कुमदेखि तल पक्षघात भएकी जोनी संसारकै लागि प्रेरणाको स्रोत भएकी छन्

आफ्नो शारीरिक अवस्था जस्तोसुकै कमजोर भए तापनि इच्छाशक्ति भएमा सफलता हात पार्न सकिन्छ भन्ने ज्वलन्त उदाहरण हो, जोनी एरिक्सन टाडा ।

ख्रीष्टाब्द १९४९ मा अमेरिकामा जन्मेकी जोनीलाई अन्य खेलहरूका अतिरिक्त पौडी पनि मन पथ्र्यो । पौडी पोखरी गहिरो होला भनी ठानेर डुबुल्की मार्दा उनले कहिल्यै कल्पना नगरेको दुर्घटनाको शिकार बन्नुपर्‍यो जोनी । १७ वर्षको उमेरमा भएको उक्त दुर्घटनाले गर्दा उनको गर्धन भाँचियो । उनी पक्षाघाती भइन् । उनको शरीरको कुमदेखिको तलको भाग नचल्ने भयो । अनुगामी वर्षहरूमा जोनीले रिस र निराशालाई मात्रै आश्रय दिइनन् तर आत्महत्या गर्ने सम्मको सोच बनाइन् ।

परमेश्वरले जोनीको जीवनमा त्यस्तो दु:ख किन ल्याउनुभयो भनी उनले सोच्नै सकिनन् । तथापि जोनीको जीवनमा परमेश्वरले असाधारण योजना बुन्दै हुनुहुन्थ्यो । जोनीले आफ्नो दर्दनाक अवस्थाको लागि परमेश्वरलाई गनगन गर्नुको साटो उनले परमेश्वरसितको सम्बन्धलाई गहिरो बनाउँदै लगिन् । त्यस्तो असक्त अवस्थाबाट नै परमेश्वरले उनको जीवनमा काम गर्न चाहनुभएको थियो भनी जब उनले महसुस गर्न लागिन् तब उनको सफलताको यात्राको थालनी भयो ।

उनले ब्रुस दाँतमा राखेर चित्र कोर्न थालिन् र आफूले बनाएका चित्रहरू बेच्न सुरु गरिन् । उनका चित्रहरूको माग बढ्न थाल्यो । उनले आफ्ना चित्रहरूमार्फत ख्रीष्टको प्रेम पनि बाँड्न थालिन् ।

जोनी चित्रकार मात्र रहिनन् । उनी वक्ता, अभिनेत्री र लेखिका पनि बनिन् । जोनीले ४८ ओटाभन्दा बेसी पुस्तकहरू लेखेकी छन् र ती पुस्तकहरू अशक्तता र ख्रीष्टियमतको बारेमा छन् । उनले असक्त मानिसहरूका लागि एउटा संस्था पनि खोलेकी छन् जुन संस्थाले असक्तहरूका आवश्यकतालाई पुरा गर्नुपर्छ भन्ने येशूको आज्ञालाई शिरोपर गर्ने प्रयत्न गर्दछ ।

विभिन्न पुरस्कारहरू जितेकी जोनी आज विश्वमा असक्तता भएका मानिसहरूका लागि मात्र नभएर सक्षमहरूका लागि पनि प्रेरणाकी स्रोत बनेकी छन् ।

Leave Your Comments Here.

अङ्ग्रेजी सिक्न चाहेका ड्राइभर पास्टर बने

एसिया महादेशको दक्षिण पूर्वमा अवस्थित राष्ट्र फिलिपिन्सको राजधानी सहर मनिलामा हर्बी नाउँ गरेका टयाक्सी ड्राइभरले टयाक्सी हाँक्ने काम गर्थे । यो तिनै टयाक्सी ड्राइभरको साँचो कथा हो ।

संसारका अन्य धेरै मानिसहरूलाई जस्तै तिनले पनि अङ्ग्रेजी भाषाको महत्त्व राम्ररी बुझेका थिए । त्यसैले, तिनी अङ्ग्रेजी सिक्न चाहन्थे । तिनले एउटा किताब हात पारे अनि त्यसको अध्ययन गर्न थाले । त्यो किताब अङ्ग्रेजी भाषामा अनुवाद गरिएको नयाँ करारको बाइबल परेछ । बाइबलको वचनले ड्राइभरको ह्दय छोयो । अन्तत: तिनी ख्रीष्टियान बने ।

कथा यहीँ टुङ्गिदैन । पछि हर्बी बाइबल कलेजमा भर्ना भए, थप बाइबल अध्ययनको लागि । परमेश्वरले तिनलाई पास्टर हुने बोलावट दिनुभयो र तिनी पास्टर बने । त्यसका अतिरिक्त तिनी फिलिपिन्समा बाइबल लिगको सहनिर्देशकसमेत बने ।

यसरी अङ्ग्रेजी सिक्न चाहेका ड्राइभर पास्टर बने ।   

Leave Your Comments Here.

“पिता मभन्दा महान् हुनुहुन्छ” (यूहन्ना १४:२८) भन्ने येशूको भनाइको अर्थ के हो ?

योलगायत अन्य केही खण्डहरूको आधारमा यहोवेको साक्षीजस्ता केही झुटा शिक्षाहरूले येशू सानो परमेश्वर हुनुहुन्छ भनी तर्क गर्छन् । येशू पिता परमेश्वरसित समान हुनुहुन्छ भनी बाइबलले स्पष्ट रूपमा सिकाउँछ । जसरी पिता अनन्त हुनुहुन्छ त्यसरी पुत्र पनि अनन्त हुनुहुन्छ (यूहन्ना ८:५८) । पिता र पुत्र एक हुनुहुन्छ (यूहन्ना १०:३०) । यदि येशू पितासित समान हुनुहुन्छ भने कसरी “पिता म [येशू] भन्दा महान् हुनुहुन्छ” ?

केही यस्ता क्षेत्रहरू छन् जसमा पिता पुत्रभन्दा महान् हुनुहुन्छ र केही यस्ता क्षेत्रहरू जसमा पिता र पुत्र समान हुनुहुन्छ । त्रिएकताभित्र पिता र पुत्र सारमा समान हुनुहुन्छ तर उहाँहरूका काममा उहाँहरू फरक हुनुहुन्छ । उहाँहरूको स्वभावमा पिता र पुत्र समान हुनुहुन्छ जब कि उहाँहरूको पदमा उहाँहरू फरक हुनुहुन्छ ।

यसलाई प्रस्ट पार्न म यहाँ एउटा उपमा प्रस्तुत गर्न चाहन्छु । एउटै परिवारका बुबा प्रधानमन्त्रीको पदमा र छोरो मन्त्रीको पदमा छन् । बुबा र छोरो दुवै नै मानिस हुन् भन्ने अर्थमा समान छन् तर पदको आधारमा बुबा छोराभन्दा महान् हुन्छ । 

निष्कर्षमा, पिता र पुत्र स्वभावमा समान हुनुहुन्छ तर पदमा पिता पुत्रभन्दा महान् हुनुहुन्छ जस्तो येशूले भन्नुभयो ।

Leave Your Comments Here.

येशू ख्रीष्टलाई अङ्गालेपछि आनन्द र शान्तिको महसुस गरे स्टडले

“के तपाईं ख्रीष्टियान हुनुहुन्छ ?”, प्रचारकले सी. टी. स्टडलाई सोधे ।

प्रचारकलाई पाखा लगाउने अपेक्षा गर्दै स्टडले जवाफ दिए, “हो, म येशू र मण्डलीमाथि विश्वास गर्दछु ।”

यूहन्ना ३:१६ लाई देखाउँदै आगन्तुकले भने, “यो पदलाई हेर्नुस् । के येशू ख्रीष्ट तपाईंको लागि मर्नुभयो भनी तपाईं विश्वास गर्नुहुन्छ ?”

जवान स्टडले अधैर्यता देखाउँदै टाउको हल्लाए ।

प्रचारकले जारी राखे, “विश्वास गर्नेसित अनन्त जीवन छ भन्ने यस पदको बाँकी आधा भागमाथि के तपाईं विश्वास गर्नुहुन्छ ?”

स्टडले छक्क पार्ने जवाफ फर्काए, “मैले त्यसमाथि विश्वास गर्छु जस्तो लाग्दैन ।”

प्रचारकले तार्किक प्रस्तुतिलाई अगाडि सारे, “त्यसो हो भने कि परमेश्वर गलत हुनुहुन्छ कि भने तपाईं गलत हुनुहुन्छ । तपाईंको विचारमा के परमेश्वरले सत्य बोल्दै हुनुहुन्न र ?”

एउदै पदको आधा भागमाथि विश्वास गरी बाँकी आधा भागलाई विश्वास नगर्नु भनेको तर्कसङ्गत नहुनु भन्ने बुझाइसहित प्रचारकले जान्न चाहे, “के तपाईं सधैँ त्यस्तै भइरहनुहुन्छ त ?”

स्टडले आफू तार्किक हुने मनसाय व्यक्त गरे ।

प्रचारक अगाडि बढे, “अनन्त जीवन वरदान हो भन्ने कुरो तपाईं देख्नुहुन्न ? के तपाईं घुँडा टेकी यस वरदानको निम्ति परमेश्वरलाई धन्यवाद दिनुहुन्छ ?”

व्याकुल हुँदै स्टडले वरिपरि हेरे । प्रचारकले भनेको कुरो सही थियो भनी तिनलाई थाहा थियो । त्यसैले स्टडले घुँडा टेके अनि परमेश्वरलाई धन्यवाद दिए । त्यहीँनेर तिनले आनन्द र शान्तिको महसुस गरे । “नयाँ जन्म” पाउनु भनेको के हो भनी तिनले बुझे । पहिले बाइबल तिनको निम्ति सुक्खा थियो अब त्यही पुस्तक तिनको सबै थोक बन्यो ।

ख्रीष्टाब्द १८६० मा इङ्गल्यान्डमा जन्मेका सी. टी. स्टड पछि इङ्गल्यान्डकै महानतम क्रिकेटरको रूपमा चिनिए । खेलकुद जीवनमा तिनी प्रसिद्धीको पराकाष्ठामा पुग्दा तिनले चीनमा मिसनरी भई जाने निर्णय लिए । क्रिकेट जीवनबाट मिसनरी जीवनमा प्रवेश गरेका स्टड आधुनिक महानतम ख्रीष्टियान मिसनरीहरूको सूचीमा पर्दछन् ।

Leave Your Comments Here.

के शून्यताबाट कुनै वस्तुको उदय हुन सक्छ ?

शून्यताबाट कुनै कुरोको उदय हुन सक्छ भनी दाबी गर्नु भनेको जादुभन्दा पनि खराब हो । एउटा जादुगरले टोपीभित्रबाट खरायो निकाल्दा कम से कम त्यहाँ पहिले नै जादुगर र टोपी त हुन्छन् । शून्यताबाट कहिल्यै स्वत: कुनै वस्तु अस्तित्वमा आएको हामीलाई थाहा छैन । दिन प्रतिदिनको हाम्रो अनुभवले यसलाई पुष्टि गर्दछ ।

कल्पना गर्नुस् कि तपाईं एउटा रित्तो कोठाभित्र प्रवेश गर्नुभएको छ । कोठा रित्तो छ भनी तपाईं सुनिश्चित हुनुहुन्छ । त्यसभित्र कोही प्रवेश गर्न नसकोस् भन्ने हेतुले तपाईंले त्यसको प्रवेशद्वारमा बलियो ताल्चा लगाइदिनुभयो । भोलीपल्ट कोठाभित्र प्रवेश गर्न लाग्नुहुँदा तपाईं के अपेक्षा गर्नुहुन्छ ? कोठाको रिक्तता । तपाईंको तार्किक क्षमताले तपाईंलाई निश्चयता दिलाएको छ कि कसैले सोफा, कम्प्युटर, दराज वा टेबुलजस्ता वस्तुहरू नल्याएसम्म ती त्यस कोठाभित्र आफै उत्पन्न हुन सक्दैनन् ।  

शून्यता भनेको के हो ? उचित तवरले बुझ्ने हो भने शून्यता भनेको रिक्त स्थान होइन । शून्यता भनेको कुनै पनि कुरोको अनुपस्थिति हो अर्थात् यो भनेको रिक्त स्थानको पनि अनुपस्थिति हो । शून्यताको आफ्नो भन्ने केही पनि हुँदैन ।

तब यो स्थापित सत्यता हो कि शून्यताबाट कुनै वस्तुको उदय हुन सक्दैन । शून्यतासँग वस्तुलाई अस्तित्वमा ल्याउने शक्ति हुँदैन ।

यो विश्व अर्थात् युनिभर्स अनन्त छैन हामीलाई थाहा छ । यो सम्पूर्ण विश्व महाविस्फोटमा अस्तित्वमा आयो भनी आधुनिक वैज्ञानिक खोजहरूले देखाएका छन् । सारा विश्वको आरम्भ हुनुअगि के थियो भनी कल्पना गर्ने कोसिस गर्नुस् । तपाईंले पाउने जवाफ यही हो: शून्यता । स्मरण रहोस्, शून्यतासँग कुनै वस्तुलाई अस्तित्वमा ल्याउने शक्ति हुँदैन । शून्यताबाट केही आउँछ भने त्यो शून्यता नै हो कुनै वस्तु होइन । कसैले आफ्नै नियमअनुसार यो सारा विश्व अस्तित्वमा आएको हो भन्ने जिद्दी गर्छ भने उसले यो जनोस् कि विश्वको आरम्भअगि कुनै प्राकृतिक नियम थिएन । सारा प्राकृतिक नियमहरू महाविस्फोटमा अस्तित्वमा आए ।

शून्यताबाट कुनै वस्तु आफै उत्पन्न हुन सक्दैन भन्ने कथनको तात्पर्य के हो त ? यो सम्पूर्ण विश्व यहाँ छ । आधुनिक वैज्ञानिक खोजअनुसार यो विश्व अनन्त छैन, यसको सुरुआत छ । विश्वको सुरुआतअगि शून्यतासिवाय केही थिएन र त्यससित सारा विश्वलाई अस्तित्वमा ल्याउने शक्ति नभएकोले यस विश्वलाई कसैले अस्तित्वमा ल्याएको हुनुपर्छ । ती अस्तित्वमा ल्याउने व्यक्तिलाई हामी परमेश्वर भन्छौँ ।       

Leave Your Comments Here.