दाऊदलाई जनगणना लिन कसले सुर्‍यायो— परमप्रभुले (२ शमूएल २४:१) वा शैतानले (१ इतिहास २१:१–२) ?

२ शमूएलको पुस्तकअनुसार दाऊदलाई गणनाको लागि परमप्रभुले सुर्‍याउनुभयो, “फेरि परमप्रभुको क्रोध इस्राएलीहरूमाथि दन्कियो, अनि उहाँले दाऊदलाई तिनीहरूका विरुद्धमा सुर्‍याउनुभयो, र तिनलाई इस्राएल र यहूदाको गणना गर्नू भनी हुकुम गर्नुभयो” (२४:१) । तर १ इतिहासको अभिलेखमुताबिक गणनाको लागि दाऊदलाई शैतानले सुर्‍यायो, “शैतान इस्राएलको विरुद्ध उठेर दाऊदलाई आफ्नो प्रजा गन्नलाई सुर्यायो । यसैले तिनले योआब र आफ्ना फौजका अधिकृतहरूलाई बेर्शेबादेखि दानसम्मका इस्राएलीहरूको जनसंख्या लिएर तिनलाई बताउनू भनी आदेश दिए” (२१:१–२) । यी दुई ओटा विवरणलाई तुलना गरेर पढ्दा दाऊदलाई कसले जनगणना गर्न सुर्‍यायो भन्ने सम्बन्धमा विरोधाभास देखिन्छ ।

जनगणनाको पृष्ठभूमिबारे न २ शमूएलको पुस्तकमा न त १ इतिहासको पुस्तकमा केही बताइएको छ । यो कार्य दाऊदका छोरा अब्शालोमको विद्रोहअगि भयो या पछि भयो भनेर जान्ने कुनै उपाय छैन ।

तर यो प्रस्ट छ कि दाऊदले हासिल गरेको सैनिक सफलता र आर्थिक वृद्धिको कारणले तिनको ह्दयमा अहम्को महल खडा हुँदै थियो जसबारे तिनी पूर्णत: सचेत थिएनन् । जवान छँदा तिनले परमेश्वरमाथि पूर्ण रूपमा भरोस गर्थे भन्ने तथ्य तिनले गोल्यातसँग लडाइँ गरी त्यसमाथि प्राप्त गरेको विजयमा छर्लङ्ग हुन्छ । तर जीवनका पछिल्ला वर्षहरूमा दाऊदको भरोसा भौतिक स्रोतहरूमा बढ्दै गएको देखिन्छ । त्यसैले, परमेश्वरले दाऊदलाई पुन: एक चोटि घुँडा टेकाउन चाहनुहुन्थ्यो ।

जनगणना लिने काम आफैमा गलत होइन । मोशाको समयमा दुई ओटा जनगणना लिइएका थिए जसबाट परमेश्वर बेखुसी हुनुभएन (गन्ती १ र २६) ।

गणनाको लागि दाऊदलाई कसले सुर्‍यायो ? यसको उत्तर हुन्छ— परमेश्वर र शैतान दुवै । धर्मशास्त्रमा एउटै कार्य वा घटनाको लागि परमेश्वर र शैतान दुवै सामेल भएका अन्य नमुनाहरू पनि पाइन्छन् ।

अय्यूबको परीक्षामा परमेश्वरले शैतानलाई अनुमति दिनुभयो र त्यसले त्यस अनुमतिलाई कार्यान्वयन गर्‍यो अय्यूब १–२) यद्यपि शैतान र परमेश्वरका उद्देश्य बेग्लाबेग्लै थिए । त्यसै गरी, येशूको क्रूसारोहणमा पनि परमेश्वर र शैतान दुवै नै सामेल भए । शैतानको उद्देश्य परमेश्वरका पुत्रलाई नष्ट गर्नु थियो (यूहन्ना १३:२) जब कि परमेश्वरको उद्देश्य उहाँका पुत्रको मृत्युद्वारा मानव–जातिलाई छुटकारा दिनु थियो (प्रेरित २:१४–३९) ।  

शैतानमाथि पनि परमेश्वरको अधिकार छ भन्ने तथ्यलाई हामीले भुल्नु हुँदैन । शैतानले पहिले नै इच्छा गरेको कुरोलाई कार्यान्वयन गर्ने अनुमति दिएर परमेश्वरले आफ्नो आखिरी उद्देश्य पुरा गर्न सक्नुहुन्छ ।    

Leave Your Comments Here.