क्षमासम्बन्धी १० ओटा घतलाग्दा उदाहरणहरू

प्रभु येशूले भन्नुभयो, “किनकि तिमीहरूले मानिसहरूका अपराध क्षमा गर्‍यौ भने तिमीहरूका स्वर्गमा हुनुहुने पिताले पनि तिमीहरूलाई क्षमा गर्नुहुनेछ । तर तिमीहरूले मानिसहरूका अपराध क्षमा गरेनौ भने तिमीहरूका पिताले तिमीहरूका अपराध क्षमा गर्नुहुनेछैन” (मत्ती ६:१४–१५) । क्षमा येशूको जीवनको एउटा महत्त्वपूर्ण विषय थियो जसको विषयमा उहाँले अरूलाई सिकाउनु मात्र भएन तर यसको कार्यान्वयनको लागि उहाँ आफै नै प्रधान नमुना बन्नुभयो । उहाँलाई क्रूसमा टाँग्नेहरूलाई उहाँले भन्नुभयो, “हे पिता, यिनीहरूलाई क्षमा गर्नुहोस्, किनकि यिनीहरूले के गर्दैछन् सो जान्दैनन्” (लूका २३:३४) । क्षमासम्बन्धी येशूको उदाहरणलाई पछ्याउनेहरू इतिहासमा मनग्गे छन् । हामी १० ओटा उदाहरणलाई ध्यान दिनेछौँ ।  

१. कोरी टेन बुमको उदाहरण

ख्रीष्टाब्द १९४७ मा जर्मनीको प्रसिद्ध सहर म्युनिकको कुनै एउटा मण्डलीमा कोरी टेन बुमले सम्बोधन गरिरहँदा खैरो वस्त्र लगाएको एक जना पुरुषले उनको ध्यान खिँच्यो । उनी परमेश्वरको क्षमाको विषयमा बोल्दै थिइन् । तर उनले त्यस मान्छेलाई चिनेपछि उनको मुटु चिसो भयो । त्यो पुरुष अरू कोही नभएर र्‍याभेन्सब्रक शिविरका एक जना पहरेदार थिए जो अति नै क्रूर थिए । त्यही शिविरमा बुमले आफ्नी दिदी गुमाएकी थिएन् भने उनी आफैले पनि अमानवीय क्रूरता भोगेकी थिइन् ।

बुमको सम्बोधन सकिएपछि ती मान्छे उनलाई भेट्न आए र यसो भने, “तपाईंको मिठो सन्देशको लागि धन्यवाद छ । हाम्रा सबै पाप समुद्रको पिँधमा पुगेका छन् भनी थाहा पाउनु कति अचम्मको कुरो हो !”

बुमलाई ती पहरेदारलाई क्षमा दिन निकै सङ्घर्ष गर्नुपरिरहेको थियो । अन्तत: गहभरि आँसु झार्दै बुमले भनिन्, “मेरो सारा ह्दयले म तपाईंलाई क्षमा दिन्छु ।”   

२. दबोरा निराकाबिरिकिराको उदाहरण

दबोरा निराकाबिरिकिरा एक जना महिलाको नाउँ हो । ख्रीष्टाब्द १९९४ मा अफ्रिकी मुलुक रुवान्डामा भएको जाति–हत्यामा उनी बाँचेकी थिइन् । उनी आफ्ना एघार सन्तानमाथि पूर्णत: भर पर्थिन् । मृत्यु र निरुत्साहले निर्मित उनको जीवनमा इन्नोसेन्ट नाउँ गरेको उनको उन्नाइस वर्षको छोरो उनको आनन्द र सन्तुष्टिको विशेष स्रोत थियो । तर सिपाहीहरूले इन्नोसेन्टलाई गोली हानेर मारिदिए ।

केही समय बितेपछि केही सिपाहीहरू उनको ढोकामा देखा परे । सुरुमा तिनीहरू उनलाई मार्न आएका थिए भनी दबोराले ठानिन् । तीमध्ये एक जना सिपाहीलाई उनले चिनिन् जो पहिले पनि त्यहाँ आएको थियो । उसको नाउँ चाल्र्स थियो । त्यो सिपाही अगाडि बढयो र दबोराको कुममा समाती उनलाई बैठक कोठामा लग्यो । उसले ढोका बन्द गर्‍यो । दबोराले आफू मारिनेभयो भनी ठानिन् । दबोरापट्टि फर्केर उसले भन्यो, “मेरो निम्ति प्रार्थना गरिदिनुस् ।” दबोरा छक्क परिन् र तिनीहरू दुवै जनाले सँगै घुँडा टेके र उनले उसको निम्ति प्रार्थना गरिदिइन् । उनले चाल्र्सलाई भनिन्, “मैले तिमीलाई दिन सक्ने एउटै मात्र दण्ड तिमीलाई मेरो छोरोको ठाउँमा राखी मैले मेरो छोरोलाई खुवाउने खाना तिमीलाई खुवाउनु हो ।” दबोरापट्टि फर्केर चाल्र्सले भन्यो, “अब म तपाईंको छोरो भएको छु । सम्भव हुँदा म तपाईंलाई भेट्न आउनेछु ।”

३. ख्रीष्टियान पिताको उदाहरण

कोरियाई युद्ध (ख्रीष्टाब्द १९५०–१९५३) को बेला दक्षिण कोरियाका एक जना नागरिकलाई साम्यवादीहरूले गिरफ्तार गरी मृत्युदण्डको आज्ञा दिए । ती कैदी कुनै अनाथालयको मुख्य जिम्मेवार व्यक्ति रहेछन् भन्ने थाहा पाएर जवान साम्यवादी अगुवाले तिनलाई बचाउने निर्णय गरे । तर तिनको सट्टामा तिनको छोरोलाई मृत्युदण्ड दिइनुपर्छ भनी ती साम्यवादी नेताले आज्ञा दिए । बुबाको सट्टामा १९ वर्षे जवान छोरोलाई गोली हानी हत्या गरियो ।

युद्ध साम्य भएपछि संयुक्त राष्ट्र सङ्घले उक्त जवान साम्यवादी अगुवालाई समात्यो । युद्ध अपराधमा दोषी ठहर गरी तिनलाई मृत्युदण्ड तोकियो । तर मृत्युदण्डको कार्यान्वयन हुनुअगावै आफ्नो छोरो गुमाएको ख्रीष्टियान अगुवाले छोरोको हत्याराको जीवनको लागि बिन्ती गरे । तिनको तर्क थियो, “तिनले मृत्युदण्ड दिँदा तिनी जवान थिए र तिनले के गरिरहेका थिए तिनी आफै नै अनभिज्ञ थिए ।” ख्रीष्टियान अगुवाले अनुरोध गरे, “ती मानिसलाई मकहाँ सुम्पिदिनुस् । म तिनलाई तालिम दिनेछु ।”

संयुक्त राष्ट्र सङ्घले तिनको असाधारण बिन्तीलाई सुन्यो । ती पिताले आफ्नै छोरोको हत्यारालाई आफ्नो घरमा लगे अनि तिनको हेरचाह गरे । अन्तत: ती जवान साम्यवादी हत्यारा ख्रीष्टियान पास्टर बने । 

४. पिटर मिलरको उदाहरण

अमेरिकी क्रान्तिकारी युद्ध (ख्रीष्टाब्द १७७५–१७८३) को समयमा पेन्सलभेनियामा पिटर मिलर नाउँ गरेका आदरणीय पास्टर बस्थे । तर तिनको मण्डली नजिकै एक जना मान्छे बस्थ्यो जसले पास्टरलाई घृणा गथ्र्यो जसको कारणले उसले कुख्याती कमाएको थियो । पछि ऊ देशद्रोहमा दोषी ठहरियो अनि उसलाई मृत्युदण्ड तोकियो ।

पास्टर मिलरले यस विषयमा सुन्नेबित्तिकै तिनी सेनापति वासिङ्गटनलाई भेट्न पैदलै हिँडेर फिलाडेल्फिया गए । पास्टरले वासिङ्गटनलाई उक्त मानिसलाई क्षमा दिइओस् भनी बिन्ती गरे र पास्टरको अनुरोधलाई सेनापतिले मानिलिए ।

सेनापति वासिङ्गटनले क्षमापत्रमा हस्ताक्षर गरे । त्यही दिन दिउँसो जुन ठाउँमा अभियुक्तलाई आत्महत्या दिइने तालिका मिलाइएको थियो मिलर पैदलै १५ माइल हिँडेर त्यहाँ पुगे । अपराधीलाई मञ्चमा लगिरहँदा मिलर हस्याङफस्याङ गर्दै आएको देखेर उसले भन्यो, “त्यो बुढो पिटर मिलर हुन् । आज मलाई झुण्ड्याएको हेरेर सन्तुष्ट हुन तिनी एफ्रातादेखि हिँडेर आएका छन् ।” तर जब पास्टर मिलरले क्षमापत्र झिकेर उसलाई दियो ऊ मौन भइरह्यो ।   

५. पोप जोन पावल द्वितीयको उदाहरण

१३ मे १९८१ बुधबारका दिन पोप जोन पावल द्वितीय भ्याटिकन सिटीको सन्त पिटर स्क्वाएरमा जम्मा भएका श्रोतागणलाई सम्बोधनका लागि जाँदै गर्दा तिनीमाथि गोली प्रहार भयो । मेहमेत अली अका नाम गरेको टर्कीको आतङ्ककारीले अर्धस्वचालित पेस्तोल प्रयोग गरी तिनको शरीरमा चार गोली हानेको थियो । एकैछिनमा पोप रगताम्मे भए र तिनलाई हतारहतार अस्पताल पुर्‍याइयो र शल्यक्रियापश्चात् तिनी बाँच्न सफल भए ।

यता मेहमेतलाई तुरुन्त गिरफ्तार गरियो र पछि इटलीको अदालतले जन्म कैदको फैसला सुनायो । १९८३ को ख्रीष्टमसको दुई दिनपछि पोप जोन पावल द्वितीयले अकालाई जेलमा भेट्न गए । जोन पावल द्वितीयले भने, “हामीले जेको विषयमा कुराकानी गर्‍यौँ त्यो ऊ र मबिचमा नै गोप्य रहनुपर्छ । एउटा भाइलाई जस्तै मैले ऊसँग कुरा गरेँ र मैले उसलाई क्षमा दिएको छु अनि उसमाथि मेरो पूर्ण भरोसा छ ।” क्षमापश्चात् पोपको अनुरोधमा इटली सरकारले जुन २००० मा उसलाई टर्कीमा पठायो । २००७ मा टर्कीको जेलमा छँदा नै तिनले ख्रीष्टियान धर्म अङ्गाले र १८ जनवरी २०१० मा तिनी जेलमुक्त भए ।  

६. कन्सास बैङ्कको उदाहरण

कन्सास बैङ्क लुट्नका लागि उन्नाइस वर्षको उमेरमा अल जोनसन अन्य दुई जना मानिसहरूसँगै मिले । कुनै दुर्घटनामा दुई जना अभियुक्तहरूको मृत्यु भयो । ती मृतकहरू त्यही लुटेराहरू थिए भनी बैङ्कका कर्मचारीहरूले गलत पहिचान गरेपछि त्यो मुद्दा सदाको लागि बन्द भयो । अब आफू कहिल्यै नसमातिने भयो भनी जोनसन निर्धक्क भए ।

जोनसनले एउटी ख्रीष्टियान केटीसित बिहे गरे अनि उनको अगि आफू पनि ख्रीष्टियान भएको अभिनय गरे । पत्नीलाई तिनको विगतको अपराधबारे केही थाहा थिएन । तर एउटा ख्रीष्टियान पर्चा पढेपछि तिनले पनि क्षमा पाउन सक्थे भनी तिनले बुझे । तिनले घुँडा टेकी प्रार्थना गरे अनि येशूलाई आफ्नो प्रभु र मुक्तिदाताको रूपमा स्वीकार गरे ।

तिनको जीवन बद्लियो । जीवनभरि झुट बोल्ने तिनको आदतमा परिवर्तन आयो । निकै विचार र प्रार्थना गरेपछि तिनले आफ्नो अपराध स्वीकार गरे । तिनको स्वीकारलाई टेलिभिजनमा प्राथमिकतासाथ प्रसारण गरियो; समाचारपत्रहरूले त्यसलाई मुखपृष्ठमा छापे ।

चोरीमा आफूले प्राप्त गरेको रकमको हिस्सालाई तिनले कन्सास बैङ्कलाई पूर्ति गर्न खोजे तापनि बैङ्कले उसलाई क्षमा दियो । पछि तिनी कुनै अफिसको प्रबन्धक बने ।

७. मास्केपेटुनको उदाहरण

क्यानडाको पश्चिममा अल्बर्टा नाउँ गरेको प्रान्त पर्दछ । जब पहिलो पटक येशू ख्रीष्टको सुसमाचार लिएर मिसनरीहरू यस प्रान्तमा आइपुगे क्रि इन्डियन नामक जातिको मुखियाले मिसनरीहरूलाई निर्दयतापूर्वक विरोध गरे । ती मुखियाको नाउँ थियो— मास्केपेटुन । तर परमेश्वरले तिनको ह्दयमा बिस्तारै काम गरिरहनुभएको थियो । एउटा यस्तो समय आयो जुन बेला तिनले आफ्नो जीवन येशूमा अर्पण गरे ।

तिनले येशूमाथि विश्वास गरेको केही समय बितेपछि ब्ल्याकफुट नाउँ गरेको जातिको एक जना सदस्यले ती मुखियाको पिताको हत्या गरिदियो । मास्केपेटुन त्यस हत्याराको गाउँमा गए र उसलाई तिनको सामु हाजिर गराइयोस् भनी अनुरोध गरे । त्यस दोषी मानिसलाई मुखियाले भने, “तपाईंले मेरा पिताको हत्या गर्नुभएको छ । त्यसैले, अब तपाईं नै मेरा पिता हुनुपर्छ । तपाईं मेरो सबैभन्दा उत्तम घोडामा सवार हुनुपर्छ र तपाईंले मेरो सबैभन्दा उत्तम वस्त्र धारण गर्नुपर्छ ।”

तिन छक खाँदै पश्चात्तापले लज्जित भएर मुखियाका शत्रुले भन्यो, “मेरो छोरो, अब तपाईंले मलाई मार्नुभएको छ !” तिनको भनाइको अर्थ यही थियो कि तिनको ह्दयमा भएको घृणा ती मुखियाको क्षमा र दयाको कारणले पूर्णत: हटेर गएको थियो ।

८. इम्माक्युली इलिबागिजाको उदाहरण  

६ अप्रिल १९९४ मा पूर्वी अफ्रिकी मुलुक रुवान्डाका राष्ट्रपति सवार विमानलाई खसालियो । परिणामत: विमानमा सवार सबै नै मरे । राष्ट्रपति हुटु जातिका थिए । त्यसपछि टुट्सी जातिलाई लक्षित नरसंहार सुरु भयो । लाखौँ मानिसहरू मारिए ।

इम्माक्युली इलिबागिजा एक जना स्त्रीको नाउँ हो जो उक्त नरसंहारमा बाँच्न सफल भइन् । लडाईंको बेलामा हुटु लडाकाहरूले इलिबागिजाका प्राय: सबै आफन्तहरूलाई मारिदिएका थिए । उनले आफ्ना बुबाआमासाथै परिवारका अन्य सदस्यहरू गुमाएकी थिइन् ।

हाम्रो मानवीय स्वभाव बदलातिर लक्षित भए तापनि इलिबागिजाले आफ्नो परिवारका हत्याराहरूलाई क्षमा दिने छनौट गरिन् । सजिलो नभए तापनि उनले क्षमालाई नै रोजिन् । उनले एक जना हत्यारालाई व्यक्तिगत रूपमा आमनेसामने भेट गरिन् र आफूले त्यस हत्यारालाई क्षमा दिएको कुरो प्रत्यक्ष रूपमा व्यक्त गरिन् । उनी आज प्रेरणादायी वक्ता कहलाइएकी छिन् ।

९. स्टिभेन म्याकडोनाल्डको उदाहरण

स्टिभेन म्याकडोनाल्ड न्युयोर्क पुलिस विभागका गुप्तचर हुन् । १२ जुलाई १९८६ का दिन तिनी आफ्ना सहकर्मीसँगै न्युयोर्कस्थित सेन्ट्रल पार्कमा गस्ती गर्दै थिए । तिनीहरूले त्यहाँ साइकल चोरी भएको खबर पाएका थिए । १३–१५ वर्ष उमेरका तिन जना केटाहरू शंकास्पद देखिए । तिनीहरूसित सोधपुछ गर्ने क्रममा साभोद जोन्स नाउँ गरेका १५ वर्षे ठिटोले म्याकडोनाल्डलाई तिन गोली हान्यो । पहिलो गोली आँखामाथि टाउकोमा, दोस्रो गोली घाँटीमा र तेस्रो गोली मेरुदण्डमा लाग्न पुगे । तरै पनि  म्याकडोनाल्ड मरेनन् ।

उपचारपश्चात् डाक्टरहरूले म्याकडोनाल्डको जीवन बचाए । तर त्यस अनपेक्षित घटनाले तिनलाई सदाको लागि पक्षाघाती बनाइदियो । तिनले रेस्पिरेटरको माध्यमद्वारा मात्र सास फेर्न सक्ने भए ।

तर ह्दयमा वैमनस्य पाल्नुको साटो तिनले आफूलाई गोली हान्ने ठिटोलाई क्षमा दिए । तिनको क्षमा यति पूर्ण थियो कि जोनले झ्यालखानामा नै जेल जीवन बिताइरहँदा म्याकडोनाल्डले तिनलाई भेट्न खोजेका थिए यद्यपि त्यो सम्भव भएन ।

म्याकडोनाल्डका मित्रसाथै पास्टर जे. सी. अर्नोल्डद्वारा लिखित ह्वाइ फरगिभनेस ? नामक पुस्तकमा म्याकडोनाल्डले प्रस्तावना लेखेका छन् जसमा तिनले आफूले क्षमा दिनुको कारणलाई सबिस्तार ढङ्गमा प्रस्तुत गरेका छन् ।

१०. जुन गोन किमको उदाहरण

जुन गोन किम कोरियाई क्याम्पस क्रूसेड फर क्राइस्ट नामक ख्रीष्टियान संस्थाका संस्थापकसाथै प्रसिद्ध ख्रीष्टियान प्रचारक हुन् ।    

कोरियाई युद्ध (ख्रीष्टाब्द १९५०–१९५३) को समयमा साम्यवादी छापामारहरूले किम बसेको गाउँमा आक्रमण गरे । तिनीहरूले बुढाबुढी, स्त्री र बालबालिकाहरू गरी झण्डै ६० जनाको हत्या गरे । किमले चिनेका दस जना सिपाहीहरू किमको परिवारलाई मार्न खटाइएका थिए । तिनको आँखाको सामु तिनीहरूले तिनकी पत्नी र तिनका बुबाको हत्या गरे । किमलाई मरणासन्न हुने गरी पिटियो र मरे होलान् भनी छाडियो । पछि तिनी बिउँझे र छोरीसँगै सुरक्षाको लागि तिनी पहाडतर्फ भागे ।

आफ्ना शत्रुहरूलाई प्रेम गर्नुपर्छ र आफूलाई सतावट गर्नेहरूका लागि प्रार्थना गर्नुपर्छ भनी किमले बाइबल धर्मशास्त्रबाट सिके । परमेश्वरको आत्माले तिनलाई त्यही गाउँमा फर्केर जान प्रेरित गर्नुभयो, ती हत्याराहरूलाई क्षमा दिई तिनीहरूलाई परमेश्वरको सन्देश सुनाएर प्रभुमा डोर्‍याउन । किमले आफ्नै पत्नी र बुबाको हत्यारासहित ३० जना साम्यवादीहरूलाई प्रभुमा डोर्‍याए ।    

 

   

Leave Your Comments Here.