१० परिचित नास्तिकहरू जो ख्रीष्टियान बने

विभिन्न दृष्टिकोण भएका मानिसहरूले येशूलाई मुक्तिदाताको रूपमा अङ्गालेका छन् । कसैले अनुसन्धानपश्चात् उहाँलाई भेट्टाउन पुगेका छन् भने कोही ऐतिहासिक ख्रीष्टियान विश्वासलाई अप्रमाणित गर्ने क्रममा उपलब्ध साक्षीहरूमार्फत उहाँको सामु घुँडा टेक्न बाध्य भएका छन् । यहाँ हामी यस्ता १० जना नास्तिकहरूको बारेमा चर्चा गर्छौं जसले येशूलाई आफ्नो मुक्तिदाताको रूपमा स्वीकार गरे । यिनीहरूमध्ये केही अझै जीवितै छन् ।  

१. सी. एस. लेविस (१८९८–१९६३)

ख्रीष्टाब्द १८९८ मा आएरल्यान्डमा जन्मेका सी. एस. लेविस १५ वर्षको उमेरमा नास्तिक बनेका थिए । तर आफ्ना मित्र टोल्किनका गहकिला तर्कहरूबाट प्रभावित भई लेविस बिस्तारै ख्रीष्टियान विश्वासतर्फ फर्के र ३३ वर्षको उमेरमा तिनी ख्रीष्टका अनुयायी बने । अक्सफोर्ड र क्याम्ब्रिजजस्ता विश्वप्रसिद्ध कलेजहरूमा पढाएका लेविसले ७० भन्दा बेसी पुस्तकहरू लेखेका छन् ।  ख्रीष्टियान विश्वासको पक्षमा लेखिएको तिनको कृति मेएर क्रिस्चियानिटीलाई पढेर हजारौँ मानिसहरूले प्रभु येशूमाथि विश्वास गरेका छन् । तर्क र विश्वासलाई वैरीको रूपमा नभई साखको रूपमा देख्ने लेविसको बुझाइमा तर्क विश्वासतर्फ डोर्‍याउने एउटा उपयुक्त मार्ग हो । आख्यान र गैरआख्यान दुवै क्षेत्रमा कलम चलाएका लेविस उपन्यासकार, कवि, साहित्यिक समालोचक, निबन्धकारसाथै ख्रीष्टियान रक्षाशास्त्री थिए ।  

२. जोस म्याकडोल (१९३९–)

ख्रीष्टाब्द १९३९ मा अमेरिकामा जन्मेका जोस म्याकडोल धर्म, बाइबल र मण्डलीदेखि वाक्क भएका थिए । तिनको बुझाइमा ख्रीष्टियान विश्वास कुनै पनि हालतमा बौद्धिक वृत्तमा टिक्न सक्दैनथ्यो । बौद्धिक रूपमा ख्रीष्टियान धर्म झुटो छ भनी पुष्टि गरेर दिखाइदिन एउटा गतिलो किताब लेख्ने अठोट गरे तिनले । ख्रीष्टियमत एउटा छल हो भनी भरपर्दा स्रोतहरू जुटाई प्रमाणित गर्न तिनी अमेरिका र युरोपभरि चाहारे । तर तिनको अनुसन्धानले तिनलाई आफूले अपेक्षा गरेको गन्तव्यमा डोर्‍याएन । तिनी बौद्धिक रूपमा बेइमान हुन सकेनन् र अन्तत: आफ्नो जीवन येशूमा सुम्पे । तिनी सामान्य विश्वासी मात्र बनेर रहेनन् बरु आफ्नो प्रतिभासाथै वरदानलाई परमेश्वरको राज्य बिस्तारको लागि प्रयोग गरिरहेका छन् तिनले । जोस विश्वप्रसिद्ध ख्रीष्टियान रक्षाशास्त्री, प्रचारसाथै लेखक बनेका छन् । १३८ ओटा पुस्तकका लेखकसाथै सहलेखक म्याकडोलको मोर देन अ कार्पेन्टर नामक कृति ८५ ओटा भाषामा अनुवाद भइसकेका छन् भने १ करोड ५० लाख प्रति छापिएका छन् । नेपाली भाषामा पनि उपलब्ध यस कृतिले येशूको वास्तविक पहिचानलाई तार्किक, वैज्ञानिक र ऐतिहासिक रूपमा उदाङ्गो पारेको छ ।  

३. रबी जकरिया (१९४६–)

१७ वर्षको उमेरसम्म नास्तिक बनेका रबी जकरियाले जीवनमा अर्थ भेट्टाउन नसकेपछि विष सेवन गरेर आत्महत्या गर्ने कोसिस गरे । तर तिनी मरेनन् । अस्पतालको बेडमा नै तिनकी आमाले पढेको बाइबलको वचनले तिनको ह्दय छोयो । तिनले आफ्नो जीवन प्रभु येशूमा सुम्पे । ख्रीष्टाब्द १९४६ मा भारतमा जन्मेका रबी संसारभरि नै परिचित प्रचारकसाथै लेखक कहलाइएका छन् । तिनी येशूको सुसमाचार सुनाउने क्रममा संसारका ७० भन्दा बेसी मुलुकहरूमा पुगिसकेका छन् । हार्बड, जोन हप्किन्स, अक्सफोर्डजस्ता विश्वका नामी विश्वविद्यालयहरूमा प्रवचन तोडिसकेका रबीले बिसभन्दा बेसी पुस्तकहरू लेख्नुकासाथै सम्पादन गरेका छन् । तिनी सीएनएन, फक्ससाथै अन्य अन्तर्राष्ट्रिय मिडियाहरूमा पनि देखा परेका छन् । यसरी नास्तिक छँदा जीवनको अर्थ भेट्टाउन नसकेका रबीलाई बाइबलको वचनले जिउने शक्ति मात्र हालिदिएन तर सफलतालाई चुम्न चाहिने सृजनशील खुबी पनि थमाइदियो । 

४. लि स्ट्रोबेल (१९५२–)

पत्रकारिता र कानुनका विद्यार्थी लि स्ट्रोबेल नास्तिक थिए । तिनको बुझाइमा सर्वशक्तिमान् परमेश्वरको अवधारणा फजुलसिवाय केही थिएन । तिनी अमेरिकामा प्रकाशित हुने सिकागो ट्रिबुन नामक दैनिक अखबारका कानुनी सम्पादक थिए । एक दिन आफ्नी पत्नीले येशूमाथि विश्वास गरेपछि तिनको वैवाहिक सम्बन्ध टुट्ने भयो भनी ठाने तिनले । तर श्रीमतीको जीवनमा देखा परेका सकारात्मक परिवर्तनले गर्दा तिनले उक्त विश्वासलाई जाँच्ने जमर्को गरे । आफूसँग भएको प्रतिभालाई प्रयोग गरी तिनले एक वर्ष नौ महिना लगाएर ख्रीष्टियान धर्मको जाँच गरे । त्यसको लागि तिनी विश्वका उत्कृष्ट बाइबल विद्वान्हरूको ढोका ढकढक्याउन पुगे; तिनीहरूसँग अन्तर्वार्ता लिए । आफ्नो अनुसन्धानपश्चात् स्ट्रोबेल ख्रीष्टियमतबारे यति विश्वस्त हुन पुगे कि ३९ वर्षको उमेरमा तिनी ख्रीष्टका सच्चा सेवक बने । आफ्नो खोजमा जम्मा भएका स्रोतहरूलाई प्रयोग गरी तिनले द केस फर क्राइस्ट नामक पुस्तक लेखे जसले स्वर्ण पदक जित्यो । हाल तिनी परिचित लेखक, पत्रकार, पास्टर र रक्षाशास्त्री हुन् ।  

  

५. अलिस्टर म्याकग्रेथ (१९५३–)

ख्रीष्टाब्द १९५३ मा आएरल्यान्डमा जन्मेका अलिस्टर म्याकग्रेथ झगडालु नास्तिकको रूपमा हुर्केका थिए । तिनी नास्तिकवादमा लाग्नुका खास गरी दुई ओटा कारण थिए । पहिलो, तिनले स्कुलमा विज्ञानसित सम्बन्धित विषयहरू लिएर पढेका थिए । दोस्रोमा, ख्रीष्टाब्द १९६० को दसकमा माक्र्सवादी बन्नु प्रचलित थियो । तर अध्ययनको क्रममा नास्तिकवादको तुलनामा ख्रीष्टियमत बेसी बौद्धिक अनुशासन भएको पाए तिनले । यी आविष्कारहरूले तिनलाई नास्तिकवादबाट ख्रीष्टियान विश्वासतर्फ रूपान्तरित हुन आकर्षित गर्‍यो र तिनले ख्रीष्टियान विश्वासलाई अङ्गाले । ६३ वर्षे अलिस्टर म्याकग्रेथ हाल वैज्ञानिक, ईश्वरशास्त्री, बौद्धिक इतिहासकार र ख्रीष्टियान रक्षाशास्त्री हुन् । तिन ओटा विद्यावारिधि प्राप्त गर्न सफल म्याकग्रेथ नव नास्तिकवादको कडा विरोधी हुन् ।

६. फ्रान्सिस कोलिन्स (१९५०–)

अमेरिकामा जन्मेका फ्रान्सिस कोलिन्स नास्तिक थिए । तिनको बुझाइमा धार्मिक विश्वास आधारभूत रूपमा अन्धविश्वाससिवाय केही थिएन । तर एक दिन आफ्नो उत्सुकतालाई मेट्न तिनी एक जना ख्रीष्टियान सेवककहाँ गए जसले बातचितको क्रममा तिनको हातमा एउटा पुस्तक थमाइदिए— मेएर क्रिस्चियानिटी । ख्रीष्टियान विश्वासको पक्षमा लेखिएका रचनाकारका तर्कसङ्गत प्रस्तुतीकरणबाट कोलिन्स ज्यादै प्रभावित भए । तिनी ख्रीष्टियान हुन चाहेका थिएनन् तर तिनले आफ्नो बौद्धिक खुबीलाई इन्कार गर्न सकेनन् । अन्तत: एक दिन पहाड चढ्ने क्रममा २७ वर्षको उमेरमा तिनले आफ्नो जीवन प्रभु येशूमा सुम्पे । तिनी वंशाणुसम्बन्धी अमेरिकाका प्रसिद्ध वैज्ञानिक हुन् । याले विश्वविद्यालयबाट रसायनशास्त्रमा विद्यावारिधि गरेका फ्रान्सिस नेसनल इन्स्टिच्युट अफ हेल्थका अध्यक्ष हुन् । ६६ वर्षका कोलिन्सले नास्तिकवाददेखि ख्रीष्टियान विश्वाससम्मको तिनको आत्मिक यात्रालाई आफ्नो कृति द ल्याङ्ग्वेज अफ गड: अ साइन्टिस्ट प्रिजेन्ट्स् एभिडेन्स फर बिलिफमा उल्लेख गरेका छन् ।  

७. रिचार्ड उम्ब्रान्ड (१९०९–२००१)

ख्रीष्टाब्द १९०९ मा मध्य युरोपेली मुलुक रोमानियामा जन्मेका रिचार्ड उम्ब्रान्ड १४ वर्षको उमेरमा नास्तिक बनाइएका थिए । एक जना पाका ख्रीष्टियानबाट प्राप्त बाइबल पढेपछि तिनी येशूका अनुयायी बने । आफ्नो जीवन येशूको निम्ति समर्पित गरेका रिचार्डले भूमिगत मण्डलीको सुरुआत गरे जुन गैरकानुनी थियो । दुई पटक गरी १४ वर्ष जेल जीवन बिताएका रिचार्डले साम्यवादी जेलमा आफूले भोगेका अवर्णनीय यातनाहरूलाई आफ्नो प्रसिद्ध कृतिमा उतारेका छन्: ख्रीष्टको निम्ति प्रताडित । “पूर्वी साम्यवादी युरोपका पावल” को रूपमा चिनिएका रिचार्डको जीवनको लक्ष्य नै साम्यवादीहरूलाई येशू चिनाउनु थियो । त्यसैले तिनले साम्यवादी संसारको लागि येशू नामक संस्था खोले जसलाई पछि सहिदहरूको आवाज भनियो । ख्रीष्टाब्द १९५६ मा रिचार्ड जेलमुक्त हुँदा तिनका छोरा मिहाइले बुबालाई सोधे, “तपाईंले भोग्नुभएका यी सबै दु:ख कष्टबाट तपाईंले के सिक्नुभएको छ ?” बुबाले उत्तर दिए, “पहिलो कुरा, परमेश्वर अस्तित्वमा हुनुहुन्छ । दोस्रोमा, ख्रीष्ट हाम्रा मुक्तिदाता हुनुहुन्छ । तेस्रोमा, अनन्त जीवन छ । र चौथोमा, प्रेम नै सर्वोत्तम मार्ग हो ।”

८. सिमोन ग्रिनलिफ (१७८३–१८५३)

अमेरिकाको हार्वड ल स्कुलमा कानुनका बौद्धिक प्राध्यापक सिमोन ग्रिनलिफले पढाउने क्रममा आफ्ना विद्यार्थीहरूलाई भन्दै थिए कि येशूको पुनरुत्थान केवल मिथ्या हो । तिनी नास्तिक भएकाले तिनको बुझाइमा येशूको पुनरुत्थानजस्तो आश्चर्यकर्म असम्भव थियो । तर तिनका विद्यार्थीहरूले दिएको चुनौतिलाई गम्भीर रूपमा लिई तिनले येशूको पुनरुत्थानबारे अनुसन्धान थाले । सत्यताको निम्ति साक्षीका आफ्नै नियमहरूलाई प्रयोग गरी तिनी निर्णयमा पुगे— क्रूसारोहणपश्चात् देखा परेको दृश्यको लागि उहाँको पुनरुत्थान नै सबैभन्दा उत्कृष्ट व्याख्या हो । तिनी आफूले बटुलेका साक्षीहरूबाट यति विश्वस्त बन्न पुगे कि तिनी पक्का ख्रीष्टियान बने । आफूले जम्मा पारेका सामग्रीहरूबाट तिनले येशूको पुनरुत्थानको पक्षमा एउटा गतिलो पुस्तक लेखे: द टेस्टिमुनी अफ द इभान्जलिस्टस् । तिनी विश्वास गर्छन् कि पूर्वाग्रही नभईकन उपलब्ध साक्षीलाई इमान्दारीपूर्वक जाँच गर्ने व्यक्ति उही निष्कर्षमा पुग्छ जुन निष्कर्षमा तिनी पुगेका थिए— येशू वास्तवमै बौरी उठ्नुभयो ।   

९. जेकब डे साजर (१९१२–२००८)

जेकब डे साजर अमेरिकाका एक जना नास्तिक पाइलट थिए । दोस्रो विश्वयुद्ध हुँदा अमेरिकाले जापानमाथि हवाइ आक्रमण गर्ने क्रममा प्रति–आक्रमणमा परेर तिनी समातिएका थिए । तिनलाई जापानको जेलमा हालियो । बाँच्ने कुनै आशा थिएन । तर तिनले साहसपूर्वक झ्यालखानाका हाकिमहरूलाई अनुरोध गरे, “मलाई एउटा बाइबल ल्याइदिनुहुन्छ कि ?” तिनको अनुरोधलाई तिनीहरूले खिल्लीमा उडाइदिए । तिनीहरूलाई लाग्यो कि यो कुनै ठट्टा थियो । तिनले निरन्तर रूपमा कर लगाएकोले केही सिप नलागी तिनको हातमा बाइबल दिइयो, केवल तिन हप्ताको लागि । यो छोटो अवधिमा तिनले बाइबलाई जुन रफ्तारले पढेका थिए; त्यसमाथि मनन गरेका थिए र जीवनको अर्थसाथै मानव–जातिको आखिरी गन्तव्यको विषयमा बाइबलका वचनहरूमा डुबेका थिए त्यसले तिनको जीवनमा नाटकीय परिवर्तन ल्याइदिसकेको थियो । पछि तिनी जापानी निर्वासनबाट जेलमुक्त भए । १९४८ मा आफ्नी पत्नी र भर्खरैको छोरो लिएर तिनी फेरि जापानमा नै गए: तर यस पटक कैदीको रूपमा नभएर मिसनरीको रूपमा । मिसनरी भएर तिनले जापानमा ३० वर्ष बिताए ।     

१०. मार्भिन ओलास्की (१९५०–)

ख्रीष्टाब्द १९५० मा अमेरिकामा जन्मेका मार्भिन ओलास्की किशोर अवस्थामा नास्तिक बनेका थिए । कलेजमा माक्र्सवादको शिष्य बनी ख्रीष्टाब्द १९७२ मा तिनी कम्युनिस्ट पार्टी युएसएमा लागे । तर माक्र्सवादबाट वाक्क भएर जीवनमा उद्देश्य खोजी हिँडेका मार्भिनले बाइबलको नयाँ करारका अतिरिक्त ख्रीष्टियानहरूले लेखेका अन्य मनग्गे पुस्तकहरू पढे । तिनले खोजेका शान्ति र उद्देश्य तिनले बाइबलको पानामा फेला पारे र ख्रीष्टाब्द १९७६ मा तिनी ख्रीष्टियान बने । हाल तिनी अमेरिकामा प्रकाशित हुने वल्र्ड नामक परिचित पत्रिकाको प्रधान सम्पादक हुन् जुन पत्रिका ख्रीष्टियान विश्वासको फैलावटमा समर्पित छ । तिनी बिस ओटाभन्दा बेसी कृतिका लेखक हुन् ।

Leave Your Comments Here.