आफ्नी छोरीहरूसँग लोतको यौन सम्बन्धलाई के बाइबलले अनुमोदन गर्छ (उत्पत्ति १९:३०–३८) ?

परमेश्वरले सदोम र गमोरालाई नष्ट गर्नुअगि लोत र तिनका छोरीहरू परमेश्वरको प्रकाश पाएर सदोमबाट भाग्न सफल भएका थिए । यात्रामा लोतकी पत्नी अनाज्ञाकारी भएकीले उनको विनाश हुन पुग्यो । लोत आफ्नी दुई छोरीका साथमा पहाडमा गएर बस्न लागे । संसारको रीतिबमोजिम लोतका छोरीहरूले पतिहरू नपाउने डरले तिनीहरूले पितालाई मताएर आफ्ना पिताबाट सन्तान जन्माउने षड्यन्त्र रचे । उत्पत्तिको उक्त विवरणअनुसार जेठी र कान्छीबाट क्रमश: मोआब र बेन–अमी नाउँका छोराहरू जन्मे ।  

लोत र तिनका छोरीहरूले पाप गरे भन्ने कुरामा कुनै प्रश्नै छैन । तर हामीले के भुल्नुहुँदैन भने बाइबलमा उल्लिखित हरेक कुरोलाई बाइबलले अनुमोदन गर्दैन । बाइबलको काम त यसले जस्तो देख्छ त्यस्तै लेख्छ । त्यसकारण, बाइबलमा प्रभुका महान् दासहरूका कमजोरीसाथै पापहरू पनि उदाङ्गो पारिएका छन् । तर ती हाम्रो अनुसरणको लागि भने अवश्य होइन । लोत र तिनका छोरीहरूको क्रियाकलाप ठिक भएकोले त्यसलाई बाइबलमा लेखिएको होइन तर त्यो घट्न पुगेकोले उल्लेख गरिएको हो । बाइबलले यस्तो अधर्मको समर्थन गर्दैन । यस वाक्यलाई ध्यान दिएर पढ्नुस्:  बाइबल धर्मशास्त्रको सत्यता यसले जे प्रकट गर्छ त्यसमा पाइन्छ यसले जे अभिलिखित गर्छ त्यसमा होइन । यस भिन्नतालाई बुझिएन भने बाइबलले पाप गर्न सिकाउँछ भनी गलत किसिमले निष्कर्ष निकाल्नुपर्ने हुन्छ । परमेश्वरको इच्छाबाट होइन तर आफ्ना स्वार्थी इच्छाबाट उब्जेका यस्ता दुष्ट कार्यहरू हामीले नदोहोर्‍याऔँ भनेर ती “हाम्रै शिक्षाको निम्ति लेखिएका हुन्” (१ कोरिन्थी १०:११) ।

Leave Your Comments Here.