इस्राएलमा बाइबलीय राजा यारोबामको नाउँ उल्लिखित छाप फेला पारियो

उत्खननको क्रममा इस्राएलमा कैयौँ छापहरू पत्ता लगाइएका छन् । धेरैजसो छापहरू उच्च पदाधिकारीहरूको नाउँमा छन् । हालसम्म इस्राएल र यहूदाको कुनै पनि राजाको आफ्नै छाप फेला नपारिए तापनि केही छापहरूमा ती राजाहरूका व्यक्तिगत नाउँहरू उल्लेख भएका छन् । ख्रीष्टाब्द १९०४ मा त्यस्तै एउटा छाप फेला पारियो । 

 

इस्राएलको उत्तरपट्टि पर्ने मगिद्दो नामक सहरमा पुरातत्त्वविद् गोटलिएब स्कुमाचरको नेतृत्वमा उत्खनन गर्ने क्रममा एउटा छाप फेला पारियो जसमा “यारोबामका नोकर सेमा” भनेर लेखिएको छ । यस छापमा उल्लिखित यारोबाम प्राचीन इस्राएलका राजा यारोबाम द्वितीय हुन् भन्ने कुरामा अधिकांश विद्वान्हरू सहमत छन् ।

यारोबाम द्वितीय प्राचीन इस्राएलका चौधौँ राजा थिए जसले आठौँ शताब्दी ख्रीष्टपूर्वमा एकचालिस वर्ष राज्य गरेका थिए, “येहोआश आफ्ना पित्रहरूसित सुते, र इस्राएलका राजाहरूसित सामरियामा गाडिए । अनि तिनीपछि तिनका छोरा यारोबाम राजा भए । ... यहूदाका राजा योआशका छोरा अमस्याहको पन्ध्रौँ वर्षमा इस्राएलका राजा येहोआशका छोरा यारोबाम सामरियामा राजा भए, र तिनले एकचालीस वर्ष राज्य गरे” (२ राजा १४:१६,२३) ।  

२,८०० वर्ष पुरानो यो छापलाई यारोबाम द्वितीयको राजदरबारमा प्रयोग गरिन्थ्यो । यस छापमा गर्जिरहेको सिँहको आकृति कुँदिएको छ । यस छापले बाइबलमा उल्लिखित राजा यारोबाम द्वितीयको अस्तित्वलाई प्रमाणित गर्दछ ।   

Leave Your Comments Here.