के येशूको शव चोरी भएको थियो ?

येशूको पुनरुत्थान ख्रीष्टियान विश्वासको कुने–ढुङ्गो हो जसविना ख्रीष्टियमत गल्र्यामगुर्लुम ढल्छ । प्रेरित पावलको भाषामा भन्नुपर्दा, “यदि ख्रीष्ट मृतकबाट पुनर्जीवित पारिनुभएको होइन भनेता हाम्रो प्रचार व्यर्थ हुन्छ, र तिमीहरूको विश्वास पनि व्यर्थ हुन्छ” (१ कोरिन्थी १५:१४) । यस अलौकिक घटनालाई विगत दुई हजार वर्षदेखि नै प्राकृतिक दृष्टिकोणबाट बुझ्ने कोसिस गरिँदै आएको छ । सर्वप्रथम यहूदी अगुवाहरूले त्यस्तो दुश्प्रयास गरेका थिए । येशू पुनरुत्थान हुनुभएपछि तिनीहरूले एउटा कथा रचेका थिए जसअनुसर येशूका चेलाहरूले येशूको मृत शरीरलाई चोरेर लगे (मत्ती २८:११–१५) । यहूदीहरूको बिचमा यही कथा फैलियो । निस्सन्देह, कतिपय यहूदीहरूले येशूमा विश्वास नगर्नुमा यही कहानी जिम्मेवार थियो । तर के यहूदी धर्म–गुरुहरूले भनेजस्तै येशूका चेलाहरूले उहाँको शवलाई चोरी पुनरुत्थानको नाटक रचेका हुन् त ? होइन भन्नाका लागि यहाँ ५ ओटा कारण पेस गरिएका छन् ।

१. येशूको गिरफ्तारीपश्चात् चेलाहरू औधी डराएका थिए । 

जब गेतसमनीको बगैँचामा येशूलाई गिरफ्तार गरियो तब सबै चेलाहरूले उहाँलाई छाडेर भागे (मत्ती २६:५६) । येशूको पक्राउपछि पत्रुसले उहाँलाई तिन पटक इन्कार गरे । सम्भवत: तिनीहरूले आफूलाई येशूको चेलाको रूपमा चिनाएनन् । यूहन्ना लेख्छन्, “यहूदीहरूको डरले चेलाहरू ढोकाहरू बन्द गरेर भित्र बसेका थिए” (२०:१९) । केही चेलाहरू आफ्नै पुरानो पेसामा फर्किसकेका थिए (यूहन्ना २१:३) । यी विवरणहरूलाई नियाल्दा हामी प्रस्ट हुन सक्छौँ कि चेलाहरू निकै डराएका थिए । यस्ता डरपोक चेलाहरूले येशूको चिहान रुँग्न बसेका सिपाहीहरूको विरुद्धमा सङ्घर्ष गरी येशूको शव लगे भन्ने परिकल्पनामा कुनै दम छैन । तिनीहरूसँग न आँट थियो न त शक्ति नै । 

२.  येशूको चिहानमा भएका कपडाहरू उही स्थानमा थिए ।  

चिहानमा भएका कपडाहरूले उल्लेखनीय रूपमा येशूको पुनरुत्थानको गवाही दिन्छन् । यूहन्नाले लेखेका छन्, “... चिहानभित्र निहुरेर हेर्दा, तिनले सूती कपडाहरू मात्र पडिरहेका देखे, ... । अनि तिनले पनि मलमलका बेह्ने कपडाहरू मात्र त्यसै पडिरहेका देखे । उहाँको शिरमा बाँधिएको रूमालचाहिँ मलमलका कपडाहरूसँग थिएनन् तर अलग्गै एक ठाउँमा पटयाएर राखिएको थियो । ...” (२०:३–९) । यो विवरण निकै चाखलाग्दो छ किनकि येशूको शरीर गायब छ तर उहाँको शरीरमा बेह्एिका कपडाहरू चिहानमा नै छन्, यत्रतत्र छरिएर रहेको अवस्थामा नभई पहिलेकै अवस्थामा । यदि कसैले उहाँको शव चोरेको थियो भने कपडा किन छोड्यो ? चोरीको काम हतारमा हुने भएकोले किन कपडाहरू जथाभावी छरिएनन् ? किन मिलाइएको अवस्थामा ?

३. चिहानको मुखमा ठुलो ढुङ्गो राखिएको थियो ।

येशूलाई राखिएको चिहानको मुखमा एउटा ठुलो ढुङ्गो राखिएको थियो (मत्ती २७:६०) । ढुङ्गा कति ठुलो थियो भन्ने यथार्थतालाई अङ्कित गर्दै चिहानमा गएका स्त्रीहरूले चिन्ता व्यक्त गरे, “हाम्रा निम्ति चिहानको ढोकाको ढुङ्गा कसले हटाइदेला ?” (मर्कूस १६:३) । मानिस र जनावरहरूबाट सुरक्षा गर्न चिहानको मुखमा ढुङ्गा राखिन्थ्यो । चोरी हुन सक्ने सम्भावनालाई रोक्न येशूको चिहानको मुखमा साधारणतया प्रयोग गरिने भन्दा ठुलो ढुङ्गा राखिएको हुनुपर्छ । यदि चेलाहरूले चिहानमा आएर येशूको शवलाई चोर्न खोजेका थिए भने पनि ढुङ्गा हटाउँदा उत्पन्न आवाजले पहरादारहरूलाई पक्कै बिउँझाउनेथियो । तसर्थ, यो सारा घटनामा यो ढुङ्गा मौन साक्षी हो ।

४. चेलाहरू इज्जतदार मानिसहरू थिए ।

चेलाहरूले आफ्नो बाँकी जीवन येशू नै मसीह हुनुहुन्छ भनी प्रचार गरेर बिताए जसको लागि पुनरुत्थान अपरिहार्य अवयव थियो । आफ्नो विश्वासको निम्ति तिनीहरू अपहेलित भए; पिटिए; गिरफ्तार गरिए र अन्त्यमा तिनीहरू डरलाग्दो मृत्यु वरण गरी सहिद बने । जस्तोसुकै कठिन परिस्थितिमा तिनीहरूले एक पटक पनि आफ्नो विश्वासलाई त्यागेनन् । येशूको गिरफ्तारीमा डरपोक यी चेलाहरू केही हप्तापश्चात् सिंहझैँ निर्भीक बनेका थिए । झुटले तिनीहरूलाई यस्तो सुरो बनाउँदैनथ्यो ।     

५. यहूदी अगुवाहरूले बनाएको कथामा खोट थियो । 

यस काल्पनिक कथामा भएको खोट यही हो— यदि पहरादारहरू सुतिरहेका थिए भने चेलाहरूले येशूको लाश चोरे भनी तिनीहरूले कसरी भन्न सक्थे ? पहरादारहरू कि ब्युँझेका थिए कि निदाएका थिए । तिनीहरू जागा नै थिए भने तिनीहरूले यस्तो कथा रच्दैनथ्ये । यदि तिनीहरू निदाएका थिए भने चेलाहरूले लाश लगे भनेर तिनीहरूलाई कसरी थाहा भयो ? तपाईं निदाइरहनुहुँदा फलानोले तपाईंको घरको कम्प्युटर चोरेर लग्यो भनी तपाईंले भन्नुभयो भने अदालतमा मान्छेहरू हाँस्छन् । पहरादारहरू सुत्न सक्दैनथ्ये किनकि त्यसो गर्नु भनेको ज्यान गुमाउनु थियो ।

निष्कर्षमा, उपलब्ध विवरणहरूलाई होसीयारीपूर्वक अध्ययन गरेपछि एउटा दक्षसाथै सचेत अनुसन्धानकर्ताले येशूको शव चोरी भएको थियो भन्ने परिकल्पनालाई सहजै लत्त्याइदिन्छ किनकि ऐतिहासिक विवरणको वरिपरि भएका दृश्यहरूले यो विकल्पको कत्ति पनि समर्थन गर्दैनन् ।    

   

    

Leave Your Comments Here.