मिसनरीहरूको हत्या गर्ने हत्यारा येशूको सुसमाचारद्वारा रूपान्तरित भए

८ जनवरी १९५६ मा एउटा डरलाग्दो आक्रमण हुन पुगेको थियो जसमा ५ जना मिसनरीले ज्यान गुमाए । हुरानी नामक जङ्गली आदिवासीको बिचमा येशू ख्रीष्टको सुसमाचार लैजाने प्रयासमा हुरानी लडाकाहरूले मिसनरीहरूमाथि आक्रमण गरी तिनीहरूलाई मारेका थिए ।  

को थिए हुरानीहरू ? दक्षिण अमेरिकी मुलुक इक्वेडरको घना जङ्गलमा बस्ने एउटा आदिवासीको नाउँ हो— हुरानी । उका पनि भनेर चिनिने यो आदिवासी अत्यन्तै हिंसक थियो । तिनीहरू जङ्गलमै जन्मन्थे; त्यहीँ हुर्कन्थे र त्यहीँ मर्थे । तिनीहरूको क्षेत्रमा आएका बाहिरका मानिसहरूलाई तिनीहरूले मारिदिन्थे ।  एउटा खतरनाक असभ्य जाति जसको बिचमा येशूको सुसमाचार लैजानु फलामको चिउरा चपाउनुसरह थियो । तरै पनि पाँच जना मिसनरीहरू येशूको सन्देश लिएर तिनीहरूकहाँ जान चाहन्थे । सुसमाचार लैजाने तिनीहरूको इमान्दार प्रयासमा ती पाँचै जना सहिद भएका थिए । मिसनरीहरूको हत्या गर्ने हुरानीहरूमध्ये एक जना थिए, मिन्की । पाँच जनामध्ये दुई जना नेट सेन्ट र एड म्याकुलीलाई तिनले भालाले रोपेका थिए ।    

१९५८ मा अन्य मिसनरीहरू हुरानी जातिसित शान्तिपूर्ण सम्पर्क गर्न सफल भए । मिसनरीहरू तिनीहरूकै बिचमा गएर बसे; तिनीहरूका भाषा सिके र तिनीहरूलाई बाइबलको वचन सिकाए । मिन्कीको ह्दयमा बद्लाउ आयो र तिनी ख्रीष्टका अनुयायी बने । अन्त्यमा, तिनी हुरानीहरूको बिचमा स्थापित एउटा मण्डलीका प्रचारकसाथै एल्डर बने । ख्रीष्टियान बनेपछि उक्त जातिको बिचमा देखा परेको परिवर्तनलाई तिनी यसरी बताउँछन्, “तिनीहरूले हामीकहाँ बाइबल नल्याएसम्म हामीले नराम्ररी व्यवहार गर्‍यौँ । त्यसपछि उहाँको वचनलाई देखेपछि र उहाँको असल मार्गलाई पछयाएपछि अहिले हामी खुसी र शान्तिमा बस्छौँ ।”  

सहादत प्राप्त गरेका एक जना मिसनरी नेट सेन्टका छोरा स्टिभसित मिन्कीको घनिष्ठ सम्बन्ध थियो । स्टिभ धेरै वर्षसम्म तिनीहरूसँगै बसे । मिन्कीले स्टिभका पितालाई मारेकाले स्टिभलाई हुर्काउनु आफ्नो विशेष जिम्मेवारी हो भनी तिनले बुझेका थिए । १९९५ मा सेन्टको परिवार स्थायी रूपमा हुरानीहरूको बिचमा बस्न आएपछि मिन्कीले सहिद नेट सेन्टका सन्तानलाई आफ्नै नाति नातिनाको रूपमा लिए ।

लगभग ख्रीष्टाब्द १९३५ मा मिन्कीको जन्म भएको थियो । १९९७ मा मिन्की पहिलो पटक अमेरिका गए । स्टिभ सेन्टसँगै तिनी धेरै पटक अमेरिका पुगिसकेका छन् । विख्यात सुसमाचार प्रचारक बिल्ली ग्राहमको संस्थाले ख्रीष्टाब्द २००० मा नेदरल्यान्डको राजधानी सहरमा आयोजना गरेको अन्तर्राष्ट्रिय सुसमाचारीय सम्मेलनमा मिन्की स्टिभसँगै उपस्थित भएका थिए । सुसमाचार सुनाउने क्रममा मिसनरीहरूले प्राप्त गरेको सहादतमा आधारित रहेर निर्माण गरिएको दुई ओटा फिल्म (२००४ र २००६ मा निर्मित) मा मिन्कीको भूमिकालाई देख्न पाइन्छ ।  

यसरी मिसनरीहरूको हत्या गर्ने कुख्यात हत्यारा येशूको सुसमाचारद्वारा पूर्ण रूपमा रूपान्तरित भई प्रचारक र मण्डलीको अगुवा बने ।  

Leave Your Comments Here.