टेलिभिजन च्यानलका टिप्पणीकारलाई बिल्ली ग्राहमको उत्तर

बिल्ली ग्राहम इतिहासमा सबैभन्दा बेसी मानिसहरूलाई सुसमाचार सुनाउने व्यक्ति हुन् । तिनले जीवनमा दुई अरबभन्दा बेसी मानिसहरूलाई सुसमाचार सुनाएका छन् र तिनको सुसमाचार सुनेर झन्डै ३२ लाख मानिसहरूले येशूलाई व्यक्तिगत प्रभु र मुक्तिदाताको रूपमा स्वीकार गरेका छन् । संसारका १८५ ओटा राष्ट्रका मानिसहरूले तिनको जीवन परिवर्तन गर्ने सन्देशलाई सुन्ने मौका पाएका छन् । ग्राहम अमेरिकाका थुप्रै राष्ट्रपतिहरूका आत्मिक सल्लाहकार थिए । ख्रीष्टाब्द १९१८ मा अमेरिकामा जन्मेका ग्राहमलाई बुबाले कृषक बनाउन खोजे तापनि परमेश्वरको योजनाअनुसार तिनी सर्वश्रेष्ठ वक्ता कहलाइएका छन् ।

एक पटक बिल्ली ग्राहम फ्रान्सको टेलिभिजन च्यानलमा देखा पर्दा टिप्पणीकारले तिनलाई अनुरोध गरे, “डा. ग्राहम, परमेश्वर अस्तित्वमा हुनुहुन्छ भनी प्रमाणित गर्न तपाईंलाई दुई मिनेट दिइएको छ ।”

ग्राहमले जवाफ दिए, “म प्रमाणित गर्न सक्दिनँ तर जे मलाई थाहा छ त्यो भने अवश्य बताउँछु: किनभने परमेश्वरले संसारलाई यस्तो प्रेम गर्नुभयो, कि उहाँले आफ्ना एकमात्र पुत्र दिनुभयो, ताकि उहाँमाथि विश्वास गर्ने कोही पनि नाश नहोस्, तर त्यसले अनन्त जीवन पाओस् ।”

Leave Your Comments Here.

अब्राहाम लिङ्कनले राज्यको उन्नतिको श्रेय परमेश्वरलाई दिए

अब्राहाम लिङ्कन अमेरिकाका सोर्‍हौँ राष्ट्रपति थिए । तिनले राज्यको एकता कायम राख्न उल्लेखनीय भूमिका निभाए; दास प्रथालाई उन्मूलन गरे; सङ्घीय राज्यलाई मजबुत पारे र अर्थतन्त्रलाई आधुनिकीकरण गरे ।

ख्रीष्टाब्द १८०९ मा अमेरिकामा जन्मेका लिङ्कन ख्रीष्टियान परिवारमा हुर्केका थिए । तिनले येशू ख्रीष्टमाथि विश्वास गर्थे र आफ्ना भाषणहरूमा तिनले बारम्बार परमेश्वरको उल्लेख गर्थे र बाइबल धर्मशास्त्रबाट उद्धृत गर्थे । ख्रीष्टाब्द १८६३ मा तिनले दिएको भाषण यस्तो थियो:

हामी स्वर्गका श्रेष्ठतम सीमाहरूका प्रापकहरू भएका छौँ; यी मनग्गे वर्षहरूमा हामी शान्ति र उन्नतिमा जोगिएका छौँ; हामी सङ्ख्या, सम्पत्ति, र शक्तिमा बढेका छौँ जसरी अन्य कुनै राष्ट्र बढेको छैन । तर हामीले परमेश्वरलाई भुलेका छौँ । हामीलाई शान्तिमा राख्ने, गुणात्मक वृद्धि गर्ने, सम्पन्न तुल्याउने र मजबुत तुल्याउने अनुग्रही हातलाई हामीले भुलेका छौँ । यी सबै आशिष्हरू हाम्रा आफ्नै वरिष्ठ बुद्धि र सद्गुणद्वारा उत्पादन गरिएका हुन् भनी हामीले हाम्रा ह्दयको छल कपटमा व्यर्थैमा कल्पना गरेका छौँ । अटुट सफलताले मातेर हामी यति धेरै आत्मनिर्भर भएका छौँ कि छुटकारा दिने र बचाउने अनुग्रहको खाँचोलाई हामी महसुस गर्दैनौँ; यति धेरै घमण्डी भएका छौँ कि हामीलाई बनाउनुहुने परमेश्वरलाई हामी प्रार्थना चढाउँदैनौँ ।

  

Leave Your Comments Here.

ख्रीष्टियान दार्शनिकका तर्कहरूबाट प्रभावित भई डन नास्तिकबाट डिकन बने

९० भन्दा बेसी पुस्तकका लेखक, सह–लेखकसाथै सम्पादक नर्मन गेइस्लर ख्रीष्टियान ईश्वरशास्त्री, दार्शनिकसाथै रक्षाशास्त्री हुन् ।

एक जना सहकर्मीलाई लिएर तिनी सुसमाचार प्रचारको लागि एउटा घरमा पुगे र तिनले ढोका ढकढक्याए ।

ढोका खोल्दै एक जना मानिसले भने, “मेरो नाउँ डन हो ।”

डनबाट अनुमति पाएपछि गेइस्लरले ईई (इभान्जलिज्म एक्सप्लोजन) मा प्रयोग गरिने दोस्रो परीक्षणात्मक प्रश्न सोधे, “मानौँ, तपाईंको मृत्यु भयो र तपाईं परमेश्वरको सामु खडा हुनुभयो अनि उहाँले तपाईंलाई सोध्नुभयो, ‘म तिमीलाई मेरो स्वर्गमा किन प्रवेश दिऊँ ?’ तपाईं के भन्नुहुन्थ्यो होला ?”

त्यस्तो प्रश्न सुनेर डन झोँक्किए । नर्मनले मनमनै प्रार्थना गरे र तिनीहरूबिचको वार्तालाप अगाडि बढ्दै गयो अनि डनले आफू नास्तिक भएको जानकारी गराए ।

नर्मनले डनलाई सोधे, “परमेश्वर अस्तित्वमा हुनुहुन्न भन्ने कुरोमा के तपाईं पूर्णत: निश्चित हुनुहुन्छ ?”

एकछिन रोकिएर तिनले जवाफ दिए, “म पूर्णत: निश्चित छैनँ । परमेश्वर अस्तित्वमा हुन पनि सक्नुहुन्छ ।”

त्यसपछि दार्शनिक नर्मनले व्याख्या गरे, “त्यसो भए तपाईं वास्तवमा नास्तिक हुनुहुन्न । तपाईं अज्ञेयवादी हुनुहुन्छ । किनकि नास्तिकले भन्छ, ‘परमेश्वर हुनुहुन्न भनी मलाई थाहा छ ।’ र अज्ञेयवादीले भन्छ, ‘परमेश्वर हुनुहुन्छ या हुनुहुन्न भनी मलाई थाहा छैनँ ।’”

नर्मनको व्याख्यालाई बुझेपछि डनले आफू अज्ञेयवादी भएको स्वीकार गरे । तर नर्मन तिनलाई सत्यतालाई जान्न सकिन्छ र परमेश्वर अस्तित्वमा हुनुहुन्छ भनी वैज्ञानिक साक्षीहरू देखाउन चाहन्थे । त्यसैले तिनले डनलाई सोधे, “अहिले तपाईंले जान्न सकिन्छ भनी स्वीकार गर्नुभएकोले परमेश्वर अस्तित्वमा हुनुहुन्छ भनी तपाईं किन जान्न सक्नुहुन्न त ?”

डनको जवाफ थियो, “सायद, कसैले मलाई कुनै साक्षी देखाएको छैनँ ।”

डन जान्न इच्छुक थिए । त्यसैले नर्मनले तिनको हातमा फ्रयाङ्क मोरिसनद्वारा लिखित पुस्तक हु मुभ्ड द स्टोन ? नामक पुस्तक दिए ।

केही समय बितेपछि नर्मन डनलाई भेट्न गए । मोरिसनद्वारा प्रस्तुत तर्कलाई डनले “ज्यादै विश्वसनीय” भने । केही हप्ता बितेपछि डनले येशू ख्रीष्टलाई आफ्नो व्यक्तिगत प्रभु र मुक्तिदाताको रूपमा स्वीकार गरे । पछि तिनी एउटा मण्डलीको डिकन बने ।

Leave Your Comments Here.

प्रार्थनाबारे १५ ओटा भनाइहरू (भाग १)

प्रार्थना तपाईं र परमेश्वरबिच हुने दुई जनाको बातचित हो ।

बिल्ली ग्राहम, सर्वश्रेष्ठ प्रचारक  

प्रार्थना भनेको मान्छेको इच्छालाई स्वर्गमा कार्यान्वयन गराउनु होइन, तर परमेश्वरको इच्छालाई पृथ्वीमा कार्यान्वयन गराउनु हो । यो परमेश्वरको अरुचिमाथि विजय हासिल गर्नु होइन, तर परमेश्वरको तत्परतालाई समात्नु हो ।

रिचार्ड सी. ट्रेन्च, प्रधान बिशप

प्रार्थनाले परमेश्वरलाई बदल्दैन तर यसले प्रार्थना गर्नेलाई बदल्छ ।

सोरेन किर्केगार्ड, दार्शनिक, ईश्वरशास्त्री, कवि 

हामीले “हे प्रभु, तपाईंको राज्य आओस्” भनेर प्रार्थना गर्नुअगि “मेरो राज्य जाओस्” भनेर प्रार्थना गर्न हामी इच्छुक हुनुपर्छ ।

अलान रेडपथ, सुसमाचार प्रचारक, पास्टरसाथै लेखक 

जहाँ प्रार्थना हुन्छ त्यहाँ काम हुन्छ ।

जोन वेस्ली, ईश्वरशास्त्री, लेखकसाथै अगुवा

साँचो प्रार्थना वजनद्वारा नापिन्छ, लमाइद्वारा होइन । परमेश्वरको सामु व्यक्त एउटा क्रन्दनमा लामो सुन्दर भाषणमा भन्दा बेसी प्रार्थनाको भरिपूर्णता हुन सक्छ ।

सी. एच. स्परजिन, प्रचारक, पास्टरसाथै लेखक 

परमेश्वरको वचन भोजन हो जसद्वारा प्रार्थनालाई हुर्काइन्छ अनि मजबुत पारिन्छ ।

ई. एम. बाउन्स, अधिवक्ता, लेखकसाथै अगुवा 

प्रार्थना परमेश्वरसित गरिने बातचित हो । यसलाई कानेखुसी गरेर वा लयमा वा लेखेर व्यक्त गर्न सकिन्छ । ... यसलाई जसरी व्यक्त गरिए तापनि यो कहिल्यै व्यर्थमा जाँदैन ।

डोन्ना विल्क कार्डिलो, वक्तासाथै अगुवा

प्रार्थनाको लागि जिब्रोभन्दा ह्दयको बेसी खाँचो पर्दछ ।

आदम क्लार्क, ईश्वरशास्त्रीसाथै बाइबलीय विद्वान् 

जब प्रार्थनाहरू माथि जान्छन् तब आशिष्हरू तल झर्छन् ।

अज्ञात

सम्भवत: “हामीलाई आज हाम्रो दैनिक भोजन दिनुहोस्” भन्ने वाक्य अङ्ग्रेजी भाषामा सबैभन्दा सिद्ध रूपमा रचित र सबैभन्दा उपयोगी वाक्य हो ।

पी. जे. विङ्गेट, लेखक

सङ्कष्ट र उल्झनले मलाई प्रार्थनामा लैजान्छन् र प्रार्थनाले सङ्कष्ट र उल्झनलाई हटाउँछ ।

फिलिप मेलाङ्थेन, सुधारवादी, ईश्वरशास्त्रीसाथै प्राध्यापक

नियमित प्रार्थनाको मूल्य भनेको उहाँले हाम्रो आवाजलाई सुन्नुहुनेछ भन्ने होइन तर हामीले उहाँको आवाजलाई सुन्छौँ भन्ने हो ।

विलियम म्याकगिल

हामीले हाम्रा आँखा परमेश्वरमा लगाएर प्रार्थना गर्नुपर्छ, कठिनाइहरूमा लगाएर होइन ।

ओसवाल्ड च्याम्बर्स, सुसमाचार प्रचारकसाथै शिक्षक

प्रभुको प्रार्थनालाई छिट्टै कण्ठस्थ गर्न सकिन्छ होला तर ह्दयले यसलाई बिस्तारै सिक्दछ ।

फ्रेडरिक डेन्सन माउरिस, ईश्वरशास्त्री, लेखकसाथै समाजशास्त्री

Leave Your Comments Here.

क्षमालाई अस्वीकार गरी मृत्युदण्ड भोगे विलसनले

ख्रीष्टाब्द १८२९ मा जर्ज विलसन र जेम्स पोर्टर नाउँ गरेका दुई जना मानिसले अमेरिकाको एक जना हुलाकीलाई लुटे । पछि तिनीहरू पक्राउमा परे र मे १८३० मा तिनीहरू दुवै दोषी ठहरिए । जुलाई २ मा तिनीहरूलाई मृत्युदण्ड दिइने घोषणा गरियो ।

तोकिएकै समयमा जेम्सलाई मृत्युदण्ड दिइयो तर विलसनलाई भने दिइएन । केही प्रभावशाली व्यक्तिहरूले तिनको पक्षमा तात्कालीन अमेरिकी राष्ट्रपति आन्द्रु ज्याकसनसित बिन्ती चढाएका थिए ।

राष्ट्रपतिले विलसनलाई क्षमा दिए र तिनलाई केवल २० वर्षको जेल सजाय तोकियो । तर विलसनले क्षमालाई स्वीकार गर्न मानेनन् । त्यो विषय सर्वोच्च अदालतमा पुग्यो । प्रधान न्यायाधीश जोन मार्सलले फैसला सुनाए, “क्षमा अनुग्रहको एउटा काम हो । ... तर स्वीकारविना त्यसले पूर्णता पाएको हुँदैन । जसलाई यो दिइएको छ उसले यो इन्कार गर्न पनि सक्छ । ... उसले जबरजस्ती स्वीकार गर्नुपर्छ भन्ने शक्ति अदालतसित हुँदैन ।”

निस्सन्देह, प्रधान न्यायाधीशको फैसला मुनासिब नै थियो । कसैले पनि क्षमालाई जबरजस्ती लाद्न सक्दैन । व्यक्तिले यसलाई स्वीकार गर्न पनि सक्छ र इन्कार गर्न पनि । विलसनले त्यस क्षमालाई ग्रहण गर्न इन्कार गरेकाले तिनलाई मृत्युदण्ड दिइयो ।

२,००० वर्षअगि कलवरीको क्रूसमा येशूले मानव–जातिको पापको लागि क्षमाको हात फैलाउनुभयो । विलसनको मुद्दामा जस्तै त्यसलाई स्वीकार गर्ने र इन्कार गर्ने छनौट पापी मानिसहरूको काँधमा छ । क्षमालाई स्वीकार गर्नेहरू दण्डबाट बाँच्छन् भने इन्कार गर्नेहरू त्यसमा पर्छन् ।   

Leave Your Comments Here.

एसावका कति जना पत्नीहरू थिए— दुई वा तिन वा चार ?

उत्पत्ति २६:३४ ले एसावका दुई जना पत्नीको सूची दिन्छ, “एसावले चालीस वर्षको उमेरमा हित्ती बेरीकी छोरी यहूदीत र हित्ती एलोनकी छोरी बासमतलाई विवाह गरी ल्याए ।” तर उत्पत्ति ३६:२–३ ले तिनका तिन जना पत्नीको नाउँ अभिलिखित गर्दछ, “एसावले कनानी स्त्रीहरूमध्येबाट पत्नी ल्याए: अर्थात् हित्ती एलोनकी छोरी आदा र हिव्वी सिबोनकी नातिनी र अनाकी छोरी ओहोलीबामा, तथा इश्माएलकी छोरी नबायोतकी बहिनी बासमत ।” वास्तवमा एसावका कति जना पत्नीहरू थिए— दुई वा तिन वा चार ?

इसहाक र रिबेकाबाट जन्मेका जुम्ल्याहा छोराहरूमध्ये एसाव जेठा थिए भने याकूब कान्छा । एसाव पितामह अब्राहामका नाति थिए । एसावको अर्को नाउँ एदोम हो जसबाट एदोमीहरूको उदय भयो ।

माथि उल्लिखित खण्डहरूलाई होसियारीसित अवलोकन गर्दा प्रस्ट हुन्छ कि वास्तवमा एसावका चार जना पत्नीहरू थिए । 

एसावकी प्रथम पत्नीको नाउँ हो, यहूदीत । उनी हित्ती बेरीकी छोरी थिइन् । उत्पत्ति ३६ मा उनको नाउँ उल्लेख नभएकोले हामी निष्कर्ष निकाल्न सक्छौँ कि उनले एसावको निम्ति कुनै सन्तान जन्माइनन् किनकि उत्पत्ति ३६ अध्याय एदोम अर्थात् एसावको वृत्तान्त हो । उनी बाँझी रहिन् वा जवानी अवस्थामा मरिन्, त्यो अनिश्चित छ । 

बासमत एसावकी दोस्री पत्नी हुन् । हित्ती एलोनबाट जन्मेका उनको अर्को नाउँ आदा थियो । बाइबलमा एउटै व्यक्तिले दुई ओटा नाउँ धारण गरेका उदाहरणहरू मनग्गे छन् । आदाले एसावको निम्ति एलीपजलाई जन्माइन् ।

एसावकी तेस्री पत्नीको नाउँ हो— ओहोलीबामा । उनी हिव्वी अनाकी छोरी थिइन् । एसावले उनलाई कुन परिस्थितिमा र कहिले बिहे गरे भनी हामीलाई बताइएको छैन । तर हामीलाई थाहा छ कि ओहोलीबामाको पिताको नाउँ अना थियो भने हजुरबुबाको नाउँ सिबोन थियो । उनले तिन जना छोरा जन्माइन्: येऊश, यालाम र कोरह ।

चौथामा पर्छ, बासमत । उनको अर्को नाउँ महलत थियो (उत्पत्ति २८:९) । उनी इश्माएलकी छोरी थिइन् । उनले एउटा छोरो जन्माइन्: रूएल ।

निष्कर्षमा एसावका चार पत्नीहरू थिए: यहूदीत, बासमत (आदा), ओहोलीबामा, बासमत (महलत) ।      

Leave Your Comments Here.