राजा दाऊदले अरौनाको खलालाई कतिमा किने— चाँदीका पचास सिक्कामा (२ शमूएल २४:२४) वा छ सय सुनका सिक्कामा (१ इतिहास २१:२५) ?

२ शमूएलको पुस्तकमा हामी पढ्छौँ, “तर राजा [दाऊद] ले अरौनालाई भने, ‘होइन, म ती तिमीबाट किन्नेछु । पैसा नपरेको चीज लिएर परमप्रभु मेरा परमेश्वरलाई म बलिदान चढाउनेछैनँ ।’ यसकारण दाऊदले त्यो खला र गोरुहरू चाँदीका पचास सिक्कामा किने” (२४:२४) । तर १ इतिहासको पुस्तकले बताउँछ, “यसैले त्यस जग्गाको निम्ति दाऊदले अरौनालाई छ सय सुनका सिक्का दिए, र तिनले त्यहाँ परमप्रभुको निम्ति एउटा वेदी बनाए” (२१:२५) । राजा दाऊदले अरौनाबाट खला कति मूल्यमा किने भन्ने सम्बन्धमा यहाँ विरोधाभास देखिन्छ ।

स्थापित परम्परामुताबिक यो खला मोरीयाह पर्वतमा पथ्र्यो जहाँ दाऊदले वेदी निर्माण गरी बलिदान चढाउन चाहेका थिए । तर यो जग्गा अरौना नाउँ गरेको व्यक्तिको सम्पत्ति थियो । दाऊदको चाहना बुझेपछि दाऊदलाई त्यो खला सित्तैँमा दिन अरौना इच्छुक भए तापनि दाऊदले दाम हालेर उक्त खला किने । स्मरण रहोस्, यही ठाउँमा अब्राहामले इसहाकलाई बलिदानको लागि लगेका थिए (उत्पत्ति २२:२) र पछि सोलोमनले वैभवशाली मन्दिर बनाएका थिए (१ इतिहास २२:१) । 

खला साधारणतया तिस वा चालिस फिटभन्दा बेसी फराकिलो हुँदैनथ्यो । प्राचीन इतिहासको कुनै पनि काल खण्डमा खलाको मूल्य छ सय सुनका सिक्का भएको ज्ञात छैन । छ सय सुनका सिक्का भनेको चाँदीका पचास सिक्काभन्दा झण्डै १८० गुणा बेसी हुन्छ ।

२ शमूएल र १ इतिहासको खण्डलाई होसियारीपूर्वक पढ्दा यहाँ कुनै अन्तर्विरोध पाईंदैन । २ शमूएलको अभिलेखले खला र गोरुहरूका लागि दाऊदले चाँदीका पचास सिक्का तिरे भनी बताउँछ भने १ इतिहासको अभिलेखअनुसार दाऊदले त्यस जग्गाको निम्ति अरौनालाई छ सय सुनका सिक्का दिए ।

तब हामी तर्कसङ्गत निष्कर्ष निकाल्न सक्छौँ कि दाऊदले तिरेको चाँदीका पचास सिक्का खला र गोरुहरूको मूल्य थियो भने छ सय सुनका सिक्का जग्गाको मूल्य थियो जुन जग्गामा खलावरिपरि भएका अन्य थुप्रै जमिनहरू पनि पर्थे ।     

Leave Your Comments Here.