चिठीमार्फत परमेश्वरले घर भाडा र खानाको लागि रकम जुटाइदिनुभयो

तिनले आफूलाई इङ्गल्यान्डको राजधानी लन्डनमा तयार पार्दै थिए, नेपालको छिमेकी मुलुकमा मिसनरी भई प्रभुको सेवा गर्न । त्यसै क्रममा तिनको भेट एउटा गरिब परिवारसँग भयो । घर मुलीले ती प्रभुका जनलाई प्रार्थनाको लागि अनुरोध गरे । तिनकी पत्नी सिकिस्त थिइन् जो उठेर बस्न पनि सक्दिनथिइन् । जेठोचाहिँले भर्खरै जन्मेको बच्चालाई बोकिरहेको थियो । त्यो शिशु पोषणको कमीले कमजोर भएको थियो । खानाको कमीले बाँकी पाँच जना सन्तानका शरीरमा छाला र हड्डीसिवाय केही देखिँदैनथ्यो ।

ती प्रभुका जनले उक्त परिवारको लागि प्रार्थना त गरे तर तिनी बेचैन भए । भौतिक रूपमा नै केही सहयोग गर्नुपर्छ भन्ने लाग्यो तिनलाई । तिनीसँग भाडाको लागि तिर्न राखिएको पैसा मात्र थियो । त्यही पैसा पनि तिनले भोलिपल्ट तिर्नुपर्ने थियो । ती प्रभुका जनसँग आफ्नै खानाको लागि पनि पैसा थिएन । तथापि तिनले आफूसित भएका सबै रुपियाँ ती गरिब मानिसलाई दिए ।

ती प्रभुका जन घर फर्के । आफूले मूर्ख काम गरेको जस्तो लाग्यो तिनलाई । भाडा नतिरेको खण्डमा तिनी आफै नै घरविहीन हुनेथिए । तिनले परमेश्वरलाई बिन्ती चढाए र भाडा माग्न आउने घरधनीलाई के भन्ने भनी आफूलाई तयार पारे ।

भोलि पल्ट बिहान घरधनी आए र तिनले प्रभुका जनको हातमा एउटा चिठी थमाइदिँदै यसो भने, “तिमीले आज भाडा तिर्नुपर्छ ।” आफ्नो समस्याबारे बताउन नपाउँदै ती घर धनी आफ्ना कामधन्दामा लागे । चिठी खोलेर हेर्दा प्रभुका जन तिन छक खाए, “तिमीलाई यसको काम लाग्नेछ भनी हामी आशा गर्दछौँ ।” त्यहाँ तिनको भाडा र खानाको लागि पैसा राखिएको रहेछ ।

ती प्रभुका जनको नाउँ हो— हडसन टेलर । ख्रीष्टाब्द १८३२ मा इङ्गल्यान्डमा जन्मेका टेलर चीनमा मिसनरी भएर आएका थिए जुन भूमिमा तिनले ५१ वर्ष बिताए ।     

Leave Your Comments Here.