बाइबलमा भुल छ भनी प्रमाण खोज्न हिँडेका राम्से आफै पक्का ख्रीष्टको सेवक बने

यस धरतीमा बाँच्ने महानतम पुरातत्त्वविद्हरूमध्ये एक जनाको नाउँ हो— सर विलियम राम्से । आफ्ना नास्तिक आमाबाबुद्वारा अविश्वासीको रूपमा सर विलियम राम्सेलाई हुर्काइएको थियो । उन्नाइसौँ शताब्दीमा तिनले जर्मनीको ऐतिहासिक स्कुलबाट शिक्षा पाएका थिए । परिणाम स्वरूप कट्टरवादीहरूले भनेजस्तै प्रेरितको पुस्तक पहिलो शताब्दीमा नभई दोस्रो शताब्दीको मध्यतिर लेखिएको थियो भनी तिनलाई सिकाइएको थियो । त्यसमा तिनी निकै विश्वस्त थिए । तर तिनलाई प्रमाण चाहिएको थियो ।

बाइबलको ऐतिहासिक विवरण गलत थियो भन्ने कुरामा राम्से निश्चित थिए । तिनले बाइबललाई दन्त्यकथाहरूको पुस्तक भन्थे । बाइबललाई अप्रमाणित गर्ने उद्देश्यले नै तिनले पुरातत्त्वविद्या भन्ने विषय पढे । आवश्यक वैज्ञानिक सामग्रीहरू र शिक्षासहित तयार भएपछि तिनी एसिया माइनर र प्यालेस्टाइनतर्फ लागे, खास गरी प्रेरितको पुस्तकलाई काल्पनिक विवरणको रूपमा पुष्टि गर्नको लागि ।

२५ वर्षसम्म तिनले एसिया र मध्यपूर्वमा जोडतोडका साथ खोज गरे । नयाँ करारको ऐतिहासिक सच्चाइ र साक्षी देखेर राम्से तिन छक परे । तिनका खोजहरूले बाइबललाई अप्रमाणित गर्नुको साटो पुष्टि गरेको भेट्टाए तिनले । बाइबलका ससना विवरणहरूमा सत्यता भेट्टाए तिनले । अन्तमा आफू ख्रीष्टियान भएको घोषणा गरी तिनले बौद्धिक वृत्तमा भुइँचालो ल्याइदिए । तिनी पक्का ख्रीष्टियान बने ।

स्कटल्यान्डमा जन्मेका राम्से विख्यात् पुरातत्त्वविद् र नयाँ करारको विद्वान् कहलाइए । डेढ दर्जनभन्दा बेसी कृतिहरूका लेखक राम्से एसिया माइनरको इतिहास र नयाँ करारको अध्ययनमा आफ्नो समयका प्रमुख विद्वान् बने ।  

Leave Your Comments Here.