अदोनिराम जडसन: बर्मामा मिसनरी बनेर गएका परमेश्वरका शक्तिशाली योद्धा

तिनी सानै उमेरदेखि प्रतिभावन् बालक थिए । तिन वर्षको उमेरमा तिनी पढ्न सक्थे । दस वर्षको उमेरमा आइपुग्दा तिनलाई ल्याटिन र ग्रिक भाषा आउँथ्यो र तिनी ईश्वरशास्त्रका गम्भीर विद्यार्थी बनिसकेका थिए । सोर्‍ह वर्षमा तिनी कलेज (हाल ब्राउन विश्वविद्यालय) प्रवेश गरिसकेका थिए । तिन वर्षपश्चात् कक्षाकै उत्कृष्ट विद्यार्थीको रूपमा तिनले दीक्षान्त पाएका थिए । तिनको नाउँ हो, अदोनिराम जडसन ।

अदोनिराम जडसन बर्मामा मिसनरी बनेर गएका परमेश्वरका शक्तिशाली योद्धा थिए जसले उक्त देशमा झण्डै ४० वर्ष सेवा गरे । तिनले बाइबललाई बर्मेली भाषामा अनुवाद गरे । तिनलाई उत्तर अमेरिकाद्वारा पठाइएका पहिलो प्रोटेस्टेन्ट मिसनरीको रूपमा आदर गरिन्छ । जडसन २५ वर्षको उमेरमा मिसनरी भई बर्मा (हाल म्यान्मा) गएका थिए ।

पिता अदोनिराम र माता अबिगेलबाट ९ अगस्ट १७८८ मा अदोनिराम जडसनको जन्म अमेरिकामा भएको थियो ।

आफ्नो साथीको प्रभावमा परेर जडसन ख्रीष्टियान विश्वासबाट टाढिएको भए तापनि साथीको मृत्युले तिनको ह्दयमा ठुलो चोट पुर्‍यायो । तिनी ख्रीष्टियान विश्वासतर्फ फर्के  र २० वर्षको उमेरमा तिनले आफैलाई परमेश्वरमा समर्पित गरे । तिनको परिवर्तनले तिनको आत्मालाई मात्र बचाएन तर तिनले आफ्नो बारेमा देखेको प्रसिद्धिको सपनालाई पनि चकनाचुर पारिदियो । अब तिनको एउटै उद्देश्य बन्यो: आफ्ना प्रभुलाई खुसी पार्न आफ्नो जीवन समर्पित गर्ने । 

५ फेब्रुअरी १८१२ मा अदोनिरामले आन हसल्टिनसित बिहे गरे । बिहेपश्चात् दुवै जना विदेशी मिसनको एउटा हिस्सा बन्ने आशा लिएर भारत आए । तर ब्रिटिस इस्ट इन्डिया कम्पनीले कुनै पनि मिसनरीलाई चाहेको थिएन । त्यसैले अदोनिराम र तिनकी पत्नीलाई पनि भारत छाड्न बाध्य गरियो ।

परमेश्वरको योजनामा उक्त दम्पतीलाई उहाँले छुट्टयाउनुभएको ठाउँ भारत नभई बर्मा थियो जहाँका मानिसहरूले कहिल्यै सुसमाचार सुनेका थिएनन् । विश्वासका साथ तिनीहरू चढेको पानी जहाज बर्मामा उत्रियो । बर्मेलीहरूले विदेशीहरूप्रति मैत्रीपूर्ण व्यवहार गर्दैनथ्ये । त्यहाँ राजाको शासन थियो जसले आफूले चाहेको कुरो गथ्र्यो । कसलाई जिउँदो राख्ने र कसलाई मार्ने भन्ने शक्ति उसको हातमा हुन्थ्यो । बुद्धबाहेक कुनै पनि भगवान्लाई ईश्वरको रूपमा पुज्नु बर्मामा गैरकानुनी थियो ।

तिनीहरू बर्माको र्‍याङ्गुन नामक सहरमा उत्रिए । परमेश्वरले तिनीहरूलाई त्यही ठाउँमा बसी सेवा–कार्य गर्न डाक्नुभएको थियो भनी तिनीहरूले महसुस गरे । तिनीहरूको पहिलो काम थियो— कठिन भाषा सिक्नु । बिस्तारै–बिस्तारै बर्मेली भाषा सिकी अदोनिरामले बाइबलका पुस्तकहरू एकपछि अर्को गर्दै बर्मेली भाषामा अनुवाद गर्न थाले । ६ वर्षपछि तिनीहरूले आफ्नो पहिलो विश्वासी मुङ्ग नाउलाई बप्तिस्मा दिए । र्‍याङ्गुनमा भएका विश्वासीहरूको सङ्ख्या अठार पुगेपछि तिनीहरू अभा भन्ने राजकीय सहरतर्फ लागे, मिसनको कामको लागि ।

ख्रीष्टाब्द १८२४ मा इङ्गल्यान्ड र बर्माको बिचमा युद्धको थालनी भयो । अङ्ग्रेजहरू जासुस हुन् भनी ठानी बर्मेलीहरूले सबै विदेशीहरूलाई शङ्का गर्न थाले । अदोनिराम मृत्यु जेल नामक झ्यालखानमा हालिए । झण्डै दुई वर्षको यातनापश्चात् तिनी जेलमुक्त भए । त्यस बेलासम्म तिनकी पत्नी आनको स्वास्थ्य सार्‍है बिग्रिसकेको थियो । दुई वर्षपश्चात् आनको मृत्यु भयो । त्यसको ६ महिनापछि आफ्नी दुई वर्षकी छोरी मारियालाई गुमाउनुपर्‍यो अदोनिरामले । तिनीहरूको एउटा सन्तान पहिले नै प्रभुमा सुतिसकेको थियो । कैयौँ वर्षसम्म अदोनिरामले ज्यादै सङ्र्घको जीवन गुजार्नुपर्‍यो । तर पूरै बाइबललाई बर्मेली भाषामा उतार्ने तिनको लक्ष्यमा भने तिनले सफलता पाईकन छाडे ।

१२ अप्रिल १८५० मा ६२ वर्षको उमेरमा अदोनिराम यस धरतीबाट बिदा भए ।

अदोनिरामले बर्मेली भाषामा बाइबल अनुवाद गर्नुका अतिरिक्त बर्मेली–अङ्ग्रेजी शब्दकोश, अङ्ग्रेजी–बर्मेली शब्दकोश, बर्मेली भाषाको व्याकरण र दुई ओटा भजन पनि छाडेर गएका छन् ।  

जवान छँदा अदोनिरामले भनेका थिए, “बर्मामा क्रूस सदाको निम्ति स्थापित नभएसम्म म यहाँबाट जान्नँ ।” तिनले बर्मामा आफ्नो मिसन थालनी गर्दा तिनको लक्ष्य थियो बर्मेली भाषामा बाइबल अनुवाद गर्ने र सय जना विश्वासी भएको एउटा मण्डली खडा गर्ने । तिनको मृत्यु हुँदासम्म तिनले बाइबल अनुवादलाई पूरा गरिसकेका थिए र सय ओटा मण्डली स्थापना गरेका थिए जसमा ८,००० विश्वासी भइसकेका थिए ।

Leave Your Comments Here.