परमेश्वरद्वारा रेलको लिकबाट बचाइएका भक्त हिन्दु पक्का ख्रीष्टियान बने

तिनी जन्मैदेखि भक्त हिन्दु थिए यद्यपि तिनले शिक्षा भने  भारतको न्यु दिल्लीस्थित मिसनरी स्कुलमा पाएका थिए । तिनले येशू ख्रीष्टको बारेमा सिकेका थिए र उहाँलाई स्वीकार गर्ने निमन्त्रणा पनि दिइएको थियो तिनलाई । तर तिनले येशूलाई आफ्नो व्यक्तिगत मुक्तिदाता भनेर स्वीकार भने गरिसकेका थिएनन् ।

चिकित्सा क्षेत्रमा योग्य बनेपछि तिनले अस्पतालमा काम गर्न थाले । तिनी अविवाहित थिए । तिनी अस्पतालको सामुन्ने बस्थे र बिचमा रेलको लिक पथ्र्यो । तिनी रेलको लिक पार गरी दैनिक हिँडेर काम गर्न जान्थे ।

यो ख्रीष्टाब्द १९४० को दसकको कुरो हो । हरियो सिग्नल पाउने बित्तिकै गुड्न तयार भएर एउटा रेल लिकमा बसिरहेको थियो । तिनलाई अस्पताल जान हतार भइरहेको थियो । त्यसैले रेलका दुई ओटा डिब्बालाई जोड्ने मुन्तिर भएको खाली ठाउँबाट छिरी तिनले अर्को किनारामा जाने खतरा मोले । तिनी अर्को किनारमा पुग्न मात्र लाग्दा रेल गुड्न थाल्यो । तिनी फर्केका भए या अगाडि बढेका भए रेलको चक्काले तिनलाई दुई टुक्रा पारिदिन्थ्यो । विना सोचविचार तिनले तुरुन्तै लिकमुनि पल्टने निर्णय लिए । रेल तिनीमाथि कुदिरहँदा तिनी डरले काम्दै थिए । तिनले परमेश्वरको उपस्थितिको महसुस गरे र परमेश्वरले त्यसबाट बचाउनुभएको खण्डमा तिनले आफ्नो जीवन परमेश्वरमा अर्पण गर्ने निधो गरे । रेल गइसकेपछि तिनलाई हेर्न आउने दर्शकहरूको घुइँचो लाग्यो । दर्शकहरूको लागि त्यो एउटा विस्मयकारी घटना थियो । तिनीहरूको बुझाइमा तिनी मरेर बाँचेका थिए । 

परमेश्वरले तिनलाई शारीरिक रूपमा मात्र नभएर आत्मिक रूपमा पनि बचाउननुभयो । दिल्लीस्थित म्याथोडिस्ट मण्डलीको सन्डे स्कुलका निर्देशकका रूपमा बिसौँ शताब्दीको अन्त्यतिर तिनी प्रभुमा सुते ।

Leave Your Comments Here.