प्रेरित ७:१६ ले बताउँछ कि शकेममा हमोरका छोराहरूबाट अब्राहामले चिहान किने जब कि पुरानो करारको विवरण (उत्पत्ति ३३:१८–१९; यहोशू २४:३२) अनुसार उक्त चिहान याकूबले किने । वास्तवमा चिहान कसले किने— अब्राहाम कि याकूब ?

स्तिफनसले आफ्नो भाषणमा भने,  “याकूब मिश्रदेशमा गए, र त्यहीँ उनको देहान्त भयो, र हाम्रा पुर्खाहरूको पनि त्यहीँ नै देहान्त भयो । त्यसपछि तिनीहरूका मृत शरीर शकेममा लगे, र अब्राहामले शकेममा हमोरका छोराहरूबाट दाम तिरेर किनेको चिहानमा राखे” (प्रेरित ७:१५–१६) ।  तर मोशा यसरी अभिलेख गर्छन्, “आफू [याकूब] ले पाल टाँगेको जग्गा शकेमका बाबु हमोरका छोराहरूबाट तिन [याकूब] ले एक सय चाँदीका टुक्रा दाम हालेर किने” (उत्पत्ति ३३:१९) । यहोशूको विवरणअनुसार पनि उक्त चिहान याकूबले नै किने (यहोशू २४:३२) । तब स्वाभाविक प्रश्न यो हो कि चिहान कसले किने— अब्राहाम या याकूब ? यो प्रस्ट विरोधाभासको व्याख्या के हुन सक्छ ?

उत्पत्तिको विवरणबाट हामीलाई थाहा छ कि हारानबाट प्रस्थान गरेपछि अब्राहाम पहिलो पटक शकेममा रोकिए जहाँ तिनले एउटा वेदी पनि बनाए (उत्पत्ति १२:६–७) । त्यस ठाउँमा परमेश्वर तिनीकहाँ देखा पर्नुभयो अनि आफ्नो प्रतिज्ञालाई उहाँले अब्राहामसामु पुन: दोहोर्‍याउनुभयो । यस्तो परिस्थितिमा अब्राहामले त्यहाँ कुनै जग्गाको टुक्रा किन्नु मुनासिब नै हुन्थ्यो ।

उत्पत्तिकै विवरणमुताबिक हामीलाई थाहा छ कि अब्राहामको समयभन्दा लगभग १८५ वर्षपश्चात् याकूब शकेममा गए र त्यहाँ तिनले आफ्नो पाल टाँगेर बसोबास गरे ।

सायद, यो लामो अवधिमा स्थानियहरूले उक्त जमिनलाई आफ्नो कब्जामा लिए अनि तिनीहरूसँग झगडा गरेर आफ्नो पुर्खाले किनेको जमिन हात पार्नुको साटो त्यसलाई पुन: किन्नु उचित ठानी याकूबले दाम तिरे । यसरी उक्त जग्गालाई दुई पटक किनियो: पहिले अब्राहामबाट अनि लगभग दुई शताब्दीपछि याकूबबाट ।  

Leave Your Comments Here.