कट्टरवादी हिन्दु परिवारमा जन्मेकी शताब्दीले नयाँ करार पढेपछि येशूलाई पाइन्

उनको नाउँ हो, शताब्दी । उनी भारतको कलकत्तामा एउटा कट्टरवादी हिन्दु परिवारमा जन्मेकी थिइन् । सबै धर्मले उही गन्तव्यमा पुर्‍याउँछन् र सबैले विभिन्न नामद्वारा उही ईश्वरलाई पुजेका छन् भन्ने उनको परिवारको विश्वास रहेको थियो ।

शताब्दीले एउटा ख्याति प्राप्त हिन्दु स्कुलमा दस कक्षासम्म अध्ययन गरिन् । पछि थप अध्ययनको लागि उनलाई एउटा ख्रीष्टियान स्कुलमा स्थानान्तरण गरियो । त्यहीँ उनले बाइबलको नयाँ करार हात पारिन् । उनले पढ्न थालिन् । सुसमाचारहरूलाई पढेपछि उनले येशूलाई पनि एक जना हिन्दु गुरुजस्तै देखिन् । तर रोमीको पुस्तक पढ्न थालेपछि उनको ह्दय परिवर्तन भयो । उनले आफूलाई मूर्तिपूजकको रूपमा देखिन् । उनको बुझाइमा उनी पापी थिइन् । २,००० वर्षअगि लेखिएको पुस्तकले आधुनिक समाजको चित्रण गरेको देख्दा उनी छक्क परिन् ।

धर्मी ठहरिन खोज्ने शताब्दीका सबै प्रयास व्यर्थ थिए भनी रोमीको पुस्तक पढ्दा उनले पत्ता लगाइन् । शिरदेखि पाउसम्म उनी पापको सागरमा डुबेकी रहिछन् भनी रोमी ३ ले उनलाई छर्लङ्ग पार्‍यो । पढ्दै जाँदा यी वचनहरूले उनको ध्यानाकर्षण गरे, “किनकि हामी दुर्बल हुँदा नै ख्रीष्ट अधर्मीहरूका निम्ति ठीक समयमा मर्नुभयो । धार्मिक मानिसको निम्ति मर्न तयार हुने कोही बिरलै पाइएला, कतै असल मानिसको निम्ति कसैले मर्ने आँट गरी पनि हाल्ला । तर परमेश्वरले हाम्रा निम्ति उहाँको प्रेम यसैमा देखाउनुहुन्छ, कि हामी पापी छँदै ख्रीष्ट हाम्रा निम्ति मर्नुभयो” (रोमी ५:६–८) ।

यी पदहरूमा परमेश्वरले उनलाई गर्नुभएको प्रेमको गहिराइ अभिलिखित थियो । उनले गरेका सबै पापका निम्ति प्रभुले दु:ख भोग्नुभएको थियो र मर्नुभएको थियो भनी उनले बुझिन् । उनले आफ्नो जीवन येशूमा सुम्पिन् र उनी नयाँ सृष्टि बनिन् ।

शताब्दीको आत्मिक यात्राको आरम्भ भयो । उनी बाइबल अध्ययनको लागि बेङ्गलोरमा गइन् । स्नातकोत्तर पुरा गरेपछि उनी भारतको उत्तरी क्षेत्रमा गइन्, मिसनरी बनेर ।      

Leave Your Comments Here.

येशू ख्रीष्टको पुनरुत्थान संसारको इतिहासमा घटेको एकल महानतम घटना हो

जोन माकार्थुर पास्टर, लेखकसाथै कलेज प्रमुख हुन् । व्याख्यात्मक प्रवचनका दृढ हिमायती माकार्थुरले १५० ओटा भन्दा बढी पुस्तक लेख्नुकासाथै सम्पादन गरिसकेका छन् । १० लाखभन्दा बेसी बिक्री हुन सफल तिनको माकार्थुर स्टडी बाइबलले स्वर्ण पदक जितेको छ । ग्रेस टु यु नामक रेडियो कार्यक्रमको लागि तिनी संसारभर प्रसिद्ध छन् । १९३९ मा अमेरिकामा जन्मेका माकार्थुरले नयाँ करारमाथि श्रृङ्खलाबद्ध रूपमा टिप्पणी गरेका छन् । तिनका टिप्पणीहरू पनि दस लाखभन्दा बेसीको सङ्ख्यामा बेचिएका छन् । मत्तीको सुसमाचार २८ अध्यायमा अभिलिखित येशूको पुनरुत्थानबारे तिनले सठिक ढङ्गमा टिप्पणी गरेका छन्:

येशू ख्रीष्टको पुनरुत्थान संसारको इतिहासमा घटेको एकल महानतम घटना हो । ख्रीष्टियमतको लागि यो यति आधारभूत छ कि यसलाई इन्कार गर्ने व्यक्ति कोही पनि साँचो ख्रीष्टियान हुन सक्दैन । पुनरुत्थानविना ख्रीष्टियान विश्वास, उद्धार र आशा अस्तित्वमा रहँदैनन् । ‘तर यदि मृतकहरूको पुनरुत्थान हुँदैन भनेता’ पावल व्याख्या गर्छन्, ‘ख्रीष्ट पनि मृतकबाट पुनर्जीवित पारिनुभएको होइन । यदि ख्रीष्ट मृतकबाट पुनर्जीवित पारिनुभएको होइन भनेता हाम्रो प्रचार व्यर्थ हुन्छ, र तिमीहरूको विश्वास पनि व्यर्थ हुन्छ’ (१ कोरिन्थी १५:१३–१४) । पुनरुत्थान नभएको ख्रीष्टमाथि विश्वास गर्ने व्यक्तिले शक्तिविहीनसाथै मरेको ख्रीष्टमाथि विश्वास गर्दछ । यदि ख्रीष्ट मृतकहरूबाट पुनर्जीवित पारिनुभएको होइन भने क्रूसमा कुनै छुटकारा सम्पन्न भएन र ‘तिमीहरूको विश्वास पनि व्यर्थ हुन्छ’ पावल जारी राख्छन्, ‘तिमीहरू अझसम्म आफ्ना पापमा नै छौ’ (पद १७) ।  

Leave Your Comments Here.

२ अरब बाइबल वितरण गर्ने गिदोन संस्था यसरी स्थापना भएको थियो

अमेरिकाको बोसकोबेलमा अवस्थित सेन्ट्रल हाउस होटलमा दुई जना व्यापारी आइपुगे । ती व्यापारीहरू थिए: जोन एच. निकोल्सन र समुएल ई. हिल । तिनीहरू रात बिताउनका लागि उक्त व्यस्त होटलमा आइपुगेका थिए । ती दुवैले एक अर्कालाई पहिले कहिल्यै भेटेका थिएनन् । तर होटलमा एउटै मात्र कोठा खाली थियो जहाँ दुई जना सुत्न मिल्थ्यो । दुवै जनाले उही कोठामा सुत्ने निधो गरे ।

कुराकानी गर्ने क्रममा तिनीहरूले पत्ता लगाए कि ती दुवैको विश्वास एउटै रहेछ । ख्रीष्टियान व्यापारीहरूको लागि सुसमाचार सुनाउने संस्था खोल्नका लागि दुवै जना उत्साही रहेछन् । तिनीहरूले सँगसँगै मिलेर काम गर्ने निर्णय लिए ।

अर्को वर्ष “पारस्परिक पहिचान, व्यक्तिगत सुसमाचार प्रचार र प्रभुको लागि एकीकृत सेवा” को निम्ति रुचि राख्ने मानिसहरूको लागि एउटा बैठक डाकियो । त्यस बैठकमा थप एक जना मान्छे मात्र देखा परे जसको नाउँ थियो, विलियम जे. नाइट्स । तिनीहरूले स्थापना गर्न खोजिएको संस्थाको नाउँ गिदोन राखियोस् भनी विलियमले सल्लाह दिए । गिदोन पुरानो करारका न्यायकर्ता थिए जसले विशाल सेनालाई पराजित गर्न थोरै मानिसहरूको झुण्डलाई अगुवाइ गरेका थिए (न्यायकर्ता ६ अध्याय) । 

यसरी ख्रीष्टाब्द १८९९ मा एउटा संस्थाको जन्म हुन पुगेको थियो जसलाई अहिले गिदोन्स इन्टरनेस्नल भनेर चिनिन्छ । बाइबललाई सित्तैँमा वितरण गर्नु यसको प्राथमिक काम हो । नेपाललगायत २०० भन्दा बेसी मुलुकहरूमा यस संस्थाले आफ्नो सेवालाई जारी राखेको छ । 

१९०८ देखि बाइबल वितरण गर्न थालेको यस संस्थाले २००१ सम्म आइपुग्दा १ अरब बाइबल वितरण गरेको थियो । तर त्यसपछि भने यो निकै सक्रिय देखा पर्‍यो किनकि २००२ देखि २०१५ सम्म यसले अर्को एक अरब बाइबल वितरण गर्‍यो । यसरी पहिलो एक अरब बाइबल वितरण गर्न यसलाई ९३ वर्ष लागेको थियो जब कि दोस्रो एक अरब वितरण गर्न केवल १४ वर्ष । हालसम्म २ अरब बाइबल वितरण गरेको गिदोनले यसका सदस्यहरूमार्फत प्रत्येक सेकेन्डमा दुई ओटा बाइबल वितरण गर्दछ । यस संस्थाले वितरण गरेका बाइबलहरूले मानिसहरूको जीवनमा व्यापक प्रभाव पारेको देखिन्छ ।      

Leave Your Comments Here.

एउटा बाइबलद्वारा परिवर्तित व्यक्ति जो अमेरिकाकै सर्वाधिक ठुलो मण्डलीको पास्टर बनेका छन्

त्यस बेला तिनी विद्यार्थी थिए । कसैले तिनको हातमा बाइबल थमाइदियो । त्यस बाइबलले तिनको जीवनमा यस्तो असाधारण प्रभाव पाथ्र्यो भनी कसैले अनुमान पनि गरेको थिएन ।

त्यही सानो बाइबल पढेर ती विद्यार्थीले येशू ख्रीष्टको बारेमा चिन्ने मौका पाए र तिनले उहाँलाई आफ्नो प्रभु र मुक्तिदाता भनी ह्दयमा स्वीकार गरे । खास गरी एफिसी २ अध्यायले तिनको ह्दयलाई छोएको थियो । उद्धारलाई कमाउन सकिँदैन र यो केवल अनुग्रहद्वारा पाइन्छ भनी तिनले बुझे जस्तो प्रेरित पावलले प्रस्ट पारेका छन्, “किनभने अनुग्रहबाट विश्वासद्वारा तिमीहरूले उद्धार पाएका छौ— र यो तिमीहरू आफैबाट होइन, यो त परमेश्वरको वरदान हो— कर्महरूद्वारा होइन, नत्रता मानिसले घमण्ड गर्नेछ” (एफिसी २:८–९) ।

को थिए ती विद्यार्थी ? क्रेग ग्रोस्चेल । तिनी अमेरिकाको लाइफ चर्चका वरिष्ठ पास्टर हुन् । यो मण्डली अमेरिकाकै सर्वाधिक ठुलो मण्डली हो । अमेरिकाको सात ओटा राज्यको पच्चिस ओटा स्थानमा यसले आफ्नो सेवाको पाल तन्काएको छ । यस मण्डलीमा हरेक हप्ता झण्डै एक लाख मानिस जम्मा हुन्छन् । यस मण्डलीको बाइबल एप्सलाई २० करोड पटक डाउनलोड गरिएको छ । हाल क्रेग ४९ वर्ष पुगेका छन् ।

Leave Your Comments Here.

शिलालेखको आविष्कारसँगै बाइबलका आलोचकहरू फेरि गलत साबित भए

इतिहासकार लूकाले लेखेका छन्, “कैसर तिबेरिअसका शासनकालको पन्ध्रौँ वर्षमा पन्तियस पिलातस यहूदीयाका हाकिम थिए । त्यस बेला हेरोद गालीलका शासक थिए, र तिनका भाइ फिलिप इतुरिया र त्राखोनितिसका शासक थिए, अनि लुसानियास अबिलेनेका शासक थिए” (लूका ३:१) । यस पदको अन्त्यमा “लुसानियास अबिलेनेका शासक थिए” भनी लूकाले प्रस्ट पारेका छन् । लूकाको विवरणअनुसार शासक लुसानियास करिब ख्रीष्टाब्द २७ मा शक्तिमा थिए । तर उक्त समयमा लुसानियासले शासन गरेका थिए भनी  उल्लेख गरेकाले वर्षौंसम्म सन्देहवादीहरूले लूकाको ऐतिहासिक विवरणमाथि प्रश्न तेर्साउँदै आएका थिए । प्रश्न गर्नुको कारण प्रस्ट थियो: इतिहासकारहरूलाई एक जना मात्र लुसानियासको बारेमा ज्ञान थियो जसले ४०–३६ ख्रीष्टपूर्वमा खाल्सिसमा शासन गरेका थिए । यो भनेको लूकाले उल्लेख गरेको मितिभन्दा झण्डै ६५ वर्ष अगाडिको मिति हो । त्यसो भए, के लूकाद्वारा अभिलिखित “लुसानियास” काल्पनिक व्यक्ति थिए त ? कदापि होइन । पुरातत्त्वविद्याले हामीलाई यस कठिनाइको समाधान गर्न मदत पुर्‍याएको छ ।

दमस्कस नजिकै रोमी सम्राट् तिबेरिअसको शासनकाल (ख्रीष्टाब्द १४–३७) को एउटा शिलालेख पत्ता लागेको छ जसमा इतिहासकार लूकाले भनेझैँ लुसानियासको नाउँ उल्लेख गरिएको छ ।

अब प्रश्न यो हो कि शिलालेखमा उल्लिखित लुसानियास लूकाद्वारा अभिलिखित लुसानियास नै हो भनेर कसरी थाहा पाउने ? उक्त शिलालेखको अंश यस्तो छ: “अगस्टस प्रभुहरूका उद्धारको लागि ...।” अगस्ट एउटा उपाधि थियो । एकै पटक दुई जना मानिसले यो उपाधि धारण गरेको समय तिबेरिअसको शासनकालमा मात्रै थियो । त्यस बेला तिबेरिअस र तिनकी आमा लिभिया दुवैले “अगस्टस” भन्ने उपाधि लिएका थिए ।  ख्रीष्टाब्द १४ मा कैसर अगस्टस (अर्थात् ओक्टाभियन) को निधनपश्चात् उनले यो उपाधि धारण गरेकी थिइन् । २९ मा उनको निधन भयो । तसर्थ, त्यो शिलालेख ख्रीष्टाब्द १४–२९ को बिचमा तयार पारिएको हुनुपर्छ ।

तब हामी प्रस्ट हुन सक्छौँ कि लुसानियास नाउँ गरेका दुई जना बेग्लाबेग्लै शासकहरू इतिहासमा बाँचेका रहेछन् । लूकाले पछिल्लो लुसानियासको उल्लेख गरेका हुन् भनी पुरातत्त्वविद्याले छर्लङ्ग पारेको छ । फेरि एक पटक बाइबलका आलोचकहरू गलत साबित भए पनि इतिहासकार लूका साँचो ठहरिए ।          

Leave Your Comments Here.