ख्रीष्टियान अगुवालाई धम्क्याउने अविश्वासी अन्तत: ख्रीष्टको चेला बने

उन्नाइसौँ शताब्दीका अमेरिकाका ख्याति प्राप्त प्रचारकसाथै प्रकाशकको नाउँ हो, डी. एल. मुडी । मुडी बाइबल इन्स्टिच्युटसाथै मुडी प्रकाशनका संस्थापक मुडीले मुडी चर्च पनि स्थापना गरेका थिए । सुसमाचारको निम्ति प्रतिबद्ध मुडीले हरेक दिन कम्तीमा एक जना व्यक्तिलाई येशूको बारेमा बताउने करार नै बाँधेका थिए परमेश्वरसित ।

एक रातको कुरो हो । झण्डै दस बजिसकेको हुन्छ । मुडीले त्यस दिन सुसमाचार नै नसुनाएको याद गरे तिनले । तिनी राती नै सडकमा निस्के । सिकागोस्थित लेक स्ट्रिट नामक सडकमा राखिएको बत्तीको खम्बानेर उभिएको मान्छेलाई तिनले सोधे, “के तपाईं ख्रीष्टियान हुनुहुन्छ ?” त्यो मान्छे रिसले चुर भयो । उसले मुडीलाई नालामा फ्याँकिदिने धम्की दियो ।

पछि त्यो मान्छे मण्डलीको एल्डरकहाँ गयो र मुडीको विषयमा उसले गुनासो पोख्यो, “सिकागोमा दस जना मानिसले गरेको भलाइभन्दा मुडी एकलैले बेसी हानि गर्दै छन् ।” आफ्नो उत्साहलाई काबुमा राख्न एल्डरले मुडीलाई बिन्ती गरे । तिन महिनापछि वाईएमसीए नामक सङ्गठनको अफिसमा कसैले ढोका ढकढक गर्‍यो र मुडी ब्युँझिए । यो त्यही मानिस थियो जसलाई मुडीले सुसमाचार सुनाएका थिए । उसले मुडीलाई भन्यो, “मेरो आत्माको बारेमा म तपाईंसँग कुराकानी गर्न चाहन्छु ।” मुडीसित आफूले गरेको रुखो व्यवहारप्रति उसले खेद प्रकट गर्‍यो । मुडीले सुसमाचार सुनाएको रातदेखि उसलाई चैन भएको थिएन भनेर पनि उसले बतायो । मुडीले उसलाई प्रभुमा डोर्‍याए र ऊ मण्डलीको जोसिलो सेवक बन्यो ।         

Leave Your Comments Here.