वको फैलावट, थर्मोडाइनामिक्सको दोस्रो नियमसाथै महाविस्फोटको विकिरणजस्ता वैज्ञानिक साक्षीहरूले तिनीहरूलाई यस्तो निष्कर्षमा पुर्‍याएका छन् कि एउटा निश्चित बिन्दुमा यो सारा विश्वको आरम्भ भएको थियो । विश्व आफै उत्पत्ति भयो भन्ने दोस्रो विकल्प दार्शनिक दृष्टिकोणबाट असम्भव छ । शून्यताबाट कुनै पनि कुरो कहिल्यै आफै उत्पन्न हुन सक्दैन । शून्यताले देख्न, सुँघ्न, सोच्न र कुनै कुरोलाई अस्तित्वमा ल्याउन सक्दैन । तसर्थ, वैज्ञानिक साक्षी र दार्शनिक दृष्टिकोणबाट पहिलो र दोस्रो विकल्पलाई मिल्काइनुपर्छ । यो विश्व कुनै बुद्धिमानी सृष्टिकर्ताद्वारा रचना गरियो भन्ने तेस्रो विकल्प तर्क र साक्षी दुवैको आधारमा जायज देखिन्छ ।

नास्तिक: तपाईंले भन्नुभएको कुरो मैले बुझ्दै छु । तर मैले देख्न नसक्ने परमेश्वरमाथि विश्वास गर्न भने मलाई सजिलो छैन ।

ख्रीष्टियान: तपाईंको सङ्घर्षलाई म बुझ्दछु । म विश्वासी हुनुभन्दा अगाडि मैले पनि उही कठिनाइ झेलेको थिएँ । म तपाईंलाई बुझाउने कोसिस गर्छु है त ।

नास्तिक: अगाडि बढ्नुस् ।

ख्रीष्टियान: कल्पना गर्नुस् कि तपाईंको हातमा एउटा राम्रो चित्र छ । त्यो चित्रलाई हेरिसकेपछि चित्रकार हुनुहुन्छ भनेर पुष्टि गर्नको लागि तपाईंलाई अर्को कुन साक्षीको दरकार पर्छ र ? के त्यो चित्र आफै नै प्रमाण होइन र ? तपाईंले जीवनभरि नै चित्रकारलाई नदेखे तापनि चित्रको वास्तविकताले नै चित्रकार छ भनेर पुष्टि गर्दैन र ? चित्रकार नहुँदो हो त तपाईंले चित्रलाई देख्न सक्नुहुन्थेन । तसर्थ, विश्वको अस्तित्व नै सृष्टिकर्ताको लागि मन छुने साक्षी हो ।

नास्तिक: तर विश्वको अस्तित्वको लागि सृष्टिकर्ताको आवश्यक पर्छ भने परमेश्वरको अस्तित्वको लागि सृष्टिकर्ताको आवश्यकता किन पर्दैन ? अर्को भाषामा भन्नुपर्दा, परमेश्वरलाई चाहिँ कसले बनायो नि ?

ख्रीष्टियान: उहाँलाई कसैले पनि बनाएन । छक्क नपर्नुस् । यो सीमित विश्व हो जसको लागि सृष्टिकर्ताको दरकार पर्छ । तर परमेश्वरको लागि कुनै रचनाकारको खाँचो पर्दैन ।

नास्तिक: किन र ?

ख्रीष्टियान: किनकि उहाँ अनन्त हुनुहुन्छ । कोही सधैँ अस्तित्वमा छ भने उसको अस्तित्वको लागि सृष्टिकर्ता चाहिँदैन ।

नास्तिक: तपाईं भन्दै हुनुहुन्छ कि परमेश्वर सधैँ अस्तित्वमा रहिरहनुभएको छ ।

ख्रीष्टियान: हो, मेरो भनाइको अर्थ यही हो ।

नास्तिक: असम्भव !

ख्रीष्टियान: परमेश्वर अनन्त हुनुहुन्छ भन्ने विचारलाई खिल्ली उडाउनुअगि यो कुरोलाई मनमा राख्नुस्: केही न केही कुरो त सधैँ अस्तित्वमा रहेकै हुनुपर्छ । होइन र ?

नास्तिक: कसरी ?

ख्रीष्टियान: यदि शून्यताबाट कुनै कुरो अस्तित्वमा आउन सक्दैन र अहिले विश्व अस्तित्वमा छ भने केही न केही कुरो त अनन्त हुनैपर्छ । कि कसो ?

नास्तिक: त्यसो भए कसले बनायो परमेश्वरलाई ?

ख्रीष्टियान: कसैले पनि होइन । उहाँ अनन्त हुनुभएकोले उहाँलाई कसैले बनाउनु पर्दैन । विश्व अनन्त छैन त्यसैले यसलाई कसैले बनाएकै हुनुपर्छ ।

(नोट: http://www.alwaysbeready.com/answers-to-questions बाट अनूदितसाथै सम्पादित अंश हो यो ।)

Leave Your Comments Here.