बाइबलीय विवरणसित मेल खाने २,७०० वर्ष पुरानो प्रिज्म पत्ता लाग्यो

सनहेरीब अश्शूरका राजा थिए जसले ७०५–६८१ ख्रीष्टपूर्वसम्म शासन चलाए । तिनी सर्गान द्वितीयका छोरा थिए । तिनले बेबिलोन र यहूदाको विरुद्धमा गरेको सैनिक हमला र राजधानी सहर निनवेको निर्माणको लागि तिनी परिचित छन् ।

बाइबलको तिन ओटा पुस्तकमा राजा सनहेरीबको उल्लेख गरिएको छ: २ राजा, २ इतिहास र यशैया । २ राजा १८:१३–१६ मा यहूदामाथि राजा सनहेरीबको आक्रमणलाई बयान गरिएको छ, “हिजकियाका राजकालको चौधौँ वर्षमा अश्शूरका राजा सनहेरीबले यहूदाका किल्ला भएका सबै सहरहरूलाई आक्रमण गरेर ती कब्जा गरे । यसैले यहूदाका राजा हिजकियाले लाकीशमा अश्शूरका राजाकहाँ यसो भनेर समाचार पठाए: ‘भूल मेरो भयो । मेरो देशबाट फर्किजानुहोस्, र मबाट जो तपाईं दाबी गरेर माग्नुहुन्छ, सो म तिर्नेछु ।’ अश्शूरका राजाले यहूदाका राजा हिजकियामाथि दश टन चाँदी र एक टन सुन दण्ड तोकिदिए । यसैले हिजकियाले परमप्रभुको मन्दिरमा र राजमहलका भण्डारहरूमा भेट्टाएका सबै चाँदी उनलाई दिए । त्यस बेला यहूदाका राजा हिजकियाले परमप्रभुको मन्दिरका ढोकाहरू र ढोकाका खामाहरू, जो तिनी आफैले सुनले मोहोरेका थिए, तीबाट सुन निकालेर अश्शूरका राजालाई दिए ।”

ख्रीष्टाब्द १८३० मा फेला पारिएको प्रिज्मले बाइबलीय विवरणको पुष्टि गरेको छ । सनहेरीब प्रिज्म नाउँ दिइएको ६ ओटा किनारा भएको यस प्रिज्ममा ५०० ओटा हरफ छन् जसलाई अक्कादी भाषामा लेखिएको छ । प्राचीन निनवे सहर (वर्तमान इराकको नेबी युनुस भनेर चिनिने क्षेत्र) मा टेलरद्वारा पत्ता लगाइएको यस प्रिज्मलाई टेलर प्रिज्म पनि भनिन्छ ।

यस प्रिज्मलाई ६८९ ख्रीष्टपूर्वको मिति दिइएको छ जसको अर्थ हुन्छ कि यो करिब २,७०० वर्ष पुरानो प्रिज्म हो । पोलेको माटोबाट तयार पारिएको यस प्रिज्मको उचाइ ३८.५ सेन्टिमिटर रहेको छ । हाल यसलाई इङ्गल्यान्डको राजधानी लन्डनस्थित ब्रिटिस सङ्ग्रहालयमा सुरक्षितसाथ राखिएको छ ।  

यस प्रिज्ममा राजा सनहेरीबको विजयलाई बयान गरिएको छ । तिनले यहूदाका राजा हिजकियाको शासनकालमा ७०१ ख्रीष्टपूर्वमा यरूशलेमलाई घेरेका थिए । अश्शूरी राजा सनहेरीबले बयान गरेका छन्, “मैले यरूशलेममा यहूदाका राजा हिजकियालाई पिँजडामा थुनिएको चरालाई झैँ थुनेँ ।”

बाइबलीय पुरातात्त्विक क्षेत्रमा महत्त्वपूर्ण यस खोजले बाइबलको ऐतिहासिक विवरणलाई पुष्टि गर्ने काम गरेको छ ।

Leave Your Comments Here.