पास्टरको उत्साहद्वारा जवान ठिटो प्रसिद्ध मिसनरी बने

सेवाको मूल्याङ्कन गर्ने निरीक्षकले विश्वासयोग्य पास्टरसँग गुनासे गरे, “तपाईंको मण्डलीमा यो वर्षभरि जम्मा एक जनाले मात्र विश्वास गरेको छ । त्यो पनि केटो !”

त्यस्तो कुरो सुनेपछि त्यही दिन गरुङ्गो ह्दय लिएर पास्टरले प्रार्थना गरिरहँदा कोही व्यक्ति तिनीकहाँ आएको तिनले थाहा पाए । ती अरू कोही नभएर त्यही ठिटो थिए ।

ठिटोले भने, “पास्टर बा, तपाईंको विचारमा के कुनै दिन म प्रचारक वा मिसनरी बन्छु होला ?”

त्यस विषयमा प्रार्थना गर्न र परमेश्वरको इच्छाको खोजी गर्न पास्टरले केटोलाई उत्साह दिए । यी तिनै ठिटा थिए जसलाई पछि विश्वले रोबर्ट मोफाटको नाउँले चिन्यो ।

अठारौँ शताब्दीको अन्त्यतिर स्कटल्यान्डमा जन्मेका रोबर्ट मोफाट अफ्रिकामा मिसनरी भएर गएका थिए । विश्व प्रसिद्ध मिसनरी डेभिड लिभिङ्गस्टोनका ससुरा मोफाट सेत्सवाना भाषामा बाइबललाई अनुवाद गर्ने प्रथम अनुवादक हुन् ।

कथा यहीँ टुङ्गिदैन । वर्षौं बितेपछि मोफाटले एउटा मण्डलीमा प्रचार गरिरहेका थिए जहाँ एक जवान मानिसले पनि उपस्थिति जनाएको थियो । मोफाटको प्रचारद्वारा ती जवान मानिस औधी प्रभावित भए । ती थिए— डेभिड लिभिङ्गस्टोन ।

उन्नाइसौँ शताब्दीको पूर्वाद्धमा स्कटल्यान्डमा जन्मेका लिभिङ्गस्टोन मिसनरीसाथै अन्वेषक थिए । मिसनरी गाथामा तिनको नाउँ स्वर्णीम अक्षरले लेखिएका छन् । तिनी हिरो हुन् । अफ्रिकाका लागि मिसनरी भएर गएका यी नायकलाई थरीथरीका पदवीले रङ्ग्याउँदा पनि अपुरै हुन्छ: मिसनरी, सहिद, डाक्टर, वैज्ञानिक अनुसन्धानकर्तासाथै अन्वेषक, साम्राज्य सुधारवादी, दास प्रथा विरुद्धको अभियन्ता आदि । 

यी सबै फल हात पार्नुको पछाडिको कथा थियो— ती विश्वासयोग्य पास्टरले ती जवान मानिसलाई उत्साह दिएका थिए ।  

Leave Your Comments Here.