अनन्त परमेश्वरलाई अनादर नगर्नुस् तर उहाँको वचनमा रमाउनुस्

१५ वसन्त पार गरेपछि नयाँ जन्म पाएका चाल्र्स स्परजिन उन्नाइसौँ शताब्दीको उत्तराद्र्धमा इङ्गल्यान्डका सर्वश्रेष्ठ प्रचारक थिए । जीवनमा अनुमानित एक करोड मानिसहरूलाई प्रचार गरेका स्परजिनलाई “प्रचारकहरूका राजकुमार” भनेर चिनिन्छ । तिनले लन्डनस्थित एउटा मण्डलीमा ३८ वर्षसम्म पास्टर भई प्रभुको सेवा गरे । तिनका हजारौँ प्रवचनहरू संसारको चारैतिर पुगेका छन् । तिनका रचनाहरू मनग्गे भाषाहरूमा अनुवाद गरिएका छन् । अनाथालय खोली सामाजिक सेवामासमेत होमिएका स्परजिन पत्रिकाका सम्पादक पनि थिए । प्रवचन, आत्मचरित्र, टिप्पणीसाथै विभिन्न साहित्यिक कृतिहरूमा कलम चलाएका स्परजिनले कविता, भजनसाथै प्रार्थनाको विषयमा पनि लेखे । स्रोताहरूले मन्त्रमुग्ध भएर तिनका प्रवचनहरू सुन्थे । ख्रीष्टाब्द १८३४ मा इङ्गल्यान्डमा जन्मेका स्परजिनले एक पटक यसरी भनेका थिए:  

यदि परमेश्वरले बोल्नुभएको छ भने सुन्नुस् । यदि परमेश्वरले आफ्ना वचनहरू एउटा पुस्तकमा अभिलिखित गर्नुभएको छ भने विश्वासिलो ह्दय लिएर यसका पानाहरूको खोजी गर्नुस् । यदि तपाईं यसलाई परमेश्वरबाट प्रेरणा भएको पुस्तकको रूपमा स्वीकार गर्नुहुन्न भने यसमा तपाईंले विशेष ध्यान दिनुस् भनेर म तपाईंलाई निमन्त्रणा दिन सक्दिनँ । तर यदि तपाईं यसलाई परमेश्वरको पुस्तकको रूपमा हेर्नुहुन्छ भने ख्रीष्टको न्याय–आसनमा हाम्रो भेट हुने भएकोले बाइबललाई दैनिक अध्ययन गर्नुस् । अनन्त परमेश्वरलाई अनादर नगर्नुस् तर उहाँको वचनमा रमाउनुस् ।  

Leave Your Comments Here.