बाइबलले निर्माण गरेको उदाहरणीय गाउँ— सिमाबुकू

दोस्रो विश्वयुद्ध (ख्रीष्टाब्द १९३९–१९४५) मा अमेरिका र जापान एक अर्काका शत्रु थिए । दोस्रो विश्वयुद्धको अन्त्य नजिकिँदै थियो ।

जापानको ओकिनवा टापुस्थित एउटा गाउँ छ जसलाई सिमाबुकू भनेर चिनिन्छ । केही अमेरिकी सिपाहीहरू त्यहाँ पुगे । तिनीहरू गाउँमा प्रवेश गरिरहँदा तिनीहरूले पूर्णत: आक्रमणको अपेक्षा गरेका थिए जुन अस्वाभाविक थिएन । तर ती अमेरिकी सिपाहीहरू छक्क परे जब दुई जना भद्र भलादमी मानिसहरूले तिनीहरूको स्वागत गरे । तिनीहरूले शिर झुकाउँदै ती सिपाहीहरूलाई ख्रीष्टियान दाजुभाइको रूपमा निमन्त्रणा दिए । छक्क पर्दै ती गाउँलेका असल व्यवहारलाई विश्वास गर्न नसकेपछि ती सिपाहीहरूले तिनीहरूका पादरीलाई डाके ।

तिनीहरू सँगसँगै गाउँभित्र प्रवेश गरे । तिनीहरूले पहिले त्यस्तो कहिल्यै देखेका थिएनन् । ओकिनवा टापुका अन्य गाउँहरू फोहोर र दुर्गन्धित थिए अनि मानिसहरू गरिबी र अज्ञानतामा बाँचेका थिए । तर सिमाबुकू सफा र मनोहर थियो । गाउँलेहरूले प्रगति गरेका थिए र तिनीहरू खुसी थिए ।

के भएको रहेछ भन्ने कुरा ती सिपाहीहरूले पछि त्यही दिनमा थाहा पाए । तिस वर्षअगि एक जना अमेरिकी मिसनरी त्यो गाउँको बाटो भएर गएका रहेछन् । तिनी त्यहाँ छोटो समयको लागि बसेका रहेछन् जुन बेला तिनले दुई जना मानिसलाई प्रभुमा जितेका रहेछन्: सोसी किना र तिनका भाइ मोजोन । मिसनरीले तिनीहरूको हातमा जापानी भाषामा अनुवाद गरिएको एउटा बाइबल दिएर त्यहाँबाट प्रस्थान गरेका रहेछन् ।

यस अवधिमा ती दाजुभाइले अन्य कुनै ख्रीष्टियानलाई भेटेनन् । तर बाइबल पढेर तिनीहरू ख्रीष्टप्रति यति समर्पित भएका थिए कि तिनीहरूले त्यस गाउँमा उदाहरणीय जीवन जिए ।

सोसी किना गाउँले प्रमुख बने भने मोजोन मुख्य शिक्षक । तिनीहरूको प्रभावमा परेर प्रत्येक गाउँले ख्रीष्टियान भयो ।

बाइबलका आदेशहरू नै तिनीहरूका कानुन थिए । गाउँको जीवन पूर्णत: परिवर्तन भएको थियो । तिनीहरू एकले अर्कालाई श्रेष्ठ ठान्थे र दाजुभाइ भनी सम्बोधन गर्थे । त्यहाँ संसारकै सर्वोत्तम प्रजातन्त्र अभ्यास भइरहेको थियो । दस आज्ञा र डाँडाको उपदेशलाई तिनीहरूले कानुन र नीतिशास्त्र बनाएका थिए । किनाको स्कुलमा बाइबललाई मुख्य साहित्य बनाइएको थियो । त्यसलाई दैनिक पढिन्थ्यो ।

यस्तो अभ्यासले के नतिजा ल्याएको थियो त ? सिमाबुकूमा वर्षौंसम्म कुनै जेलको आवश्यक परेन; कुनै वेश्यालय थिएन; मद्यपान थिएन; सम्बन्धविच्छेद थिएन । त्यहाँ उच्च स्तरको स्वास्थ्य र खुसी थियो ।

के यो बाइबलको रूपान्तरण गर्न सक्ने शक्तिको प्रस्ट उदाहरण होइन र ?  

Leave Your Comments Here.