विलियम लेन क्रेग: वर्तमान समयका सर्वाधिक महान् ख्रीष्टियान रक्षाशास्त्री

नास्तिकबाट प्रखर वक्ता बनेका ६९ वर्षका रबी जकरियाले क्रेगको विषयमा भनेका छन्, “तर्कसङ्गत भन्न सकिन्छ कि विलियम लेन क्रेग हाम्रो समयको सबैभन्दा उत्कृष्ट ख्रीष्टियान दार्शनिकहरूमध्ये एक हुन् । तिनका ज्ञान र सिपले तिनलाई प्रत्येक महादेशका मञ्चहरूमा स्थापित गरेका छन् जहाँ तिनी सर्वाधिक सुविख्यात सन्देहवादीहरूसित संवाद र वादविवादमा संलग्न भएका छन् ।”

विलियम लेन क्रेग ख्रीष्टियान रक्षाशास्त्री (अपोलोजिस्ट), ख्रीष्टियान दार्शनिकसाथै ईश्वरशास्त्री हुन् । निस्सन्देह, तिनी वर्तमान समयका सर्वाधिक महान् ख्रीष्टियान रक्षाशास्त्री हुन् । ख्रीष्टियान विश्वासको पक्षमा तार्किक रूपमा वकालत गर्ने व्यक्तिलाई ख्रीष्टियान रक्षाशास्त्री भनिन्छ । क्रेग तिस ओटाभन्दा बेसी पुस्तकका लेखकसाथै सम्पादक हुन् । ईश्वरशास्त्र र दर्शनशास्त्रका विभिन्न पत्र पत्रिकाहरूमा तिनका झण्डै २०० ओटा लेख रचनाहरू छापिएका छन् । तिनी सार्वजनिक वादविवादको लागि विश्व प्रसिद्ध छन् । तिनी परिचित नास्तिकहरू, अज्ञेयवादीहरू र सन्देहवादीहरूसित बारम्बार वादविवादमा संलग्न भएका छन् ।

२३ अगस्ट १९४९ मा विलियम लेन क्रेगको जन्म अमेरिकामा भएको थियो । पिता मालोरी र माता डोरिसबाट जन्मेका तिन सन्तानमध्ये क्रेग माहिलो हुन् ।

१६ वर्षको उमेरमा तिनले पहिलो पटक सुसमाचारीय सन्देशलाई सुनेपछि तिनले  ख्रीष्टलाई अङ्गालेका थिए । क्रेगले दुई ओटा विद्यावारिधि (इङ्गल्यान्ड र जर्मनीबाट) हासिल गरेका छन् ।

ख्रीष्टाब्द १९७२ मा क्रेग जानसित वैवाहिक बन्धनमा बाँधिए र तिनीहरूलाई परमेश्वरले दुई ओटा छोरा आशिष्स्वरूप दिनुभएको छ । 

वादविवादको क्षेत्रमा विख्यात क्रेग दर्शनशास्त्र र ईश्वरशास्त्रका विषयहरूमा साम हेरिस, ख्रिस्टोफर हिचेन्स, दानिएल डेनेटजस्ता प्रसिद्ध नास्तिकहरूसाथै विभिन्न दार्शनिक र वैज्ञानिकहरूसित वादविवादमा भाग लिएका छन् ।

रिजनएबल फेथ र अन गार्ड रक्षाशास्त्रको क्षेत्रमा क्रेगका दुई ओटा मुख्य कृतिहरू हुन् । येशूको पुनरुत्थानको सम्बन्धमा पनि तिनले बृहत् रूपमा अनुसान्धान गरेर दुई ओटा कृतिहरू प्रकाशित गरेका छन् जसले येशूको पुनरुत्थानलाई एक ऐतिहासिक घटनाको रूपमा उभ्याउँछन् । 

क्रेग धर्मको दर्शनशास्त्र र प्राकृतिक ईश्वरशास्त्रको क्षेत्रमा विशेषज्ञ हुन् । परमेश्वरको अस्तित्वको सम्बन्धमा तिनले प्रस्तुत गरेका तर्कहरूले उल्लेखनीय योगदान पुर्‍याएका छन् । तिनका गहकिला तर्कहरू सुनेर कैयौँले प्रभु येशूलाई अङ्गालेका पनि छन् ।

क्रेग वर्तमान समयका अब्बल ख्रीष्टियान दार्शनिक हुन् । संसारका विशिष्ट सन्देहवादीहरूसित वादविवादमा संलग्न हुँदा तिनले ख्रीष्टियान विश्वासको प्रतिरक्षा मात्र गरेका छैनन् तर तिनीहरूका तर्कलाई चकनाचुर पनि पारिदिएका छन् । ईश्वरशास्त्रको क्षेत्रमा तिनले बृहत् रूपमा लेख्नुकासाथै सिकाएका पनि छन् । विश्वास र तर्क सँगसँगै जान सक्छन् भन्ने तिनको अवधारणाको खाँचो यस युगमा टडकारो देखिएको छ ।      

Leave Your Comments Here.