स्तिफनसको भनाइअनुसार आफ्ना बुबाको मृत्युपश्चात् अब्राहामले हारान छाडे (प्रेरित ७:४) । तर मोशाको विवरणलाई होसियारीपूर्वक नियाल्दा प्रस्ट भएको जस्तो देखिन्छ कि अब्राहामले हारान छाड्दा तिनका बुबा जीवितै थिए । यो सुस्पष्ट विरोधाभासको व्याख्या के होला ?

मण्डलीका प्रथम सहिद स्तिफनसको भनाइलाई प्रेरितको पुस्तकका लेखक डा. लूका यसरी अभिलिखित गर्छन्, “तब तिनी [अब्राहाम] कल्दीहरूको देशबाट निस्केर हारानमा आएर बसे, र तिनका पिताको मृत्यु भएपछि परमेश्वरले तिनलाई त्यहाँबाट यस मुलुकमा सार्नुभयो, जहाँ अहिले तपाईंहरू वास गर्नुहुन्छ” (प्रेरित ७:४) । उत्पत्ति ११:२६ अनुसार तेरह सत्तरी वर्ष पुग्दा तिनी अब्राम [पछि अब्राहाम], नाहोर र हारानका पिता बने । उत्पत्ति ११:३२ बमोजिम २०५ वर्षको उमेरमा तेरह हारानमा मरे । अब्राहाम हारानबाट निस्केर जाँदा तिनी ७५ वर्ष पुगेका थिए (१२:४) । तसर्थ, अब्राहाम हारानबाट निस्केर जाँदा तिनका पिता तेरह १४५ वर्ष भएको हुनुपर्छ । तर तिनी त २०५ वर्षको उमेरमा मरे । तपाईंले यी अङ्कहरूलाई जोड/घटाउ गरेर हेर्नुभयो भने प्रस्टै हुन्छ कि अब्राहाम हारानबाट प्रस्थान गर्दा तिनका पिता जीवितै देखिन्छन् । तब स्तिफनसको भनाइ कसरी सही हुन सक्छ त ? यस कठिनाइको लागि अनेक समाधानहरू अगि सारिएका छन् ।

१. स्तिफनसले भाषणमा गल्ती गरे ।

यस अवधारणाका समर्थकहरूको भनाइअनुसार स्तिफनसले भाषणमा भुल गरे र तिनको भुललाई पवित्र आत्माद्वारा प्रेरणा पाएर लेखेका डा. लूकाले जस्ताको तस्तै लेखे । तसर्थ, बाइबल ठिक छ तर स्तिफनस गलत छन् । तर विश्वासले भरिपूर्ण भएका स्तिफनसले गल्ती गरे भन्ने अवधारणा बिलकुल तर्कसङ्गत देखिँदैन । पवित्र आत्माले भरिपूर्ण स्तिफनसको मोहडा स्वर्गदूतको मोहडाजस्तै देखिएको थियो । आत्माले भरिपूर्ण वक्ताले यहाँ गल्ती गरे भने तिनका अन्य वचनहरू सही छन् भनेर कसरी विश्वास गर्न सकिन्छ ? त्यसकारण यो समाधान सजिलो भए तापनि जायज छैन ।

२. स्तिफनसले तेरहको शारीरिक मृत्युलाई नभएर आत्मिक मृत्युलाई सङ्केत गरेका छन् ।

यसलाई अङ्गाल्नेहरूको व्याख्याअनुसार स्तिफनसले यहाँ यहूदी परम्परालाई अपनाएका छन् । यहूदी परम्पराअनुसार तेरहको आत्मिक मृत्यु (पछि तिनी मूर्तिपूजामा नै फर्कियो भन्ने विचार) पश्चात् अब्राहामले हारान छाडे । यस रायमुताबिक स्तिफनसद्वारा उल्लिखित मृत्यु (ग्रिकमा अपोथानेइन) शब्दले आत्मिक मृत्युलाई अङ्कित गर्नैपर्छ । तर सन्दर्भअनुसार यो व्याख्या मुनासिब देखिँदैन ।

३. तिन जना दाजु–भाइमध्ये अब्राहाम सबैभन्दा कान्छा थिए ।

उत्पत्ति ११:२६ ले बताउँछ कि तेरह सत्तरी वर्ष पुग्दा तिनी अब्राम [पछि अब्राहाम], नाहोर र हारानका पिता बने । तर यो भनाइको अर्थ यही मात्र हुन सक्छ कि त्यो उमेरमा तेरहले आफ्नो पहिलो छोरो जन्माए । साधारणतया छोराहरूको नाउँको सूचीमा पहिलो उल्लिखित जेष्ठ हुने भए तापनि त्यसको अपवाद छ भनेर हामीले बुझ्नु आवश्यक छ । अब्राहाम जेठा छोरा भएकाले तिनको नाउँ अगि राखिएको होइन तर तिनी तिन जना दाजु–भाइमध्ये सर्वाधिक महत्त्वपूर्ण भएकाले । यसको अर्थ तेरहले अब्राहामलाई जन्माउँदा तिनी १३० वर्ष पुगेको हुनुपर्छ । 

तेस्रो रायमा केही गौण कठिनाइहरू भए तापनि यो नै सर्वाधिक विश्वसनीय व्याख्या देखिन्छ र यसलाई नै व्यापक रूपमा स्वीकार गरिएको छ ।

Leave Your Comments Here.