जर्ज मुलर: विश्वासका महानायक

दस वर्ष लागेपछि तिनले आफ्ना पिताको गोजीबाट पैसा चोर्न थाले । त्यसलाई विकास गरी तिनले आफ्ना मित्रहरूबाट पनि पैसा चोर्न लागे । स्कुलमा अध्ययन गर्दा चोरीको आरोपमा तिनलाई तिन हप्ता झ्यालखानामा पनि हालियो । त्यस्ता कुलतहरूलाई मिल्काउने सङ्कल्प गरे तापनि तिनले सजिलैसित छुटकारा पाउन सकेनन् । पछि पास्टर बन्नलाई तिनी हेल विश्वविद्यालयमा भर्ना भए । बेटा नाउँ गरेका तिनका मित्रले तिनलाई बाइबल अध्ययन हुने सभामा निमन्त्रणा दिए । त्यो क्षण तिनको जीवनमा निर्णायक मोड साबित हुन पुग्यो । त्यस दिनदेखि तिनले आफ्ना खराब आदतहरूलाई पन्छाई तिनी ख्रीष्टको लागि खडा भए । तिनको नाउँ हो— जर्ज मुलर ।

जर्ज मुलर सुसमाचार प्रचारक, मिसनरीसाथै अनाथालयका निर्देशक हुन् । इङ्गल्यान्डको ब्रिस्टोलस्थित अस्ले डाउन अनाथालयका निर्देशक मुलर विश्वासका महानायक हुन् । तिनले आफ्नो जीवन कालमा १०,००० भन्दा बेसी अनाथहरूको हेरचाह गरे । तिनले ११७ ओटा स्कुलको स्थापना गरे जसले १,२०,००० भन्दा बढी बाल बालिकाहरूलाई ख्रीष्टियान शिक्षा उपलब्ध गराए । ती शिक्षा पाउनेहरूमध्ये अधिकांश अनाथहरू थिए ।

२७ सेप्टेम्बर १८०५ मा जर्मनीमा जन्मेका जर्ज मुलर २४ वर्षको उमेरमा मिसनरी हुने सोच राखेर इङ्गल्यान्ड लागे तर तिनी पास्टर बने ।

ख्रीष्टाब्द १८३० मा मुलर मेरी ग्रोभ्ससित वैवाहिक सम्बन्धमा बाँधिए । विवाहको तिन हप्तापश्चात् तिनीहरूले पास्टरीय सेवाको लागि तनखा नलिने निर्णय गरे । आफ्ना खाँचाहरूका लागि केवल परमेश्वरमा भर पर्ने निर्णय लिए ती नवदम्पतीले ।

मुलरको समयमा अनाथहरूलाई कसैले हेरचाह गर्दैनथ्यो । बाँच्नका लागि तिनीहरूले कि माग्नुपथ्र्यो कि भने चोर्नुपथ्र्यो । मानिसहरूले तिनीहरूमाथि दया देखाउँदैनथ्ये । सरकारले तिनीहरूलाई काम गर्नुपर्ने घरमा राख्थ्यो जहाँ तिनीहरूले लामो समयसम्म कठिन कामहरू पनि गर्नुपर्ने हुन्थ्यो । १८३५ सम्ममा पुरै इङ्गल्यान्डमा दर्जन जति अनाथालयहरू मात्र थिए जहाँ बस्न शुल्क लाग्थ्यो । स्वाभाविक नै हो कि गरिबहरू पैसा तिरेर त्यस्ता आश्रमहरूमा बस्न सक्दैनथ्ये ।

जर्ज मुलरले अनाथालयको थालनीको लागि प्रार्थना गर्न सुरु गरे । परमेश्वरले प्रार्थना सुन्नुभयो । सबै बन्दोवस्त भयो । तिनले स्थापना गरेको पहिलो अनाथालयमा ३० जना केटीहरू थिए । त्यसपछि दोस्रो अनि तेस्रो अनाथ आश्रम पनि खोलिए ।

अन्तत: ब्रिस्टोलको उत्तरमा पर्ने अस्ले डाउन नामक क्षेत्रमा तिनले अनाथालयको लागि केही जमिन किने । त्यहीँ तिनले अस्ले डाउन अनाथालयको स्थापना गरे जहाँबाट हजारौँ अनाथ बाल बालिकाहरूले हुर्कने अवसर पाए ।

परमेश्वरका अन्य भक्त सेवकहरूलेझैँ मुलरले पनि दु:खलाई नजिकैबाट अनुभूति गरेका थिए । तिनीबाट जन्मेका चार जना सन्तानमध्ये दुई जना मृत जन्मे । मुलर दम्पतीले तिनीहरूको छोरो एलियालाई निमोनियाको कारणले गुमाउनुपर्‍यो । त्यति ठुलो सङ्ख्यामा अनाथहरूको हेरचाह गर्ने क्रममा तिनीहरूका खाँचा पूर्ति गर्न तिनले झेलेका कठिनाइहरूले हाम्रा आँखाबाट आँसु बर्सन्छ ।

तथापि मुलर विश्वासका महानायक थिए । तिनी हरेक कुरोको निम्ति परमेश्वरलाई बिन्ति चढाउँथे । तिनले जीवनमा परमेश्वरबाट हजारौँ प्रार्थनाका जवाफहरू पाए । परमेश्वरमाथि भएको तिनको विश्वास लाखौँ विश्वासीहरूका लागि प्रेरणा बनेको छ । हडसन टेलर, चाल्र्स स्परजिनजस्ता ख्रीष्टियान जगत्का नायकहरूले मुलरबाट सल्लाह लिन्थे ।

अनाथहरूको हेरचाहका अतिरिक्त मुलरले बाइबल र पर्चाहरू छाप्नका लागि रकम सहयोग गर्थे । तिनले २,५०,००० भन्दा बेसी बाइबलहरू चन्दास्वरूप दिए । तिनले जीवनमा प्रार्थनाद्वारा झण्डै १३ अरब बराबरको नेपाली रुपियाँ जुटाए र ती सबै प्रभुको कामको लागि खर्चे । तिनको मृत्यु हुँदा तिनीसित थोरै पैसा मात्र बाँकी थियो ।

१० मार्च १८९८ का दिन ९२ वर्षको उमेरमा मुलरको निधन भयो । तिनको सम्मानको लागि हजारौँ मानिसहरू सडकमा लस्कर लागेका थिए । दुई हजार अनाथ केटाकेटीहरू उपस्थित थिए ।  

    

Leave Your Comments Here.