शत्रुको खप्परलाई सिरानी बनाउने डरलाग्दो जातिलाई बदल्यो सुसमाचारले

ख्रीष्टाब्द १९३५ मा क्यानडामा जन्मेका डन रिचार्डसन मिसनरी, शिक्षक, लेखकसाथै प्रभावशाली वक्ता हुन् । १९६२ मा तिनी आफ्नी पत्नी क्यारोल र सात महिनाको शिशुलाई लिएर पपुआ न्युगिनी गए जुन इन्डोनेसियाको पश्चिममा पर्छ ।

मिसनरीको रूपमा रिचार्डसन येशू ख्रीष्टको सुसमाचार लिएर न्युगिनीमा बस्ने सवी भन्ने आदिवासीको बिचमा गएका थिए । यो एउटा क्रूर जाति थियो; तिनीहरूले मान्छेको शिकार गर्थे; मान्छेको मासु खाने गर्थे र शत्रुका खप्परलाई सिरानी बनाउँथे । त्यस्ता गँवारहरूको बिचमा बसेर सेवा–कार्य गर्न सजिलो थिएन । तिनीहरूलाई स्वास्थ्यसम्बन्धी ज्ञान नभएकाले तिनीहरूको बिचमा बसेर सेवा गर्दा एकातिर रोगको सङ्क्रमणको डर हुन्थ्यो भने अर्कोतिर हिंसा तिनीहरूको संस्कृति थियो ।

सवी भाषा सिक्न निकै जटिल थियो । तथापि अटुट अनुशासन र कडा मेहनतको परिणाम स्वरूप रिचार्डसन स्थानीय भाषामा पोख्त भए । तिनले बाइबलबाट गाउँलेहरूलाई येशूको महानतबारे बुझाउने कोसिस गरे तर तिनीहरूको फरक मूल्य–मान्यताको कारणले तिनीहरूलाई बुझाउन मिसनरीलाई हम्मेहम्मे परिरहेको थियो । तिनीहरूको दृष्टिकोणमा येशूलाई धोका दिने यहूदा इस्करियोत पो हिरो थियो, मानव–जातिको पापको लागि मर्नुहुने येशू होइन । तिनीहरूको संस्कृति छल र कपटमा निर्माण भएकोले तिनीहरूको बुझाइ नितान्त फरक थियो ।

अन्तत: परमेश्वरले रिचार्डसनको मेहनतलाई कदर गर्नुभयो ।  त्यहाँका स्थानीयहरूले येशूको महानतालाई वास्तवमै बुझ्न सके । सवी भाषामा अनुवाद गरिएको नयाँ करार छापियो । धेरै स्थानीयहरूले येशूमाथि विश्वास गरे र आज तिनीहरूको बिचमा मण्डली स्थापित छन् । तिनीहरू सभ्यताको पाइलामा कदम चाल्दै छन् ।      

Leave Your Comments Here.