मैले एक वर्षमा एक लाख दस हजारभन्दा बेसी शब्दहरू लेखेछु

तपाईंको नाउँ ?

कमल अधिकारी ।

तपाईंको Reasons to Believe नाउँ गरेको व्यक्तिगत ब्लग छ । के हो ब्लग भनेको हो ?

ब्लग एउटा व्यक्तिगत वेबसाइट हो जहाँ तपाईंले आफ्ना विचारहरू राख्न सक्नुहुन्छ ।

यो ब्लग कुन विषयमा केन्द्रित छ ?

यो मूलत: अपोलोजेटिक्स (अर्थात् रक्षाशास्त्र) सित सम्बन्धित छ ।

अपोलोजेटिक्स भनेको के हो ?

छोटकरीमा भन्नुपर्दा, ख्रीष्टियान विश्वासको बौद्धिक प्रस्तुतीकरण नै अपोलोजेटिक्स हो । एकातिर, हामी प्रश्नहरूको युगमा बाँचिरहेका छौँ जहाँ हाम्रा विश्वासबारे प्रश्नहरू तेर्साइन्छन् भने अर्कोतिर धर्मलाई अन्धविश्वासको दर्जा दिइन्छ जहाँ तर्कलाई ठाउँ दिईंदैन भनिन्छ । यस्तो अवस्थामा बाइबलिय, वैज्ञानिक, दार्शनिकसाथै ऐतिहासिक दृष्टिकोणबाट हाम्रो विश्वासलाई प्रस्तुत गर्ने काम गर्दछ अपोलोजेटिक्सले ।

यस ब्लगलाई तपाईंले कहिले खोल्नुभयो ?

पहिलो लेख ८ सेप्टेम्बर २०१४ अर्थात् ठिक एक वर्षअगि आजकै दिनमा पोस्ट गरिएकोले मैले यही दिनलाई यसको थालनी भएको दिनको रूपमा लिएको छु ।

ब्लग खोल्ने प्रेरणा कहाँबाट कसरी पाउनुभयो ?

मैले ब्लगको बारेमा पहिले नै सुनेको थिएँ  । एक दिन जगदिश पोखरेल भाइले आफ्नो ब्लगको एउटा कविता उहाँले चलाइरहनुभएको एउटा फेसबुक पेजमा पोस्ट गर्नुभएको देखेँ । क्लिक गरेर म उहाँको साइटभित्र प्रवेश गरेँ । मैले पनि यस्तै ब्लग खोलेर आफ्ना विचारहरू राख्ने प्लेटफर्म तयार पार्न पाए हुन्थ्यो भन्ने लाग्यो । जगदिश भाइलाई अनुरोध गरेँ, खोलिदिनका लागि । व्यस्तताका बाबजुत पनि उहाँले नाइँ भन्नुभएन । उहाँले ब्लगको जन्म गराइदिनुभयो । दिनहरू बित्दै जाँदा पूर्वका सुमन राई भाइको ब्लगसँग मेरो जम्काभेट भयो जसको लेआउटले मलाई आकर्षण गर्‍यो । मेरो अनुरोधलाई स्वीकार गरी भाइले नहिच्किचाइकन मेरो ब्लगलाई झण्डै उहाँको जस्तै आकार दिनुभयो । यसरी जगदिश भाइले जन्म दिनुभयो; सुमन भाइले न्वारन गरिदिनुभयो अनि मैले हुर्काउँदै आएको छ ।  

यो एक वर्षको अवधिमा कति ओटा लेख रचनाहरू पोस्ट गरिसक्नुभयो ?

योसहित गरेर ठ्याक्कै ३०१ ओटा पुगेछ । मैले हरेक दिन पोस्ट गर्ने रचनाको अभिलेख राख्ने गर्छु जसमा शब्दहरूको गणना पनि गरिन्छ । उक्त अभिलेखअनुसार मैले एक वर्षमा एक लाख दस हजारभन्दा बेसी शब्दहरू लेखेछु । निश्चय नै, यसमा मैले पहिले नै लेखेका केही पुराना रचनाहरूको पनि गणना भएका छन् ।

कुन–कुन देशमा बस्ने मानिसहरूले भिजिट गर्छन् तपाईंको ब्लगलाई ?

फ्ल्याग काउन्टरको प्रतिवेदनअनुसार हालसम्म ५८ ओटा देशका मानिसहरूले यो साइटलाई भिजिट गरिसकेका छन् जसमध्ये सबैभन्दा बेसी भिजिट गर्नेमा अमेरिका पर्दछ भने दोस्रोमा नेपाल । र, ब्लगको रिपोर्टअनुसार ७०,००० भन्दा बेसी पेजभिउ भइसकेछ । 

ब्लगको थालनीले तपाईंको लेखन कलामा ल्याएको उन्नति ?

ब्लग खोलेपछि हप्ताको कम से कम तिन ओटा लेख पोस्ट गर्ने मेरो योजना थियो । मैले गतिलाई बढाएँ र शनिबारबाहेक हरेक दिन केही न केही पोस्ट गर्ने जमर्को गरेँ र हालसम्म मेरो त्यो अनुशासनमा म सफल हुँदै आएको छु भन्दा अत्युक्ति हुँदैन । निसन्देह, ब्लगको जन्मअगि मैले लेख्ने गरेको भए तापनि ब्लगको जन्मपश्चात् क्रान्ति नै आयो । मैले जे प्राप्त गर्नेथिइनँ त्यो प्राप्त गरेँ भन्छु । गर्‍यो भने सकिँदोरहेछ भन्ने पाठ सिकेको छु । आफ्ना विचारहरू राख्ने ठाउँ पाएको छु । मैले लेखेका विषयहरूबारे म आफूलाई महान् ज्ञाता ठान्दिनँ । तर म एक सिकारु भन्न रुचाउँछु । म सिक्नको लागि लेख्छु । पहिले आफू सिक्छु अनि आफूले सिकेको कुरो अरूले पनि जानोस् भन्ने हेतुले पोस्ट गरिदिन्छु ।  

अन्त्यमा केही भन्न चाहनुहुन्छ कि ?

म मेरा सबै फ्यानहरूप्रति कृतज्ञ छु जसले यस ब्लगलाई लाइक गरिदिनुभएको छ; यसमा पोस्ट भएका रचनाहरूलाई पढिदिनुभएको छ; कमेन्ट गरिदिनुभएको छ र सेएर गरेर यसको सिमा क्षेत्रलाई बढाइदिनुभएको छ ।   

 

Leave Your Comments Here.